Abakinnyi bo mu Rwanda bakanguriwe kwizigama bizezwa ubufasha bwa Komite Olempike

Yanditswe na Eric Tony Ukurikiyimfura
Kuya 23 Ugushyingo 2020 saa 01:16
Yasuwe :
0 0

Amahugurwa y’iminsi itatu yahuje abakinnyi bagera ku 105 mu mpera z’icyumweru gishize, yasojwe bashishikarijwe kwibumbira hamwe bagakora imishinga ibafasha kwizigama no kwiteza imbere mu gihe bazaba batagikina.

Ibi ni bimwe mu byagarutsweho mu mahugurwa yabereye ku Kimironko kuva ku wa Kane kugeza ku wa Gatandatu tariki ya 21 Ugushyingo, yahuje abagera ku 105 barimo umukinnyi w’umugabo n’umugore bavaga muri buri shyirahamwe ry’imikino mu Rwanda kongeraho undi muntu uhagarariye iryo shyirahamwe.

Perezida wa Komite Olempike y’u Rwanda, Amb. Munyabagisha Valens, yavuze ko uretse kumurikira abakinnyi komisiyo yabo muri uru rwego no kubamenyesha imikorere n’inshingano zayo, mu zindi ngingo zaganiriweho harimo kubashishikariza kwiteza imbere bashyiraho imishinga ishobora kubafasha nubwo baba batakiri muri siporo.

Ati “Muri gahunda zibaho muri Komite Olempike, nk’uko bahaho gahunda yo gufasha amashyirahamwe y’imikino mu gushaka impano z’abana cyangwa gutegura imikino, hari na gahunda yo gufasha abakinnyi gutegura ejo hazaza habo. Ni gahunda zisanzweho, amashyirahamwe yabo yakabaye abibakangurira kuko ni ho babarizwa.”

“Twabakanguriraga tubabwira ko izo gahunda zihari, ko ariko bigoye ko wabigeraho uri wenyine, mugomba kuba mufite ishyirahamwe. Bashobora kubafasha gutegura umushinga mu gihe bawutanga muri Komite Olempike tukawujyana. Birabafasha kuko utagomba kujya muri siporo utazi icyo uzakora nuyivamo.”

Muri ibi bihe bya Coronavirus, ibarurwa ryakozwe na Minisiteri ya Siporo mu mezi make ashize, ryagaragaje ko abakinnyi basaga 2000 bagowe no kubona ibibatunga mu bihe bya Guma mu Rugo nyuma y’uko iki cyorezo cyibasiye Isi cyateye kidateguje.

Ntagengwa Olivier uyobora Komisiyo y’abakinnyi muri Komite Olempike y’u Rwanda yavuze ko aya mahugurwa yabafashije kunguka byinshi birimo no gutangira gutekereza ku buzima bwa nyuma yo gukina.

Ati “Hari byinshi dukuyemo hano harimo no kwishimira kuba Komisiyo y’abakinnyi yaragiyeho. Hari kandi no kumenya imishinga iduteganyirijwe muri Komite Olempike twari tutazi. Ikindi twahuguriwe uburyo mu gihe dusezeye gukina twaba dufite icyo tugiye gushingiraho mu buzima bwo hanze. Twakuyemo ibintu byinshi bizadufasha mu minsi iri imbere.”

Aya mahugurwa yateguwe na Komite Olempike y’u Rwanda ku bufatanye na Ambasade y’u Budage, yari afite kandi intego yo gutangiza ubukangurambaga bw’iminsi 10 yo kurwanya Coronavirus binyuze muri siporo.

Abakinnyi bagera ku 105 bitabiriye amahugurwa y'iminsi itatu yateguwe na Komite Olempike ku bufatanye na Ambasade y'u Budage mu Rwanda
Visi Perezida wa mbere wa Rayon Sports, Kayisire Jacques wanabaye umukinnyi, ni umwe mu batanze ikiganiro muri aya mahugurwa
Abakinnyi bitabiriye amahugurwa baturutse mu mikino itandukanye
Barimo kandi n'abigeze guhagararira igihugu mu mikino Olempike
Umunyamabanga Mukuru wa Komite Olempike y'u Rwanda, Sharangabo Alex akaba n'Umuyobozi w'Ishyirahamwe ry'abahagarariye u Rwanda mu mikino Olempike
Perezida wa Komite Olempike y'u Rwanda, Amb. Munyabagisha Valens, yavuze ko abakinnyi basabwe kwishyira hamwe bagakora imishinga ku buryo bazafashwa mu gushakirwa inkunga
Ntagengwa Olivier uyobora Komisiyo y’abakinnyi muri Komite Olempike y'u Rwanda
Abitabiriye amahugurwa bafashe ifoto y'urwibutso mu byiciro ubwo bahabwaga impamyabushobozi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .