Sempoma Félix yahawe amasezerano yo gutoza Team Rwanda

Yanditswe na Eric Tony Ukurikiyimfura
Kuya 1 Werurwe 2021 saa 07:59
Yasuwe :
0 0

Sempoma Félix wari usanzwe ari umutoza wa Benediction Ignite y’i Rubavu, yahawe amasezerano y’amezi atanu nk’umutoza w’Ikipe y’Igihugu y’Amagare, Team Rwanda, yitabiriye Shampiyona Nyafurika ya 15 izabera mu Misiri hagati ya tariki ya 2 n’iya 6 Werurwe 2021.

Kuri uyu wa Mbere, Ishyirahamwe Nyarwanda ry’Umukino w’Amagare, FERWACY, ryemeje ko “Sempoma Félix yahawe amasezerano y’amezi atanu nk’umutoza mukuru w’Ikipe y’Igihugu (TEAM RWANDA).”

Perezida wa FERWACY, Murenzi Abdallah, yavuze ko Sempoma yahawe amasezerano kuko yagaragaje umusaruro atoza iyi kipe aho yakoraga nk’umukorerabushake.

Ati "Sempoma yahabwaga kenshi Ikipe y’Igihugu ariko mu buryo budahoraho, yahawe amasezerano y’amezi atanu aho azaba ari umutoza w’ikipe y’abagabo n’abatarengeje imyaka 23 mu mikino iteganyijwe kugera muri Kamena 2021.”

Murenzi yongeyeho ko Sempoma afite inshingano zo gutegura Team Rwanda izakina Tour du Rwanda kuva tariki ya 2-9 Gicurasi 2021 hagamijwe gushaka umusaruro mwiza.

Ati“ [Sempoma] Afite inshingano ikomeye yo gutegura Tour du Rwanda no gushaka umusaruro mwiza kuko kuva Tour du Rwanda ivuye kuri 2.1 ntituratsinda, turashaka kuyitegura neza ngo twongere guha abanyarwanda ibyishimo.”

Sempoma wayoboye Team Rwanda ubwo yegukanaga Grand Prix Chantal Biya yabereye muri Cameroun mu Ugushyingo 2020, yari yahawe iyi kipe by’agateganyo kuko muri uko kwezi ubwo amasezerano ya Sterling Magnell wari uyimaranye imyaka itanu yari arangiye.

Ishyirahamwe ry’Umukino w’Amagare mu Rwanda rivuga ko ryifuza umutoza ufite ubushobozi bwo gufasha iterambere ry’uyu mukino ku buryo yanazamura urwego rw’abandi batoza bo mu Rwanda ndetse biteganyijwe ko muri Kamena hazashakwa undi mutoza.

Sempoma Félix yavuze ko yashimishijwe no guhabwa amasezerano ya mbere mu Ikipe y’Igihugu amazemo hafi imyaka 10 kuko ubundi yakoraga nk’umukoranabushake.

Yongeyeho ko Shampiyona Nyafurika bagiye gukina mu Misiri, izabafasha kwitegura Tour du Rwanda ya 2021 iherutse kwimurirwa muri Gicurasi nubwo kwitegura irushanwa nk’iryo mu bihe bya COVID-19 bitoroshye.

Ati “Gutegura Tour du Rwanda bisaba igihe, ntabwo turitegura bihagije ariko sitwe gusa kuko byabaye kuri bose kubera icyorezo cya Coronavirus, abakinnyi bahorana ubushake, turava muri shampiyona dukomeze imyiteguro.”

Mu gihe Sempoma yajyanye n’amakipe y’Igihugu mu marushanwa yo hanze, Team Rwanda yegukanye Grand Prix Chantal Biya 2020, Tour du Sénégal 2019, Tour du Cameroun 2018, La Tropocale Amissa Bongo 2018 n’umudali wa Zahabu muri All African Games za 2015.

Sempoma Féix yahawe amasezerano y'amezi atanu nk'umutoza wa Team Rwanda
Sempoma ari kumwe na Team Rwanda yakinnye All African Games mu 2015
Sempoma Féix (ubanza iburyo) yatoje Team Rwanda iheruka kwegukana Grand Prix Chantal Biya mu Ugushyingo 2020

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .