Leta Zunze Ubumwe za Amerika ni yo yasoje ku mwanya wa mbere i Paris, yegukanye imidali myinshi (126), ariko inganya n’u Bushinwa imidali 40 ya Zahabu.

Bamwe mu bafashije iki gihugu kwitwara neza harimo Simon Biles ukina imikino ngororangingo ya Gymnastique aho yatwaye umudali wa Zahabu haba ku giti cye no mu ikipe. Ni ko byagenze kandi no kuri Katie Ledecky watwaye imidali ibiri ya Zahabu, uwa Feza n’uw’Umuringa mu koga.

U Bushinwa bwitwaye neza mu marushanwa yo kwibira mu mazi aho bwayegukanye yose uko ari umunani.

Umunya-Suède Armand “Mondo” Duplantis yaciye agahigo ko ku rwego rw’Isi mu gusimbuka intera ndende igana hejuru naho Umunyamerika Sydney McLaughlin-Levrone abikora mu gusimbuka ahagoranye.

U Bufaransa bwari bwakiriye iyi mikino, bwasoreje ku mwanya wa kane mu bihugu byatwaye imidali myinshi (64) inyuma y’u Bwongereza bwatwaye 65 ariko urebye ku midali ya Zahabu gusa, Abafaransa ni aba gatanu aho batwaye 16 naho Abongereza bakaba aba karindwi n’imidali 17 ya Zahabu.

Umufaransa Léon Marchand yatwaye imidali ine ya Zahabu n’umwe w’Umuringa mu koga ndetse ni we mukinnyi witwaye neza kurusha abandi. Imidali itanu yegukanye yayinganyije na Huske Torri na Smith Regan bo muri Amerika ndetse na McKeown Kaylee na O’Callaghan Mollie bo muri Australia.

Muri rusange, imidali 329 ni yo yahataniwe n’abakinnyi 10 500, irimo 157 ku bagabo, 152 ku bagore na 20 ku makipe avanze (abagabo n’abagore bakinira hamwe).

Iminsi y’amarushanwa yatanzweho imidali ni 19 muri siporo 32 zitandukanye.

Ibihugu bya Afurika byegukanye imidali birimo Kenya (11 irimo ine ya Zahabu), Algerie (itatu irimo ibiri ya Zahabu), Afurika y’Epfo (6, 1), Ethiopie (4, 1), Misiri (3, 1), Tunisie (3, 1), Botswana (2, 1), Uganda (2, 1), Maroc (2, 1), Cote d’Ivoire (1) na Zambia (1).

Mu mafoto arenga 250 y’indobanure, dore ibyaranze Imikino Olempike ya Paris yari yatangiye ku wa 26 Kanama nubwo hari amarushanwa yatangiye gukinwa iminsi ibiri mbere .

Ubwo Umufaransakazi Yseult yaririmbaga "My Way" hasozwa Imikino Olempike ya Paris ku wa 11 Kanama

Umukinnyi wa filime Tom Cruise yamanukiye ku mugozi muri Stade de France, ajya gufata ibendera rya Komite Olempike, arihawe na Meya wa Los Angeles, Karen Bass, aritwara kuri moto mbere yo gufata indege akarijyana muri Amerika ahazabera Imikino itaha

Meya wa Los Angeles, Karen Bass, yashyikirijwe ibendera rya Komite Olempike dore ko uyu Mujyi ari wo uzakira iyi Mikino mu myaka ine iri imbere

Abakinnyi ba Leta Zunze Ubumwe za Amerika bari bafite ibyishimo mu birori bisoza Imikino ya Paris

Alain Roche acuranga piano yari imanitse ku migozi ifashe ku gisenge cya Stade de France

Abakinnyi b'u Bwongereza bacinya akadiho mu birori bisoza Imikino Olempike

Abatwaye ibendera rya buri gihugu binjira muri Stade de France mbere y'isozwa ry'Imikino

Itsinda rya Phoenix ryo mu Bufaransa riri mu bacuranze mu birori bisoza Imikino Olempike ya Paris

Sifan Hassan (hagati) watwaye Marathon mu bagore, ni we wa nyuma wambitswe umudali wa Zahabu i Paris

Abakinnyi bahagarariye imigabane yose bazimije urumuri rw'Imikino ya Paris rwazanywe na Leon Marchand wigaragaje kurusha abandi uyu mwaka

A'ja Wilson wa Leta Zunze Ubumwe za Amerika atsinda amanota mu mukino wabahesheje umudali wa nyuma wa Zahabu ku wa 11 Kanama 2024 ubwo batsindaga u Bufaransa amanota 67-66

Sifan Hassan wo mu Buholandi asatira umurongo muri Marathon aho yegukanye umudali wa Zahabu. Yatwaye kandi uw'Umuringa muri metero 5000 na metero 10000

Umushinwa Li Wenwen yishimira umudali wa Zahabu mu guterura ibiremereye ku wa 11 Kanama

Sarah Luisa Fahr w'u Butaliyani atera umupira uremereye mu mukino wa Volleyball batsinzemo Amerika amaseti 3-0 ku wa 11 Kanama

Stephen Curry yishimira intsinzi mu mukino batwayemo umudali wa Zahabu ubwo Amerika yatsindaga u Bufaransa amanota 98-87 ku wa 10 Kanama

LeBron James ni umwe mu bafashije Amerika kwegukana umudali wa gatanu wa Zahabu wikurikiranya muri Basketball

Umufaransa Danis Civil "B-Boy Dany Dann" n'Umunya-Canada Philip Kim "B-Boy Phil Wizard" barushanwa mu kubyina 'brake' ku wa 10 Kanama

Mallory Swanson yishimira igitego cyafashije Amerika kwegukana umudali wa Zahabu itsinze Bresil igitego 1-0 ku wa 10 Kanama

Alexis Holmes atambuka umurongo ubwo Amerika yegukanaga umudali wa Zahabu muri 'relaie' ya 4x400m

Marta wa Bresil yasezeye nyuma yo gutsindwa na Leta Zunze Ubumwe za Amerika ku mukino wa nyuma

Lin Yu-ting wa Taiwan yararize nyuma yo gutwara umudali wa Zahabu mu baterura ibifite ibilo biringaniye

Mutaz Essa Barshim wa Qatar, yegukanye umudali w'Umuringa mu gusimbuka mu gihe i Tokyo yari yatwaye Zahabu anganyije na mugenzi we w'Umutaliyani

Jeon Ji-hee wa Koreya y'Epfo agarura umupira mu mukino wa Table Tennis wo guhatanira umudali w'Umuringa

Abakinnyi ba Marathon banyura i Louvre ku wa 10 Kanama

Norvege yegukanye umudali wa Zahabu muri Handball y'Abagore itsinze u Bufaransa ibitego 29-21 ku wa 10 Kanama

Cătălina Axente wa Roumanie, akirana na Kennedy Blades wo muri Amerika mu gukirana. Uyu Munyamerika yegukanye umwanya wa kabiri mu gihe Axente yitaweho n'abaganga kubera kuvunika ijosi

Ukwezi kurasira hejuru y'Umunara wa Eiffel n'urumuri rw'Imikino Olempike ku wa 9 Kanama

Umunya-Canada Rylan Wiens ahatana mu kwibira mu mazi muri metero 10 ku wa 9 Kanama

Sha'Carri Richardson wa Amerika yishimira gutwara umudali wa Zahabu muri relai ya 4x100 ku wa 9 Kanama

Umunya-Algerie Imane Khelif yishimira umudali wa Zahabu yegukanye mu Iteramakofe ku wa 9 Kanama. Muri iyi Mikino, Khelif yibasiwe na benshi bavuga ko ari umugabo wihinduye umugore

Lydia Ko wa Nouvelle-Zelande yashyize uduti twifashishwa muri Golf mu musatsi we

Umunya-Kenya Beatrice Chebet ayoboye abandi muri metero ibihumbi 10 aho yegukanye umudali wa Zahabu nk'uko yabikoze muri metero 5000

Umuyapani Sorato Anraku arushanwa mu kurira aho yegukanye umudali wa Feza

Ikipe ya Espagne ihatanye muri 'Gymnastique rythmique'

Álex Baena wa Espagne yishimira kimwe mu bitego 5-3 batsinze u Bufaransa ku mukino wa nyuma wa ruhago ku wa 9 Kanama

Wang Zilu w'u Bushinwa arushanwa muri 'Gymnastique rythmique' ku wa 9 Kanama

Charokee Young wa Jamaica yiteguye kwakira mugenzi we muri 'relai' ya 4x400 ku wa 9 Kanama

Umufaransa Taky Marie-Divine Kouamé ahatanye mu mukino w'amagare ukinirwa muri stade ku wa 9 Kanama

Manizha Talash uba muri Espagne, wahatanye mu ikipe y'impunzi, yifubitse igitambaro gisaba amahoro muri Afghanistan

Umuyapanikazi yegukanye umudali wa Zahabu mu kubyina

Razambek Zhamalov wo muri Ouzbekstan (ibumoso) akirana na Mahamedkhabib Kadzimahamedau wakinaga ku giti cye, ariko ukomoka mu Burusiya butemerewe kwitabira iyi mikino nk'igihugu nk'uko bimeze kuri Belarus

Sydney McLaughlin-Levrone yambaye ikamba nyuma yo kwegukana umudali wa Zahabu no gushyiraho umuhigo mushya yari afite ku Isi mu kwiruka metero 400 ahantu hagoranye

Abakinnyi b'abagore boga mu Mugezi wa Seine ku wa 8 Kanama. Amazi y'uyu mugezi yagiye aba ikibazo kubera umwanda warimo, amarushanwa amwe akajya yigizwa inyuma

LeBron James yitegura gushyira umupira mu nkangara mu mukino Amerika yatsinzemo Serbie amanota 95-91 muri 1/2

Manizabayo Eric, umwe mu Banyarwanda umunani bitabiriye Imikino Olempike, yishimiwe cyane i Paris ubwo yasiganwaga mu muhanda ku wa 3 Kanama

U Buhinde bwegukanye umudali wa Bronze muri Hockey butsinze Espagne

LeBron James na Stephen Curry bishimira intsinzi ya Leta Zunze Ubumwe za Amerika imbere ya Serbie

Umunyamerika Tara Davis-Woodhall yishimira intsinzi nyuma yo gutwara umudali wa Zahabu mu gusimbuka urukiramende

Umunya-Botswana Letsile Tebogo yishimira intsinzi nyuma yo gutwara umudali muri metero 200 ku wa 8 Kanama

Umunyamerika Noah Lyles aryamye hasi nyuma yo gusiganwa aho yanasanzwemo COVID-19

Umunya-Bulgarie Stiliana Nikolova arushanwa muri 'Gymnastique rythmique'

Umunyamerika Yenny Álvarez ahatanye mu guterura ibiremereye

Umunya-Koreya y'Epfo Seo Chae-hyun yahatanye mu kurira ibikuta ku wa 8 Kanama

Umudage Darja Varfolomeev ni we uyoboye ku Isi muri 'Gymnastique rythmique'

Umunyamerika Raven Saunders utera intosho, yambaye amenyo akoze muri zahabu

Umushinwa Yin Ruoning arushanwa muri Golf ku wa 8 Kanama

Abana ba Amerika bambaye 'masque' z'ibisiga ubwo barebaga umukino wa Volleyball ku wa 8 Kanama

Zaid Abdul Kareem wa Jordanie (ibumoso) ahanganye na Hakan Reçber wa Turikiya muri Taekwondo

Abashinwa Liu Hao na Ji Bowen bishimira intsinzi mu kugashya

Umunyamerika Quincy Hall atsinda muri metero 400 nyuma yo guca ku bandi bakinnyi ku wa 7 Kanama

Umunya-Koreya y'Epfo Kim Sun-woo ahatanye muri Fencing barwanisha inkota

Umunya-Suede Anton Källberg yitegura gutera agapira muri Table Tennis

Abayapanikazi bahatanye muri Artistique ku wa 7 Kanama

Umutaliyani Andrea Fondelli yihanganishwa na bagenzi be nyuma yo gutsindirwa muri 1/4 na Hongrie muri Water Polo

Umuyapani Sorato Anraku yurira igikuta ku wa 7 Kanama

Umunyamerika Abdihamid Nur agwa hasi ubwo abakinnyi bakinaga amajonjora ya metero 5000 ku wa 7 Kanama

Umunya-Suede Jonathan Carlsbogård atera ishoti mu mukino wa Handball wabahuje na Danemark ku wa 7 Kanama

Umunya-Australia Matt Wearn yishimira umudali wa Zahabu mu kugashya

Umuholandi Jeffrey Hoogland asiganwa ku magare mu ikipe ku wa 7 Kanama

Umwe mu bakinnyi ba Amerika ahatanye muri 'Aristique'

Umutaliyani Gianmarco Tamberi (ibumoso) aganira na Mutaz Essa Barshim wa Qatar. Mu Mikino ya Tokyo, bombi banganyije inshuro eshatu, bahabwa umudali wa Zahabu kandi bari bahanganye

Umunya-Vietnam Trịnh Văn Vinh amaze gutsindwa mu guterura ibiremereye ku wa 7 Kanama

Umunya-Espagne María Pérez atwara umudali wa Zahabu ubwo yakinanaga na Álvaro Martín

Umuhinde Sarvesh Anil Kushare asimbuka ku ntera ijya hejuru

Umunya-Australia Minjee Lee ukina Golf, yitwazaga agatabo mu mufuka

Amerika yatwaye umudali wa Zahabu muri 'Skate' nyuma y'uko hari Umurusiya byagaragaye ko yari yafashe ibintu bitemewe bituma yitwara neza bidasanzwe

Umunya-Australia Michelle Jenneke agwa hasi ubwo yari ahanganye na Gréta Kerekes wo muri Hongrie na Cyréna Samba-Mayela wo mu Bufaransa muri metero 100 basimbuka

Umwongereza Andy Macdonald ahatanye muri 'Skating'

Umunyamerika Cole Hocker atwara umudali wa Zahabu muri metero 1500

Umunyamerika Sophia Smith ashimirwa na bagenzi be nyuma yo gutsinda igitego u Budage mu minota 30 y'inyongera. Amerika yarakomeje itwara umudali wa Zahabu

Umunyamerika Gabby Thomas yishimira intsinzi y'umudali wa Zahabu muri metero 200

Umwongereza Sky Brown akina 'Skating' yatwayemo umudali w'Umuringa

Abakinnyi bahatanye mu irushanwa ryasubiwemo muri metero 200 ku wa 6 Kanama

Umwongereza Lina Nielsen aryamye hasi nyuma yo kugwa mu isiganwa rya 1/2

Umubiligi Timothy Herman ahatanye mu gutera umuhunda

Umufaransa Léon Marchand asuhuza abafana. Uyu mukinnyi uhatana mu koga, yatwaye imidali ine ya Zahabu n'uw'Umuringa

Umunya-Algerie Imane Khelif yishimira intsinzi yabonye ku Munya-Thailande Janjaem Suwannapheng muri 1/2 cy'Iteramakofe

Umwe mu bafana ba Amerika afite ibendera ryayo mbere y'umukino w'u Budage mu bagore

Serbie yishimira intsinzi yabonye kuri Australie muri 'overtime' nyuma yo gukuramo amanota 24

Umunya-Suede Henrik von Eckermann yicaye hasi nyuma yo kugushwa n'ifarashi

Umunya-Espagne Elena Ruiz atera umupira ubwo bakinaga na Canada muri Water Polo

Umunya-Australia Mollie O'Callaghan atsinda mwenewabo Ariarne Titmus mu gukura umusomyo muri metero 200

Abakinnyi bareba umupira ujya mu nkangara ubwo Amerika yatsindaga u Buyapani amanota 102-76 ku wa 29 Nyakanga

Umunya-Ukraine Olga Kharlan yishimira umudali w'Umuringa yatwaye mu kurwanisha inkota, wari uwa mbere w'icyo gihugu muri iyi Mikino ku wa 29 Nyakanga

Rafael Nadal mu mukino yatsinzwemo na Novak Djokovic 6-1 6-4 muri Tennis

Umuyapani Reo Inaba arushanwa muri 'Surfing' ku wa 29 Nyakanga

Afurika y'Epfo ikina na Argentine muri Hockey ku wa 29 Nyakanga

Umunyamerika Fred Richard arushanwa kuri 'bars' muri Gymnastique

Umuyapani Yuto Horigome yishimira umudali yegukanye muri Skate

Abashinwa Lian Junjie na Yang Hao begukanye umudali wa Zahabu mu kwibira mu mazi

Umunya-Canada Krissy Scurfield afata Jazmin Felix-Hotham wa Nouvelle-Zelande mu mukino wa Rugby y'Abakina ari barindwi ku wa 28 Nyakanga

Ikibuga cya Beach Volleyball cyari munsi y'Umunara wa Eiffel

Abasuye Umujyi wa Paris bafata amafoto y'urumuri Olempike ubwo izuba ryari rirenze

Umwongereza Andy Murray yishimira intsinzi yabonye ari kumwe na Dan Evans imbere y'Abayapani Taro Daniel na Kei Nishikori muri Tennis

Umunyamerika Torri Huske (ibumoso) atsinda mwenewabo Gretchen Walsh mu koga metero 100 mu gukura umusomyo

Umunyamerika Trinity Rodman asimbuka umuserebeko w'Umudage Alexandra Popp mu mukino Amerika yatsinzemo ibitego 4-1

Abanyamerika Lauren Scruggs na Lee Kiefer bishimira intsinzi babonye muri Fencing

Martha Tembo wa Zambia, yihanganisha mugenzi we Barbra Banda ubwo batsindwaga na Australia ibitego 6-5, nyamara bari bayoboye umukino ku bitego 5-2

Umunya-Canada Celine Dion yaririmbye mu gutangiza Imikino ya Paris ku wa 26 Nyakanga

Ibendera rya St. Kitts & Nevis rigaragara mu madarubindi y'umwe mu bafana

Abakinnyi b'Abafaransa bazunguza amabendera y'igihugu cyabo ubwo habaga akarasisi ko gutangiza Imikino ya Paris ku wa 26 Nyakanga

Ibirori byo gutangiza Imikino byahujwe n'amateka y'Impinduramatwara y'u Bufaransa. Imyotsi yavaga hafi y'idirishya rya Conciergerie aho Umwamikazi Marie Antoinette yarogewe

Bamwe mu batuye i Paris barebeye ibirori bitangiza imikino iwabo muri 'apartement'

Ubwato butambuka hafi ya Cathedrale ya Notre Dame i Paris ahabereye ibirori byo gutangiza Imikino ku Mugezi wa Seine

Ku munsi wo gutangiza Imikino, bamwe bagowe no kugera aho ibirori byabereye kubera ikibazo cy'ingendo cyabaye i Paris

Umuraperi Snoop Dogg ni umwe mu bifashishijwe gutwara urumuri rw'Imikino Olempike

Simone Biles yitoza ku wa 25 Nyakanga. Imikino yarangiye yegukanye imidali ine irimo itatu ya Zahabu

Umuyapani Aoba Fujino yishimira igitego mu mukino batsinzwemo na Espagne ibitego 2-1 ku wa 25 Nyakanga

Umunya-Koreya y'Epfo Lim Si-hyeon ahatanye mu kurashisha umwambi aho yaciye agahigo ku rwego rw'Isi n'amanota 694

Abakinnyi b'u Bufaransa n'aba Leta Zunze Ubumwe za Amerika bitegura gukina umukino wo ku wa 24 Nyakanga

Ukwezi kwafotorewe hagati y'impeta Olempike zari ku Munara wa Eiffel ku wa 23 Nyakanga

Umunya-Australia Molly Picklum yitoreza muri Tahiti ahabereye amarushanwa yo kugendera hejuru y'amazi ku wa 21 Nyakanga

Minisitiri wa Siporo, Amélie Oudéa-Castéra na Thomas Bach uyobora Komite Olempike, bagurutsa inuma i Paris ku wa 19 Nyakanga