Uwizeye Jean Claude yegukanye Tour de Guyane 2019

Yanditswe na Eric Tony Ukurikiyimfura
Kuya 26 Kanama 2019 saa 09:30
Yasuwe :
0 0

Umunyarwanda Uwizeye Jean Claude ukinira Sables Vendée yo mu Bufaransa yegukanye isiganwa rya Tour de Guyane 2019, ryabaga ku nshuro ya 30 rikinirwa muri iki kirwa cy’u Bufaransa.

Tour de Guyane 2019 yasojwe ku Cyumweru, tariki ya 25 Kanama 2019, hakinwa agace ka cyenda, aho abasiganwa bahagurutse ahitwa Kourou bagaca Matoury berekeza mu Mujyi wa Cayenne ku ntera y’ibilometero 142.

Aka gace ka nyuma kegukanywe n’umukinnyi w’Ikipe y’u Bwongereza, Keller Hermann wakoresheje amasaha atatu, iminota 16 n’amasegonda 39 mu gihe Umunyarwanda Uwizeye Jean Claude yabaye uwa 23 ariko banganya ibihe.

Uwizeye wambaye umwambaro w’umuhondo nyuma y’umunsi wa mbere, akaza kuwisubiza nyuma y’umunsi wa karindwi w’isiganwa, ku wa Gatanu, yagerageje kuwurinda muri utu duce tubiri dusoza.

Isiganwa ryarangiye ari we uryegukanye nyuma yo gukoresha amasaha 28, iminota 50 n’amasegonda 15 ku ntera y’ibilometero 1275 basiganwe mu duce icyenda bakoze.

Lutin Larry ukinira Guadeloupe ni we wabaye uwa kabiri, aho yarushwaga amasegonda 29 na Uwizeye Jean Claude wegukanye Tour de Guyane 2019.

Uwizeye yavuze ko yashimishijwe no kwegukana iri rushanwa, ashimira bagenzi be bamufashije kugumana umwambaro w’umuhondo.

Ati ”Ntwaye isiganwa rya mbere, ndashimira bagenzi banjye barankoreye nk’ikipe. Isiganwa ntabwo ryari ryoroshye, nishimiye kuba nkinira iyi kipe.”

Uwizeye Jean Claude yavukiye mu Karere ka Rwamagana muri Mutarama 1994, atangira gukina umukino wo gusiganwa ku magare mu 2010 muri Les Amis Sportifs y’i Rwamagana iterwa inkunga na Banki y’Ubucuruzi ya Cogebanque.

Yerekeje mu Bufaransa mu mwaka ushize muri POC Côte de Lumière yahindutse Sables Vendée.

Yasoje Tour du Rwanda ya 2018 ku mwanya wa kabiri, arushwa amasegonda 21 na Mugisha Samuel wegukanye isiganwa.

Uwizeye Jean Claude yegukanye Tour de Guyane 2019

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza