Urujijo ku mpano y’amagare ya siporo ashaje yahawe Komite Olempike y’u Rwanda

Yanditswe na Eric Tony Ukurikiyimfura
Kuya 23 Ukwakira 2019 saa 09:23
Yasuwe :
0 0

Biragoye kwiyumvisha uburyo mu 2019 mu Rwanda hashobora kwinjira amagare ashaje byitwa ko agiye kwifashishwa mu iterambere ry’uyu mukino. Ni mu gihe hagiye gushira imyaka itatu u Rwanda ruciye ikoreshwa ry’imyenda, inkweto n’ibindi bishaje bizwi nka caguwa ahubwo rukimakaza gukoresha ibikiri bizima biruhesha agaciro, yewe n’imodoka zakoze zigenda zikumirwa buhoro buhoro.

Ubusanzwe abahanga basobanura ko siporo ari ubuzima ku wayikoze, ikaba n’imari isoko y’ubukire ku bayishoyemo imari cyangwa abayikora by’umwuga.

Ibi ntibyagiye kure abanyarwanda kuko bamaze iminsi bakangurirwa gufata siporo nk’umwuga ushobora kugira icyo winjiriza igihugu n’iterambere ry’umuntu ku giti cye.

Umukino w’amagare ni umwe mu imaze kwigarurira imitima y’abanyarwanda kubera uburyo umaze gutera imbere, bikanakubitana n’ingufu zashyizwemo n’ubuyobozi uhereye ku Mukuru w’Igihugu wanatanze amagare agezweho asigaye afasha abasore n’inkumi kwegukana imidali.

Gusa mu minsi yashize, Komite Olempike y’u Rwanda yakiriye amagare 40 bivugwa ko yatanzwe n’Umuryango wo muri Amerika wiyemeje gufatanya n’uru rwego rureberera iza siporo mu gihugu mu iterambere ry’uyu mukino mu Rwanda.

Uyu mushinga ngo ufite gahunda yo gukorana n’amakipe yo mu Rwanda ndetse umwaka utaha hari andi amagare menshi ashobora kohereza mu gihugu.

Aya magare ari mu byiciro bibiri aho harimo ay’abakuru ndetse n’ay’abakiri bato, yashyizwe mu bubiko bw’inzu y’imikino ya Komite Paralempike y’u Rwanda (NPC) iri i Remera.

Igitekerezo cyo kuzana aya magare ni kimwe muri byiza buri wese yashyigikira, gusa 40 yageze mu Rwanda ku ikubitiro yatumye bamwe bibaza niba caguwa yemewe mu bindi bikoresho.

Uyitegereje ubona ko ari amagare yakoreshejwe igihe kitari gito ku buryo ashaje mu buryo bugaragarira buri wese. Amwe muri aya yacitse amaboko, andi nti afite intebe n’az’ifite zarashaje ku buryo bugaragarira buri wese, andi nti afite ibyifashishwa mu kunyonga n’ibindi.

Umwe mu baganiriye na IGIHE wabashije kubona aya magare, yagaragaje impungenge z’uburyo aya magare yinjiye mu gihugu ashaje, icyo yagereranyije no gusuzugura gahunda ziba zaremejwe.

Ati “Ibi ni ibisazirwa, ni ugutesha agaciro igihugu kwakira ibintu nk’ibi.”

Abishingira ku magambo ya Perezida Kagame ubwo yatangizaga ibikorwa by’ikigo cy’uruganda ruteranya imodoka rwa Volkswagen mu Rwanda muri Kamena umwaka ushize, ko umugabane wa Afurika udakeneye gukomeza kuba ikimoteri cy’izishaje, yongera ko u Rwanda rukwiye ibyiza.

Ati” Afurika ntikeneye kuba ikimoteri cy’imodoka zishaje cyangwa ikindi kintu cyakoreshejwe [...] Afurika n’u Rwanda bakwiye ibyiza kandi ubu ni bumwe mu buryo bwo kwerekana ko bashobora kubigura.”

Visi Perezida wa kabiri wa Komite Olempike y’u Rwanda, Bizimana Festus, wakurikiranye izanwa ry’aya magare, yabwiye IGIHE ko ari impano bahawe na Donation Charity wo muri Leta zunze Ubumwe za Amerika.

Ati “Ni amagare azahabwa abakora umukino w’amagare cyane abana. Ni amagare ya siporo avangavanze, abana bigiraho kuva ku myaka 14 kugeza ku myaka 18. Ni impano yahawe Komite Olempike yaturutse mu muryango wo muri Amerika. Ni ubwa mbere dutangiye gukora na wo, wari usanzwe ukorana n’ibindi bihugu byo muri Afurika.”

Bizimana yemera ko koko ari amagare bahawe babona ko ashaje ariko batari kuyanga kubera ko ari impano ndetse babona hari icyo azafasha.

Ati “Arashaje ntabwo ari mashya. Ubuse amagare yose yinjira mu gihugu aba ari mashya? Amagare yigirwaho ni amashya gusa? Amagare niba yaje ashaje, hari ubwo yagurishijwe? Ni impano izahabwa abana biga gukina umukino w’amagare. Uyu munsi barimo barayateranya, niba ari amagare 40 ashobora kuvamo amagare 30.”

Bizimana wabaye Umuyobozi wungirije muri FERWACY, yabwiye IGIHE ko aya magare azashyikirizwa Ishyirahamwe ry’Umukino w’amagare mu Rwanda kugira ngo na ryo riyatange ku bashinzwe gutoza abana bakina uyu mukino.

Uyu muyobozi ngo abona nta mpamvu yo kwibaza igihe aya magare yamara nubwo ashaje kuko hari andi bazagenerwa n’uyu muryango wo muri Amerika mu minsi iri imbere.

Ati “Nashaka amare umwaka umwe kuko yazaniwe gufasha abana kwiga uyu mukino mu kuzamura impano. Amagare ava muri Amerika cyangwa i Burayi aba yarakoreshejwe. Iyo uguze amagare mashya aba ari amagare ajya mu marushanwa kandi ariya si aya amarushanwa, ni ayo kwigiraho.”

FERWACY ntiteganya kwakira aya magare

Perezida wa Ferwacy, Aimable Bayingana, we yabwiye IGIHE ko ayo magare atarayabona, gusa ko yigeze kubwirwa n’Umuyobozi wa Komite Olempike, ko hari inkunga bateganya kubagenera y’amagare 40.

Yavuze ko kugira ngo agire icyo ayavugaho ari uko yabanza kujya kuyareba cyangwa se akerekwa uko ameze.

Umunyamakuru wa IGIHE yamweretse ifoto y’ayo magare, nyuma avuga ko niba ari uko ameze atakoreshwa mu mukino w’amagare.

Ati “Twe amagare dukoresha hari ibyo aba agomba kuba yujuje, mu gihe atabyujuje ntabwo tuyakira. Twe dukora siporo y’amagare, ayo twemera ni ayo tubona ko ashobora gukora umukino w’amagare ku buryo atateza ikibazo uyakoresha kandi akamufasha kugira ubumenyi.”

Abajijwe niba amagare yose akoreshwa mu mukino w’amagare aba ari mashya, ayakoze bakira ntaho ahuriye n’ayo yabonye ku ifoto.

Ati“ Ayakoze nayo twayakoresha ariko twabanje kuyasuzuma, gusa ariya yo ntabwo mbona ko twayakoresha.”

Bayingana yavuze ko Ferwacy idashora kwanga inkunga, ariko ko inkunga zose zitangwa zigira uburyo zitangwamo, atanga urugero ku yo bigeze guhabwa na Ambasade y’u Bushinwa.

Ati “ Inkunga turayakira ariko agomba kuba afite uko ameze. N’amagare asanzwe twayakira. Nka Ambasade y’Abashinwa yaduhaye kontineri y’amagare mashya, aho tugiye mu marushanwa abaturage bagapiganwa, tukayabaha nk’ibihembo, ariko ntiwafata ikintu gishaje ngo abe aricyo utanga.”

Bizimana yatangaje ko Komite Olempike y’u Rwanda yatanze umusoro ungana n’ibihumbi 420 Frw n’ibindi bihumbi 59 Frw byahawe abafasha mu kumenyekanisha umusoro kuri aya magare ubwo yavaga muri Tanzania.

Gusa ku rundi ruhande, hari amakuru IGIHE yabonye ko amafaranga yose yayatanzweho agera kuri miliyoni n’igice y’u Rwanda.

Twagerageje kuvugisha RRA kugira ngo tumenye uburyo aya magare yaba yarinjiye mu gihugu n’ingano y’amafaranga yishyuwe nk’umusoro maze Komiseri Ushinzwe Abasora mu Kigo cy’Imisoro n’Amahoro mu Rwanda (Rwanda Revenue Authority), Mukashyaka Drocelle avuga ko bo icyo bakora ari ukureba igiciro cy’ikigiye kwinjira, n’ingano y’umusoro hanyuma akishyurwa.

Aya magare uko ari 40 arunze muri salle ikinirwamo imikino y'abafite ubumuga, arashaje ku buryo bugaragarira amaso
Aya magare ni igice cy'ayagombaga gutangwa muri Tanzania, uyu muryango wo muri Amerika uhitamo kuyahamo impano Komite Olempike y'u Rwanda
Ni amagare arimo ay'abakuru n'andi y'abakiri bato mu byiciro by'imyaka itandukanye
Amwe muri aya magare yacitse amaboko ku buryo bisaba ko abanza gukoreshwa
Amwe muri aya magare aheruka kugezwa mu Rwanda nti afite ibyifashishwa mu kunyonga ndetse n'intebe zayo zirashaje bigaragara
Ni amagare ubona ko yari amaze igihe kinini akoreshwa akoherezwa mu Rwanda ngo ajye kuhasazira
Amwe muri yo ntagifite ibyifashishwa mu kunyonga, hari uwabwiye IGIHE ko abayakiriye bibagiwe icyerekezo cy'u Rwanda
Bamwe ntibiyumvisha uburyo amagare ashaje gutya yinjiye mu Rwanda nyamara haramaganwe ikoreshwa ry'ibintu bishaje bituruka hanze bizwi nka caguwa
Intebe z'amagare menshi muri aya zirashaje
Aya magare afungiranye mu nzu y'imikino ya NPC i Remera
Hari ayacitse amaboko ku buryo wakwibaza impamvu yazanwe mu Rwanda ameze gutya
Ntibisaba kwitegereza cyane kugira ngo ubona ko aya magare ashaje
Ni amagare biteganyijwe ko azatangwa muri FERWACY kugira ngo ahabwe abana mu rwego rwo kubafasha kuzamura impano zabo muri uyu mukino gusa Ferwacy yo ntiyakozwa
Hari ayacitse ku buryo bigoye ko hari icyo azakoreshwa
Yakikijwe ameza yifashishwa mu mukino wa Table Tennis kugira ngo atabonwa n'ubonetse wese
Urebeye hasi nibwo ubona aya magare aheruka kuzanwa mu Rwanda aho arunze

Amafoto: Uwihanganye Hardi


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza