Abitabiriye iyi siporo bahuriye mu mihanda isanzwe ikoreshwa ndetse initabirwa n’ingeri zose kuva ku bato kugera ku bakuru.

Bamwe mu bayitabiriye barangajwe imbere na Meya w’Umujyi wa Kigali, Dusengiyumva Samuel, Minisitiri w’Ubutegetsi bw’Igihugu, Musabyimana Jean Claude, Minisitiri wa Siporo, Nyirishema Richard, Minisitiri Ushinzwe Ibikorwa by’Ubutabazi, Maj Gen (Rtd) Albert Murasira, Minisitiri w’Abakozi ba Leta n’Umurimo, Nkulikiyinka Christine, Minisitiri w’Ibidukikije, Dr Uwamariya Valentine.

Amakipe y’abato ya Kiyovu Sports na AS Kigali zisanzwe ziterwa inkunga n’Umujyi wa Kigali nayo yitabiriye iyi siporo.

Nyuma yo kuzenguruka mu mihanda yabugenewe, abitabiriye iyi siporo bahuriye kuri ‘ronds points’ iri kuri Kigali Height bakora siporo.

Ku rundi ruhande abandi baba bakina imikino itandukanye nka Road Tennis n’indi myinshi.

Ubushakashatsi buheruka gukorwa n’impuguke mu kurengera ibidukikije bwerekanye ko umunsi wahariwe siporo rusange (Car Free Day) ikorwa inshuro 26 buri mwaka i Kigali uzafasha mu kugabanya 20% by’ingano y’imyuka ihumanya ikirere mu gihe cy’imyaka itanu uhereye mu 2021 kugeza mu 2025.

Ubu bushakashatsi bukomeza bugaragaza ko muri izo nshuro 26 za siporo rusange, ubuzima bw’abagera ku 100 buzabungabungwa bitewe n’uko hari inshuro zigera kuri 600 bari kuzivuzamo baramutse badakora iyo siporo.

Ibi bizafasha abo baturage kuzigama iminsi 3,300 y’akazi bari kuzasiba bagiye kwivuza indwara zitandura zirimo n’iziterwa n’ihumana ry’ikirere no kudakora imyitozo ngororamubiri.

Ni mu gihe Igihugu cyo kizazigama agera hafi kuri miliyari 160 Frw yari kuzagenda mu bikorwa binyuranye byo kuvuza abantu izo ndwara.

Car Free Day ni siporo rusange yatangijwe muri Gicurasi 2016 igamije gushishikariza abatuye Umujyi wa Kigali umuco wo gukora siporo no kubiborohereza, gushishikariza abaturage kwirinda indwara zitandukanye, aho bahabwa inama bakanapimwa izi ndwara ku buntu. Kuri ubu no mu ntara zindi iyi Siporo irakorwa.

Abayobozi batandukanye bitabiriye iyi siporo isoza Kanama

Minisitiri Ushinzwe Ibikorwa by'Ubutabazi, Maj Gen (Rtd) Albert Murasira ni umwe mu bitabiriye iyo siporo

Nyuma yo kwiruka, abitabirye iyi siporo bahurira kuri Kigali Height bakagorora imitsi

Ababyeyi ntabwo batangwa

Bamwe bajyana amagare abafasha gukora imyitozo

Abakinnyi ba AS Kigali y'abato ni bamwe mu bitabiriye iyi siporo