00:00:00 IGIHE NETWORK KN KINYARWANDA EN ENGLISH FR FRANCAIS

Team Rwanda igiye gushakirwa umutoza mushya mbere ya Tour du Rwanda

Yanditswe na Eric Tony Ukurikiyimfura
Kuya 4 Mutarama 2023 saa 01:16
Yasuwe :

Ishyirahamwe ry’Umukino w’Amagare mu Rwanda (FERWACY) ryatangaje ko hagiye gushakwa umutoza mukuru w’Ikipe y’Igihugu uzaboneka mbere y’uko hakinwa Tour du Rwanda 2023 muri Gashyantare.

Team Rwanda itozwa na Sempoma Félix kuva muri Werurwe 2021 ubwo yahabwaga amasezerano y’amezi atanu kugira ngo ayitoze muri Shampiyona Nyafurika yabereye mu Misiri hagati ya tariki ya 2 n’iya 6 Werurwe ndetse na Tour du Rwanda 2021 yabaye muri Gicurasi uwo mwaka.

Nubwo ayo masezerano yagombaga kurangira muri Kamena 2021, Sempoma yakomeje gutoza Team Rwanda kugeza uyu munsi kuko umutoza wifuzwaga nk’umusimbura wa Sterling Magnell wasoje amasezerano mu Ugushyingo 2020 nyuma y’imyaka itatu atoza Ikipe y’Igihugu, atigeze aboneka.

Ishyirahamwe ry’Umukino w’Amagare mu Rwanda rivuga ko ryifuza umutoza ufite ubushobozi bwo gufasha iterambere ry’uyu mukino ku buryo yanazamura urwego rw’abandi batoza bo mu Rwanda.

Perezida wa FERWACY, Murenzi Abdallah, yavuze ko icyifuzo bafite ari uko Team Rwanda yazakina Tour du Rwanda 2023 ifite umutoza mukuru mushya.

Ati “Murabizi ko mu Ikipe y’Igihugu dufashwa na Minisiteri [ya Siporo]. Twaganiriye na yo uburyo umutoza ashobora kuboneka. Ikigaragara ni uko uburyo umukino ugenda utera imbere n’aho tugana, dukeneye umutoza wo ku rwego rwisumbuye ku wo dufite, ku buryo ashobora kubafasha kuzamura urwego.”

Yakomeje agira ati “Mu biganiro twagiranye na Minisiteri ni uko mu ntangiriro z’uku kwa mbere muri 2023, tuzatangira gushakisha binyuze mu buryo butandukanye ariko turifuza ko Tour du Rwanda yazatangira byibuze dufite umutoza ushobora gukurikirana abakinnyi. Uyu mwaka wa 2023 turifuza ko tuzaba dufite umutoza uri ku rwego rwo hejuru.”

Nyuma yo gukina Tour du Rwanda 2023 iteganyijwe hagati ya tariki ya 19 n’iya 26 Gashyantare, Team Rwanda izakina amarushanwa atandukanye arimo Shampiyona Nyafurika izaba muri Werurwe ndetse na Shampiyona y’Isi izabera muri Écosse muri Kanama.

Mbere yo gukina iriganwa ry’amagare rizenguruka u Rwanda, Ikipe y’Igihugu izitabira La Tropocale Amissa Bongo izabera muri Gabon mu mpera z’uku kwezi.

Sempoma Félix ni we umaze iminsi atoza Team Rwanda kuva muri Werurwe 2021
Team Rwanda igiye gushakirwa undi mutoza uri ku rwego rwo hejuru

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .