Bimaze kumenyerwa ko byibuze inshuro ebyiri mu kwezi abatuye mu Mujyi wa Kigali bakora Siporo Rusange mu mihanda yateganyirijwe iki gikorwa nk’uko byagenze kuri iki Cyumweru, tariki ya 24 Ugushyingo 2024.

Iyo siporo iri gukorwa, imihanda imwe n’imwe iba yafunzwe ku bakoresha ibinyabiziga bya moteri igaharirwa abakoresha amaguru, amagare cyangwa ibindi bikoresho byifashishwa muri siporo.

Uko iminsi ishira ni ko imikino ifasha abantu gukora siporo zitandukanye yiyongera, dore ko kuri iyi nshuro hatangijwe undi mushya uzajya ufasha abantu gusiganwa mu modoka mu buryo bw’ikoranabuhanga (E-Sports Simulator).

Indi mikino yateganyijwe irimo iy’amaboko ndetse na siporo ngororamubiri bizwi nka ‘Aerobics’.

Car Free Day ni siporo rusange yatangijwe muri Gicurasi 2016, igamije gushishikariza abatuye Umujyi wa Kigali gukunda gukora siporo bityo bakagira ubuzima bwiza.

Imaze no kuba umwanya w’abana n’ababyeyi ngo babe hamwe, aho benshi bagendana bari ku magare cyangwa bagenda n’amaguru.

Gahunda y’iyi siporo kandi yashyizweho hagamijwe gushishikariza abaturage kwirinda indwara zitandukanye cyane cyane izitandura, aho bahabwa inama bakanazipimwa ku buntu mu gihe runaka.

Umujyi wa Kigali uvuga ko kandi iyi gahunda ya Car Free Day ari n’umwanya wo gukomeza kubungabunga ibidukikije n’ikirere muri rusange no kubungabunga ubuzima cyane ko muri aya masaha imodoka zidakoresha imihanda, imyuka zisohora yangiza ikirere ikagabanuka.

Umuyobozi w'Umujyi wa Kigali, Dusengiyumva Samuel na Minisitiri wa Siporo, Nyirishema Richard, baganuye ku mukino mushya wagejejwe muri Car Free Day

Abanya-Kigali bamaze kumenyera siporo rusange

Umukino wo gutwara imodoka mu buryo bw'ikoranabuhanga buzajya bufasha Abanya-Kigali kuryoherwa na siporo

Umuyobozi w'Umujyi wa Kigali, Dusengiyumva Samuel na Minisitiri wa Siporo, Nyirishema Richard, bifatanyije n'abatuye muri uyu mujyi gukora siporo ya Car Free Day

Abakora siporo bakomeza kubona ibyiza byazo

Ibigo by'amashuri ntibitangwa muri siporo ya Car Free Day

Nubwo bafite ubumuga ntibibabuza gukora siporo

Bamwe bakora siporo bifashishije amagare

Umunyamabanga Uhoraho muri Minisiteri ya Siporo, Nelly Mukazayire, yitabiriye siporo ya Car Free Day

Siporo ikorerwa mu turere twose tw'Umujyi wa Kigali

Ababishoboye bipimisha indwara zitandura binyuze muri siporo ya Car Free Day

Imikino itandukanye imaze kugera muri Car Free Day

Abakinnyi ba Kiyovu Sports ntibatanzwe muri siporo rusange

Bamwe mu bashinzwe umutekano bakorana ishyaka siporo

Hari abahitamo gukora siporo baterura ibiremereye

Amafoto: Umujyi wa Kigali