Ni irushanwa ryari ribereye kuri iki kibuga ku nshuro ya gatatu nyuma y’iryo muri Gashyantare na Mata. Ryitabiriwe n’ibyiciro bitanu birimo kuva ku bari munsi y’imyaka 10 kugeza ku bari munsi y’imyaka 19 mu bahungu n’abakobwa.

Tuyipfukamire Faustin wakinaga ku giti cye yaryegukanye mu bahungu batarengeje imyaka 19 akoresheje imonota 59 n’amasegonda 13, ahigika abarimo Shema Jospin wa Muhazi Cycling Federation na Niyonkuru Yassin wa Les Amis Sportifs. Muri iki cyiciro, hashoje abahungu 14 muri 16 baritangiye.

Mu bakobwa, hatsinze Umutoni Sandrine wa Bugesera Cycling Club wakoresheje iminota 58 n’amasegonda 43, Iragena Charlotte wa Ndabaga Women Cycling Team, arushwa iminota itandatu.

Mu batarengeje imyaka 17 hitabiriye abahungu 18 barimo babiri batarishoje n’abakobwa 14 barimo umwe utagize amahirwe yo kurisoza, Masengesho Yvonne wa Ndabaga WCT na Gisubizo Issa wa Les Amis Sportifs bongera gutsinda nk’uko babigenje i Musanze .

Mu batengeje imyaka 15, hari hitabiriye abakobwa barindwi barimo umwe utarishoje n’abahungu 18, hatsinda Liza Jovahire na Intwari Reponse wa Cine Elmay.

Mu batarengeje imyaka 13 hatsinze Sano Francis wa Muhazi Cycling Generation nyuma yo gusiga abandi bahungu 17 mu gihe Umwamikazi Joy Cynthia wa Benediction Cycling Team yahigitse abandi bakobwa batanu bakinanye muri iki cyiciro.

Mu cyiciro cy’abari munsi y’imyaka 10 hatsinze Uwamahoro Françoise na Zaneti David wa Les Amis Sportifs.

Iyi Shampiyona y’Abakiri Bato yatangijwe n’Ishyirahamwe ry’Umukino w’Amagare mu Rwanda (FERWACY) mu gutegura Shampiyona y’Isi izabera i Kigali mu 2025 no kuzamura impano z’abakinnyi bakiri mu myaka yo hasi ku buryo bazagenda bakurikiranwa.

Buri uko abakinnyi bitabiriye, bahabwa amanota kugira ngo abagaragaza impano babashe gukurikiranwa.

Irushanwa ritaha riteganyijwe muri Nzeri, i Rwamagana mu gihe i Bugesera bazahasubira mu Ukwakira 2024.

Umwamikazi Joy Cynthia amaze kwegukana amasiganwa menshi muri Youth Racing Cup 2024

U Rwanda ruzakira Shampiyona y'Isi mu magare rufite abana batyaye mu mukino

Sano Francis ni umwe mu bana bakomeje kwerekana ko bafite impano idasanzwe yo gusiganwa ku magare

David Zanetti yitwaye neza ku munsi wa Munani wa Youth Racing Cup 2024

Liza Jovahire ni umwe mu bana bitwaye neza

Intwari Reponse yahigitse bagenzi be mu batarengeje imyaka 15

Gisubizo Issa amaze gusobanukirwa amayeri yo gutsinda irushanwa muri Youth Racing Cup

Masengesho Yvonne ni umwe mu bakobwa bagaragaza ejo heza mu mukino wo gusiganwa ku magare

Irushanwa rya Youth Racing Cup rimaze kuzamura urwego

Abana b'abakobwa bahabwa umwanya wo kwerekana impano

Youth Racing Cup yitabirwa n'abana bo mu byiciro bitanu batarengeje imyaka 19

Youth Racing Cup yakiniwe mu Bugeserera