Tour du Rwanda 2021 izitabirwa n’abafana

Yanditswe na Eric Tony Ukurikiyimfura
Kuya 31 Werurwe 2021 saa 12:42
Yasuwe :
0 0

Irushanwa ryo gusiganwa ku magare rizenguruka Igihugu ‘Tour du Rwanda’ rizaba hagati ya tariki ya 2 n’iya 9 Gicurasi 2021 rizitabirwa n’abafana hubahirizwa ingamba zo kwirinda ikwirakwira ry’icyorezo cya COVID-19.

Tour du Rwanda 2021 igiye kuba ku nshuro ya 13 kuva ibaye mpuzamahanga, yagombaga kuba hagati ya tariki ya 21 n’iya 28 Gashyantare, ariko yumirirwa muri Gicurasi kubera COVID-19.

Amakuru IGIHE yamenye ni uko iri rushanwa riherutse kwemerezwa mu Nama y’Abaminisitiri yabaye ku wa 15 Werurwe 2021, rizitabirwa n’abafana.

Gusa, abashinzwe kuritegura bamenyesheje abafatanyabikorwa babo ko hari ingamba zizakurikizwa zirimo kwambara udupfukamunwa, intera byibuze ya metero imwe hagati y’umuntu n’undi, gusukura intoki hakoreshejwe isabune n’imiti yabigenewe no kugena ahantu hihariye hazaba ah’abakinnyi haba aho basoreza n’aho bazajya bahagurukira.

U Rwanda ruri mu bihugu byafashe iya mbere mu gikingira abaturage babyo icyorezo cya COVID-19, aho kuva ku wa 5 Werurwe, abamaze guhabwa dose ya mbere basaga ibihumbi 340 barimo abakinnyi b’Ikipe y’Igihugu izitabira Tour du Rwanda 2021.

Mu kiganiro n’abanyamakuru cyabaye ku wa Kabiri tariki ya 30 Werurwe, Minisitiri w’Ubuzima, Dr Ngamije Daniel, yatangaje ko hamaze kugurwa izindi nkingo ibihumbi 500 za AstraZeneca zitezweho kuzifashishwa mu cyiciro cya kabiri cyo gukingira abafite ibyago byo kwandura kurusha abandi.

Umunya-Érythrée Natnael Tesfazion ni we wegukanye Tour du Rwanda 2020, yabaye hagati ya tariki ya 23 Gashyantare n’iya 1 Werurwe, akurikirwa n’Umunyarwanda Mugisha Moïse ukinira SACA.

Tour du Rwanda 2021 izitabirwa n’amakipe 16, ariko kugeza ubu hamaze kumenyekana 15 arimo Israel Start-Up Nation yitabira amasiganwa akomeye ku rwego rw’Isi ndetse ikaba ifite abakinnyi bazwi nka Chris Froome watwaye Tour de France inshuro enye, Darly Impey na Andre Greipel.

Mu baterankunga b’irushanwa ry’uyu mwaka harimo Cogebanque, uruganda rw’ibinyobwa rwa Skol, Minisiteri ya Siporo, Rwanda Tea, Visit Rwanda, Canal +, Polisi y’Igihugu n’abandi.

Bitandukanye no mu mwaka ushize aho umwambaro w’umuhondo watanzwe na Rwanda Tea, muri uyu mwaka uzatangwa na Visit Rwanda ubushize yambikaga umukinnyi urusha abandi guhatana mu isiganwa.

Inzira za Tour du Rwanda 2021

  • Agace ka mbere: Tariki ya 2 Gicurasi: Kigali Arena- Rwamagana (ibilometero 115,6)
  • Agace ka kabiri: Tariki ya 3 Gicurasi: Kigali- Huye (ibilometero 120.5)
  • Agace ka gatatu: Tariki ya 4 Gicurasi: Nyanza- Gicumbi (ibilometero 171,6)
  • Agace ka kane: Tariki ya 5 Gicurasi: Kimironko - Musanze (ibilometero 123,9)
  • Agace ka gatanu: Tariki ya 6 Gicurasi: Nyagatare- Kimironko (ibilometero 149,3)
  • Agace ka gatandatu: Tariki ya 7 Gicurasi: Kigali (KBC)- Kigali (Mont Kigali) (ibilometero 152.6)
  • Agace ka karindwi: Tariki ya 8 Gicurasi:Kigali (Nyamirambo)- Mont Kigali ( ITT- ibilometero 4.5)
  • Agace ka munani: Tariki ya 9 Gicurasi: Kigali (Canal Olympia)- Kigali (Canal Olympia) (ibilometero 75,3)
Nubwo izaba mu bihe bya COVID-19, Tour du Rwanda 2021 izitabirwa n'abafana hubahirizwa amabwiriza yo kwirinda icyo cyorezo
Mu 2020, abatari bake bagiye ku mihanda ya Nyabugogo bareba irushanwa rya Tour du Rwanda
Amakipe 16 ategerejwe muri Tour du Rwanda 2021

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .