Muri iri siganwa ryabaye kuri iki Cyumweru, Ingabire yakoresheje iminota 48, amasegonda 29 n’ibice 51, arushwa iminota icyenda, amasegonda 12 n’ibice 47 n’Umunya-Australia Brown Grace wegukanye umudali wa Zahabu.

Umudali wa Feza wegukanywe n’Umuholandikazi Vollerin Demi naho Umunyamerikakazi Dygert Chloe aba uwa gatatu ndetse atwara umudali w’Umuringa.

Mu batarengeje imyaka 23, umudali wa Zahabu wegukanywe n’Umudagekazi Niedermaier Antonia, akurikirwa na Liechti Jasmin wo mu Busuwisi ndetse na Julie de Wilde wo mu Bubiligi.

Ku wa Mbere hazaba hatahiwe abagabo batarengeje imyaka 23 aho u Rwanda ruhagarariwe na Masengesho Vainqueur, Niyonkuru Samuel na Tuyizere Étienne, bazakina intera y’ibilometero 29,9.

Hazakina kandi ingimbi aho muri iki cyiciro u Rwanda ruhagarariwe na Ntirenganya Moïse na Nshutiraguma Kevin, bo bazakina intera y’ibilometero 24,9 mu gusiganwa n’igihe buri wese ku giti cye.

Ubwo hazaba hasozwa iri rushanwa tariki ya 29 Nzeri, ni bwo u Rwanda ruzahabwa ibendera nk’igihugu kizakira Shampiyona y’Isi ya 2025 izabera i Kigali.

Ingabire Diane yabimburiye abandi bakinnyi bahagarariye u Rwanda muri Shampiyona y'Isi gukina kuri iki Cyumweru

Ingabire yabaye uwa 60 mu bakinnyi 70 basoje isiganwa ry'umuntu ku giti cye mu bagore

Umunya-Australia Brown Grace (hagati) w'imyaka 32, yegukanye umudali wa Zahabu

Abakinnyi batatu ba mbere mu batarengeje imyaka 23

Bamwe mu bakinnyi bahagarariye u Rwanda muri Shampiyona y'Isi y'Amagare i Zurich