Shampiyona y’Amagare yari iteganyijwe mu mpera z’icyumweru yasubitswe

Yanditswe na Eric Tony Ukurikiyimfura
Kuya 18 Ukuboza 2020 saa 11:40
Yasuwe :
0 0

Ishyirahamwe ry’Umukino w’Amagare mu Rwanda (FERWACY) ryafashe icyemezo cyo gusubika Shampiyona yari iteganyijwe mu mpera z’iki cyumweru kubera amabwiriza mashya yo kwirinda COVID-19.

Mu itangazo ryashyizwe hanze na FERWACY kuri uyu wa Gatanu, yavuze ko iki cyemezo cyafashwe mu rwego rwo kubahiriza amabwiriza yo kwirinda COVID-19.

Yagize iti “Mu rwego rwo kubahiriza amabwiriza mashya yo kwirinda ikwirakwizwa rya COVID-19, Shampiyona y’Igihugu y’umukino w’amagare 2020 yari iteganyijwe ku wa Gatandatu tariki ya 19 Ukuboza no ku Cyumweru tariki ya 20 Ukuboza 2020 ntikibaye.”

Byari biteganyijwe ko ku munsi wa mbere wa shampiyona 2020, ku wa Gatandatu, abakinnyi bazasiganwa n’ibihe umuntu ku giti cye (Individual Time Trial/ITT) .

Bari kuzakora inzira ya Nyamata-Mbyo-Nyamata ifite intera y’ibilometero 25 ku bakobwa n’abahungu bakiri bato mu gihe abagabo n’abari munsi y’imyaka 23 bari guhagurukira i Ramiro berekeza i Nyamata ku ntera y’ibilometero 41.8.

Ku munsi wa kabiri, ku Cyumweru, abasiganwa bari kuzakoresha imwe mu nzira zizanyurwamo na Tour du Rwanda 2021. Abagore bari kuzahagurukira mu Murenge wa Kisaro bajya i Kanyinya (MAGERWA) ahazasorezwa isiganwa, bagakora intera y’ibilometero 71.

Abahungu bakiri bato (Juniors) bari kuzahagurukira mu Rukomo i Gicumbi, berekeza i Kanyinya (MAGERWA) ku ntera y’ibilometero 90 mu gihe abagabo bakuru n’abari munsi y’imyaka 23 (Elites & U-23) bari kuzava mu Gatsata berekeza i Kanyinya (MAGERWA) mu nzira ya Gatsata-Gicumbi-Base-Nyirangarama-Kanyinya ku ntera y’ibilometero 139.

Umunyamabanga Mukuru wa FERWACY, Sekanyange Jean Léonard, yabwiye IGIHE ko kuba umubare w’ubwandu bwa COVID-19 wariyongereye muri iyi minsi byatumye bahitamo kubahiriza ingamba ziheruka gushyirwaho.

At “Shampiyona y’Igihugu iba rimwe mu mwaka nk’uko mubizi kandi tuyandikisha muri UCI. Muri iyi minsi, ubwandu bwa COVID-19 bwongeye kuzamuka cyane kandi ingamba zafashwe muri iki cyumweru zasanze twaramaze gufata gahunda, ariko nka Komite n’abandi dufatanya dusanga ibaye twaba dushatse kwikururira ibyago bitari ngombwa. Twavuze ngo reka tubisubike, twirengazize amanota biduha nk’igihugu n’amanota y’abakinnyi ku giti cyabo.”

Yakomeje avuga ko bateganya gukina Rwanda Cycling Cup mu ntangiriro za 2021 kugira ngo izafashe abakinnyi bwitegura Tour du Rwanda y’umwaka utaha.

“Twanzuye ko Shampiyona y’uyu mwaka tutayikina, tukazakina iya 2021. Twese dufatanyije uko dufata ingamba zo kwirinda Coronavirus, bizaduha icyizere cyo gukora andi marushanwa. Tugiye kubinoza neza ku buryo mu kwezi kwa mbere n’ukwa kabiri tuzaba dukina Rwanda Cycling Cup, twitegura Tour du Rwanda ya 2021.”

Mu kiganiro aheruka kugirana n’itangazamakuru, Minisitiri wa Siporo, Munyangaju Aurore Mimosa, yavuze ko nta kizabuza Tour du Rwanda 2021 kuba hagati ya tariki ya 21 n’iya 28 Gashyantare, aho hazakurikizwa ingamba zo kwirinda COVID-19.

Muri gahunda za FERWACY harimo ko abakinnyi b’Abanyarwanda bazitabira Tour du Rwanda 2021 bamaze gukora amasiganwa atanu y’imbere mu gihugu.

Shampiyona y’Amagare yari iteganyijwe mu mpera z’icyumweru yasubitswe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .