00:00:00 IGIHE NETWORK KN KINYARWANDA EN ENGLISH FR FRANCAIS

TdRwanda: Eyob Metkel yakomoje kuri Ndayisenga Valens, asaba Abanyafurika bose kumukorera

Yanditswe na Eric Tony Ukurikiyimfura
Kuya 6 Gicurasi 2021 saa 11:27
Yasuwe :
0 0

Umunya-Eritrea Eyob Metkel wambaye umwenda w’umuhondo wa Tour du Rwanda 2021 nyuma y’agace ka gatanu, yavuze ko mu 2016 yahariye Ndayisenga Valens bakinanaga ngo atware iri rushanwa, asaba Abanyafurika bari gukina iry’uyu mwaka kumukorera.

Eyob Metkel ukinira Terengganu Cycling Team, yambaye umwenda w’umuhondo nyuma yo kuba uwa gatatu mu gace ka gatanu ka Tour du Rwanda 2021 kasorejwe i Kigali (Kimironko) nyuma yo guhagurukira i Nyagatare kuri uyu wa Kane.

Uyu munya-Eritrea w’imyaka 27, yavuze ko etape y’uyu munsi yari igoye kuko yasoreje ahantu hazamuka, aho mu kilometero cya nyuma abakinnyi bazamutse umusozi wo kuri Kigali Parents School.

Ati “Ndishimye cyane kuko kwambara umwambaro w’umuhondo muri Tour du Rwanda ntibiba byoroshye. Nakoze ibishoboka byose ngo ndenge umurongo ndi mu b’imbere. Mbere yo gutangira etape nk’uko bisanzwe intego yacu aba ari ukuyitwara no kwambara umwenda w’umuhondo. Uyu munsi twabigezeho, birashimishije.”

Umunyamakuru wa IGIHE amubajije uko yiteguye gukomeza gukina kugira ngo agumane umwambaro w’umuhondo, yavuze ko bazakomeza gukinana nk’ikipe.

Ati “Ni ugukomeza guhangana kugira ngo ngumane umwenda w’umuhondo. Sinzi uko ejo bizagenda ariko hamwe na bagenzi banjye tuzagerageza kugumana umwenda w’umuhondo.’’

Yakomoje kuri Ndayisenga Valens bakinanye

Eyob Metkel umaze kwegukana etape eshanu muri Tour du Rwanda zose yitabiriye, abajijwe niba yiteze guhabwa ubufasha na bagenzi be bo muri Érythrée, yavuze ko na bo bari gukina ariko nk’Abanyafurika bose bamugiye inyuma byamufasha.

Ati “Ubushize sinasoje mfite umwenda w’umuhondo, kuko harimo mugenzi wanjye dukinana kandi sinahangana na we. Uyu mwaka mfite icyizere ko bizagenda neza, umwenda w’umuhondo uzaba uwanjye.”

Mu 2016, Eyob Metkel n’Umunyarwanda Ndayisenga Valens bakinanaga muri Dimension Data yo muri Afurika y’Epfo, ariko bombi bisanga bafite amahirwe yo kwegukana iryo siganwa, aho Ndayisenga yagaragaje ko uyu mukinnyi yamwihindutse nubwo byarangiye haririmbwe Rwanda Nziza.

Aba bakinnyi bombi bihariye ko ari bo bamaze kwegukana uduce twinshi (5) mu mateka ya Tour du Rwanda nubwo Ndayisenga Valens atagikina uyu mukino.

Eyob Metkel yambaye umwenda w’umuhondo amaze gukoresha amasaha 16, iminota 42 n’amasegonda atanu ku rutonde rusange, arusha amasegonda abiri Rodriguez Cristian Martin wa Direct Energie.

Tour du Rwanda 2021 izakomeza ku wa Gatanu tariki ya 7 Gicurasi 2021 hakinwa agace ka gatandatu kazahagurukira i Kigali (kuri Convention Centre) kagasorezwa Mont Kigali ku ntera y’ibilometero 152,6, ariko kanyuze i Gicumbi na Rulindo.

Umunya-Eritrea Eyob Metkel yambaye umwenda w'umuhondo wa Tour du Rwanda 2021 nyuma y'agace ka gatanu kasorejwe Kimironko
Eyob yavuze ko mu 2016 yahariye Umunyarwanda Ndayisenga Valens bakinanaga muri Dimension Data
Eyob Metkel wambaye umwambaro w'Umunyafurika mwiza (w'icyatsi utangwa na RwandAir) yasabye Abanyafurika bose kumukorera muri iri siganwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .