Uwizeyimana Bonaventure yabaye uwa kabiri mu gace ka mbere ka Tour du Cameroun

Yanditswe na Eric Tony Ukurikiyimfura
Kuya 2 Kamena 2019 saa 10:48
Yasuwe :
0 0

Uwizeyimana Bonaventure wegukanye irushanwa riheruka rya Tour du Cameroun, yabaye uwa kabiri mu gace ka mbere k’iri rushanwa riri kuba ku nshuro ya 16 muri uyu mwaka, asizwe na Stephan Bakker ukinira Global Cycling Team.

Iri siganwa riri ku rwego rwa 2.2 ryitabiiriwe n’amakipe icyenda muri uyu mwaka, aho ikipe y’u Rwanda ifite iriheruka inahabwa amahirwe yo kongera kuryegukana.

Kuri uyu wa Gatandatu abasiganwa bakoze intera y’ibilometero 136, bahagarukira ahitwa Akonolinga basoreza ahitwa Abong Mbang. Umuholandi Stephan Bakker wa Global Cycling Team yahakoresheje amasaha atatu, iminota 19 n’amasegonda atatu, aza imbere ya Uwizeyimana Bonaventure bakoresheje ibihe bimwe.

Undi munyarwanda waje hafi ni Manizabayo Eric ‘Karadiyo wabaye uwa 22 nyuma yo gusigwa amasegonda icyenda n’uwa mbere, Mugisha Moïse banganyije ibihe aba uwa 24 mu gihe Patrick Byukusenge na Nzafashwanayo Jean Claude baje ku mwanya wa 27 n’uwa 29 basizwe amasegonda 11 n’uwa mbere.

Ruberwa Jean yabaye uwa 36 nyuma yo gusigwa amasegonda 20 muri ri siganwa ryasojwe n’abakinnyi 51 mu gace karyo ka mbere.

Kuri iki Cyumweru abasiganwa barakina agace ka kabiri, aho bahaguruka i Yaoundé berekeza Nanga Eboko ku ntera y’ibilometero 164, kamwe mu duce tubiri tureture muri iri siganwa rizenguruka Cameroun.

Umuholandi Stephan Bakker yegukanye agace ka mbere ka Tour du Cameroun 2019

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza