Amakipe azahagararira Umujyi wa Kigali muri Basketball y’abakina ari batatu yamenyekanye (Amafoto)

Yanditswe na Eric Tony Ukurikiyimfura
Kuya 30 Nzeri 2019 saa 02:08
Yasuwe :
0 0

Amakipe ya Elite Lakers mu bahungu na Lycée Notre Damme de Cîteaux (LNDC) mu bakobwa, ni yo yegukanye irushanwa rya Basketball y’abakina ari batatu mu Mujyi wa Kigali ryateguwe n’Ishyirahamwe ry’Umukino wa Basketball mu Rwanda (FERWABA) ku bufatanye na Banki ya Kigali PLC.

Iri rushanwa ryahuje amakipe 22 arimo 16 y’abahungu n’atandatu y’abakobwa mu Mujyi wa Kigali ryabaye mu minsi ibiri, ku wa Gatandatu no ku Cyumweru kuri Stade Amahoro i Remera.

Muri Basketball y’abakina ari batatu, ikinwa muri ½ cy’ikibuga gisanzwe, aho buri kipe iba ifite abakinnyi bane barimo umwe w’umusimbura.

Umukino ukinwa iminota 10, ahasanzwe hatsindirwa amanota atatu muri Basketball isanzwe, habarirwa amanota abiri mu gihe ahatsindirwa abiri, habarirwa inota rimwe. Iyo hari ikipe igize amanota 21, umukino uhita urangira.

Ku mukino wa nyuma mu bahungu, Elite Lakers yegukanye umudali wa Zahabu itsinze Gikondo Bulls amanota 13-12.

Elite Lakers yari yasezereye CBT B ku manota 9-8 muri ½ mu gihe Gikondo Bulls yari yatsinze Rafiki Kids amanota 12-11.

Mu cyiciro cy’abakobwa, irushanwa ryegukanywe na LNDC Team yatsinze KCS Lady Bears amanota 10-4 ku mukino wa nyuma.

LDK Girls yegukanye umwanya wa gatatu itsinze St Ignace Girls amanota 8-3.

Umuhuzabikorwa w’iri rushanwa rya Basketball y’abakina ari batatu, Mutokambali Moïse yavuze ko ari ubwa mbere mu Rwanda habaye irushanwa ryemewe ry’uyu mukino ndetse batangiriye ku bari munsi y’imyaka 17 kugira ngo hategurwe ikipe y’igihugu y’abaterengeje imyaka 18.

Ati” Ni irushanwa ryiza cyane mu bakiri bato kuko ni ukugira ngo buri wese agaragaze impano ye. Muri iyi minsi risigaye rikinwa mu mikino Olempike ndetse ritanga amanota ku gihugu cyariteguye no ku mukinnyi ku giti cye.”

“Twagerageje gutegura amarushanwa y’abaterengeje imyaka 17 kuko mu mwaka utaha hari amarushanwa y’abatarengeje imyaka 18. Nashishikariza abantu bose kurikina kuko rifasha abantu guhura, gusabana no kwerekana impano zabo.”

Nyiramahirwe Eugenie Smet wa Lycée Notre Damme de Cîteaux yavuze ko Basketball y’abakina ari batatu isaba imbaraga nyinshi no gukora cyane kuko abakinnyi aba ari bake.

Ati” Ni irushanwa ritwongereye urukundo rwa Basketball twari dufite kuko twabonye ko hari abadushyigikiye, natwe tugiye kwerekana impano zacu. Iyi Basketball ya batatu itandukanye n’isanzwe kuko iyo muri benshi murafatanya cyane, ariko iyi twari bake bidusaba imbaraga nyinshi no gukora cyane.”

Kapiteni wa Elite Lakers y’i Kacyiru, Iratubona Elisse yavuze ko nyuma yo kubona itike yo guhagararira Umujyi wa Kigali, we na bagenzi be bagiye gukomeza kwitegura ku buryo bazegukana iri rushanwa ku rwego rw’igihugu.

Ati” Turishimye cyane kuko byatuvunnye kugira ngo turyegukane. Turashimira BK yadufashije guhurira aha. Tugiye gukora cyane dushyizemo imbaraga kugira ngo tuzongere tubone umudali.”

Iri rushanwa rizakomereza mu zindi ntara, aho tariki ya 5 Ukwakira 2019 rizabera i Rwamagana, tariki ya 6 Ukwakira i Muhanga, tariki ya 12 Ukwakira i Musanze ndetse na tariki ya 13 Ukwakira ribere i Rubavu.

Amakipe abiri ya mbere (ayakinnye umukino wa nyuma) muri buri cyiciro mu Ntara, aziyongera ku yandi ane (ayakinnye ½ ) muri buri cyiciro mu Mujyi wa Kigali, abe 12 azakina imikino ya nyuma izaba tariki ya 18 Ukwakira 2019.

Basketball y’abakina ari batatu ikinirwa muri ½ cy’ikibuga gisanzwe
Aya marushanwa yitabiriwe n'abakinnyi batarengeje imyaka 17
LNDC yatsinze KCS Lady Bears ku mukino wa nyuma
Lycée Notre Damme de Cîteaux (LNDC) yabaye iya mbere mu bakobwa, yashyikirijwe ibihembo na Visi Perezida wa Mbere wa FERWABA, Nyirishema Richard
Elite Lakers yabaye iya mbere mu bahungu, yashyikirijwe ibihembo na Nshuti Thierry ukuriye ishami rishinzwe kwamamaza ibikorwa bya Banki ya Kigali
Amakipe ane ya mbere mu bahungu n'abakobwa ni yo azahagararira Umujyi wa Kigali ku rwego rw'igihugu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza