00:00:00 IGIHE NETWORK KN KINYARWANDA EN ENGLISH FR FRANCAIS

Tadej Pogačar yanikiriye bagenzi be yegukana Étape ya 14 ya Tour de France

Yanditswe na Iradukunda Olivier
Kuya 13 July 2024 saa 06:09
Yasuwe :

Umunya-Slovenia Tadej Pogačar ukinira UAE Team Emirates yegukanye Agace ka 14 ka Tour de France 2024, akoresheje amasaha ane, umunota umwe n’amasegonda 51.

Agace ko kuri uyu wa Gatandatu, tariki ya 13 Nyakanga 2024, kakiniwe mu bilometero 151,9 kuva mu mujyi wa Pau berekeza Saint-Lary-Soulan (Pla d’Adet), kakaba kasabaga imbaraga nyinshi kubera imisozi myinshi ikagize.

Pogačar w’imyaka 25 ni umwe mu bakinnyi beza muri iri siganwa mu kunyonga igare ahantu haterera, dore ko yaherukaga no kwitwara neza mu misozi bakinnye ku Gace ka Kane nako yatwaye.

Mu bilometero 10 bya nyuma niho uyu mukinnyi yanikiye mukeba we Jonas Vingegaard w’Umunya-Danemark wamukurikiye kuri uyu munsi, akamushyiramo intera y’amasegonda 39.

Si ugutwara agace no kugumana umwambaro w’umuhondo gusa kuko Pogačar kugeza ubu ariwe ufite amanota menshi y’ahazamuka (56), agakurikirwa na Vingegaard ufite 43.

Umubiligi Remco Evenepoel w’imyaka 24 niwe ukomeje kuba umukinnyi ukiri muto uri kwitwara neza kuko ayoboye abarimo Carlos Rodríguez na Matteo Jorgenson.

Aka gace kandi gasize abakinnyi batatu bavuye mu isiganwa aribo Vervaeke Louis, Bettiol Alberto, Capiot Amaury.

Agace ka 15 gakurikiraho kazakinwa abakinnyi baturuka Loudenvielle berekeza Plateau de Beille, aho bazakora ibilometero 197.7 naho hari imihanda yiganjemo imisozi miremire.

Tadej Pogačar yageze ahasorezwa isiganwa arusha bagenzi be amasegonda 30
Tadej Pogačar yorohewe n'imisozi yo guturuka Pau berekeza Saint-Lary-Soulan (Pla d'Adet)
Tadej Pogačar yegukanye Agace ka 14 ka Tour de France 2024

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .