00:00:00 IGIHE NETWORK KN KINYARWANDA EN ENGLISH FR FRANCAIS

Abafana bakomorewe kureba imikino kuri Stade

Yanditswe na Eric Tony Ukurikiyimfura
Kuya 27 January 2022 saa 06:55
Yasuwe :

Nyuma y’iminsi 39, abafana bongeye gukomorerwa kureba imikino ku bibuga bitandukanye mu Rwanda ni mu gihe bari bakumiriwe mu Ukuboza kubera ubwiyongere bw’ubwandu bwa COVID-19.

Inama y’Abaminisitiri yetaraniye muri Village Urugwiro ku wa 26 Mutarama 2022 iyobowe na Perezida Paul Kagame yemeje ko “Ibikorwa bya siporo y’umuntu ku giti cye n’izikorerwa hanze abantu bategeranye bizakomeza. Abafana bemerewe kureba imikino kuri stade no ku bibuga by’imikino. Amabwiriza arambuye kuri iyi ngingo azatangwa na Minisiteri ya Siporo.”

Mu mpera z’Ukuboza ni bwo abafana bari bongeye gukumirwa ku bibuga mu gihe nta mezi ane yari ashize bemerewe kwitabira amarushanwa y’imbere mu gihugu. Basabwaga kuba barikingije ndetse bafite ibisubizo byo mu masaha 48 bigaragaza ko bipimishije COVID-19.

Iki cyemezo cyafashwe nyuma y’uko umubare w’abandura COVID-19 mu Rwanda wongeye gutumbagira kuva hadutse ubwoko bushya bwayo buzwi nka ‘Omicron’.

Mu ntangiriro z’uku kwezi, Minisitiri w’Ubutegetsi bw’Igihugu, Gatabazi Jean Marie Vianney, yavuze ko impamvu abafana bari bakumiriwe ku bibuga byatewe n’iyaduka ry’ubwoko bwa COVID-19 buzwi nka ‘Omicron’ ndetse bikaba bigoranye gucunga imyitwarire yabo muri Stade.

Yari yijeje ko bazakomeza gukora ubuvugizi ngo bongere gukomorerwa bijyanye n’uko umubare w’abakingiza COVID-19 ukomeje kwiyongera.

Ati “Ibyo byose rero turagenda tubisuzuma n’icyo kibazo cy’abafana batajya ku kibuga kirakomeza gisuzumwe nk’ibindi, uko namwe mubona ko bigenda bikorwa, virusi duhangana na yo, n’umubare munini w’abamaze kwikingiza mu gihugu, icyo na cyo kizaganirwaho kandi abaturage turabumva, ubuyobozi bw’igihugu bwumva ibyifuzo byanyu.”

Ku wa 14 Werurwe 2020 ni bwo abafana bakumiwe ku bibuga bwa mbere nyuma y’uko icyorezo cya COVID-19 cyari kimaze kugera mu Rwanda.

Nyuma y’amezi 17, muri Kanama 2021, bemerewe gusubira ku bibuga hubahirizwa imibare yagenwe, bemererwa kwitabira amarushanwa y’imbere mu gihugu aho basabwaga kuba barikingije ndetse bipimishije COVID-19.

Ibyishimo byabo barebera imikino ku bibuga ntibyarambye kuko ku wa 19 Ukuboza 2021 hashyizweho amabwiriza mashya abakumira nyuma y’uko hadutse ubwoko bushya bwa COVID-19 “Omicron” bwatumye ubwandu bwongera kuzamuka mu gihugu.

Kuri ubu, abafana bongeye kwemererwa kujya ku bibuga mu gihe amarushanwa menshi y’imikino itandukanye yongeye gusubukurwa, aho mu ntangiriro z’uyu mwaka yahagaze iminsi igera ku 10 kubera icyorezo cya COVID-19.

Shampiyona y’Umupira w’Amaguru mu Rwanda izinjira mu mikino yo kwishyura tariki ya 12 Gashyantare mu gihe igice kibanza cyayo kizasozwa mu mpera z’uku kwezi.

Muri Basketball, mu mpera z’iki cyumweru ni bwo hatangira irushanwa ribanziriza Shampiyona mu gihe muri Volleyball hakomeje kuba irushanwa rya “Forzza Volleyball Tournament 2021” risigaje ibice bibiri.

Hasigaye kandi iminsi itageze kuri 25 kugira ngo mu Rwanda hatangire irushanwa ry’Amagare rizenguruka igihugu “Tour du Rwnada 2022” rizaba hagati ya tariki ya 20 n’iya 27 Gashyantare.

Bamwe mu bafana bitabiriye umukino wahuje APR FC na Rayon Sports i Nyamirambo ku wa 23 Ugushyingo 2021

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .