Tour de l’Espoir: Umunya-Érythrée yegukanye agace ka gatatu, Manizabayo aba uwa 12

Yanditswe na Ngabo Roben
Kuya 6 Gashyantare 2019 saa 08:29
Yasuwe :
0 0

Agace ka gatatu k’isiganwa ry’amakipe y’abatarengeje imyaka 23 Tour de l’Espoir, riri kubera muri Cameroun kegukanywe na Yacob Debesay ukomoka muri Érythrée, abanyarwanda bongera kudahirwa kuko uwaje hafi ari Eric Manizabayo waje ku mwanya wa 12.

Kuri uyu wa Gatatu abasiganwa 92 bavuye mu makipe 20 yaturutse muri Afurika, Aziya na Amerika y’Amajyepfo, basiganwe mu gace ka gatatu kahagurutse i Nkongsamba gasoreza mu i Dschang. Ni ku ntera y’ibilometero 68.3.

Ikipe y’igihugu ya Érythrée n’iya Portugal ziri kugaragaza urwego rwo hejuru n’imyiteguro myiza, zayoboye isiganwa zikoresha imbaraga ku buryo abagerageje gucomoka mu gikundi bose barimo; Hakiruwizeye Samuel w’umunyarwanda bagendaga babafata nta nkomyi.

Yacob Debesay wavutse mu 1999 niwe wageze ku murongo ari uwa mbere akoresheje 1h41’37”. Yakurikiwe na Quinteros Alexis Benjamin na Montenegro Santiago, bakomoka muri Équateur.

Manizabayo Eric bita Karadiyo niwe munyarwanda waje hafi ku mwanya wa 12 asigwa umunota n’amasegonda 12 na Yacob Debesay waje imbere.

Nkurunziza Yves we yaje ku mwanya wa 22, Ruberwa Jean Damascene aba uwa 30, akurikirwa na Hakiruwizeye Samuel waje ku mwanya wa 33 naho Nzafashwanayo Jean Claude aba uwa 45.

Nyuma yo gutsinda agace k’uyu munsi Yacob Debesay yahise ajya no ku mwanya wa mbere ku rutonde rusange, aho amaze gukoresha 4h15’20”.

Umunyarwanda uza hafi ku rutonde rusange ni Eric Manizabayo uri ku mwanya wa 18 umaze usigwa iminota ine yose n’amasegonda 23, bituma icyizere cyo kwegukana igihembo icyo aricyo cyose muri iri siganwa kiba gike.

Kuri uyu wa Kane ni ikiruhuko, abasiganwa bazasubira mu muhanda kuwa Gatanu tariki 8 Gashyantare 2019 ubwo bazahaguruka i Ngoulemakong bagana mu murwa mukuru wa Cameroun, i Yaoundé ku ntera y’Ibilometero 111.1.

Debesay afite amahirwe yo kwegukana isiganwa ryari rifitwe na Areruya Joseph
Yacob Debesay yegukanye agace ka gatatu ahita ahabwa n'umwenda w'umuhondo
Eric Manizabayo bita Karadiyo niwe munyarwanda uza hafi ku rutonde rusange, ku mwanya wa 18, agasigwa iminota irenga ine n'uwa mbere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza