Team Rwanda yasesekaye i Kigali nyuma yo kwegukana Grand Prix Chantal Biya

Yanditswe na Eric Tony Ukurikiyimfura
Kuya 24 Ugushyingo 2020 saa 12:47
Yasuwe :
0 0

Ikipe y’u Rwanda y’Amagare yageze i Kigali ikubutse muri Cameroun gukina isiganwa rya Grand Prix Chantal Biya ryegukanywe na Mugisha Moïse ku Cyumweru.

Team Rwanda yageze ku Kibuga Mpuzamahanga cy’Indege cya Kigali kuri uyu wa Mbere saa Tatu n’igice z’ijoro irangajwe imbere na Visi Perezida wa Kabiri ushinzwe amarushanwa muri FERWACY, Nkuranga Alphonse, wari wagiye ayoboye itsinda.

Hamwe n’umutoza Sempoma Félix, abakinnyi batandatu bagize Team Rwanda batahanye ibihembo bine.

Uretse igihembo gikuru mu isiganwa, Team Rwanda yatahukanye kandi igihembo cy’umukinnyi ukiri muto cyahawe Mugisha Moïse, icya Mugisha Samuel wabaye umukinnyi wahize abandi mu kuzamuka imisozi ndetse n’icy’ikipe yahize izindi zitabiriye isiganwa.

Aganira n’itangazamakuru Mugisha Moïse yavuze ko byari urugendo rutoroshye, ariko yafashijwe na bagenzi be barimo Mugisha Samuel.

Ati “Ku munsi wa mbere nagiye nganira na Mugisha tureba uko twakina isiganwa rikaduhira ku bw’amahirwe tubona twegukanye agace ka mbere, twegukana umwenda w’umuhondo. Nta bwoba nari mfite kuko nari mfite Mugisha, agace ka kane ndagakesha Mugisha.”

Mugisha Samuel wari uyoboye bagenzi be muri Cameroun, yavuze ko isiganwa ryagenze neza kuko bageze ku ntego bari bihaye mbere yo kuhaguruka i Kigali.

Ati “Isiganwa ryagenze neza kuko intego twari dufite twayigezeho kuko mbere yo guhaguruka i Kigali twumvaga dushaka gutsinda, nkumva rero iyo wapanze ibintu bikagerwaho ni ibintu by’agaciro kandi bikwiye kwishimirwa.”

Ikipe y’u Rwanda yahise ijya mu kato muri Hoteli ya Sainte-Famille, aho izamara umunsi umwe mu gihe igitegereje ibisubizo by’ibipimo bya COVID-19.

Nyuma ya Grand Prix Chantal Biya, Team Rwanda igiye kwitegura Tour du Rwanda 2021 izaba muri Gashyantare.

Team Rwanda yavanye ibihembo bitandukanye muri Grand Prix Chantal Biya 2020

Video: Mucyo Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .