Tour du Faso: Mugisha Moïse yatakaje umwenda w’umuhondo, icyizere cya Team Rwanda kiragabanuka

Yanditswe na Eric Tony Ukurikiyimfura
Kuya 31 Ukwakira 2019 saa 05:56
Yasuwe :
0 0

Amahirwe yo kuba ikipe y’u Rwanda yakwegukana Tour du Faso y’uyu mwaka yagabanutse nyuma y’uko Umunyarwanda Mugisha Moïse yamaze kwamburwa umwambaro w’umuhondo nyuma yo gusigwa iminota itatu n’amasegonda icyenda ku rutonde rusange.

Isiganwa rizenguruka Burkina Faso ryakomeje kuri uyu wa Kane hakinwa agace ka karindwi, aho abakinnyi bahagurukiye ahitwa Dedougou berekeza Bobo Dioulaso ku ntera y’ibilometero 182.5, aka akaba ari ko gace karekare mu irushanwa ry’uyu mwaka.

Wabaye umunsi mubi ku ikipe y’u Rwanda yatakaje umwenda w’umuhondo ndetse igasigwa ibihe byinshi muri aka gace ka karindwi.

Umusuwisi Döring Jonas wa Meuble decarte, wakoresheje amasaha ane, iminota 17 n’amasegonda 15 ni we wegukanye aka gace, akurikirwa n’Umunya-Angola, Araújo Bruno, bakoresheje ibihe bimwe.

Mugisha Samuel niwe Munyarwanda warangije hafi ku mwanya wa munani, asizwe iminota itatu n’amasegonda 44, ari mu gikundi cyarimo abandi Banyarwanda nka Mugisha Moïse (32), Nzafashwanayo Jean Claude (26) na Hakizimana Seth (29).

Uwizeye Jean Claude yabaye uwa 56 asizwe iminota ine n’amasegonda atandatu mu gihe Munyaneza Didier yatakaje ibihe byinshi asoza ari ku mwanya wa 75, yasizwe iminota 20 n’amasegonda 40.

Umunya-Angola Dario Manuel Antonio wa Bai Sicasal Petro de Luanda ni we wahise yambara umwenda w’umuhondo, aho amaze gukoresha amasaha 18, iminota 59 n’amasegonda 58 ku rutonde rusange nyuma y’uduce turindwi tumaze gukinwa.

Akurikiwe na mugenzi we bakinana, Araújo Bruno, amurusha amasegonda 20 mu gihe Mugisha Moïse yageze ku mwanya wa gatanu, arushwa iminota itatu n’amasegonda icyenda.

Undi munyarwanda uza hafi ni Nzafashwanayo Jean Claude wa 11, kuri ubu urushwa iminota itatu n’amasegonda 54 mu gihe Mugisha Samuel ari ku mwanya wa 15, arushwa iminota itatu n’amasegonda 59.

Isiganwa rirakomeza kuri uyu wa Gatanu hakinwa agace ka munani, aho abakinnyi bazahagurukira Bobo Dioulaso berekeza Sindou ku ntera y’ibilometero 137.5.

Tour du Faso iri kuba ku nshuro ya 32, aho yitabiriwe n’amakipe 15, izasozwa tariki ya 3 Ugushyingo 2019.

Mugisha Moïse yatakaje umwenda w'umuhondo muri Tour du Faso, asigwa iminota isaga itatu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza