SACA yavuze ku kibazo cya Mugisha Moïse washinje umutoza we Niyonshuti Adrien kumukubita

Yanditswe na Eric Tony Ukurikiyimfura
Kuya 11 Ukuboza 2020 saa 01:41
Yasuwe :
0 0

Ubuyobozi bw’ikipe y’amagare ya Skol Adrien Cycling Academy (SACA) bwemeje ko hari amakimbirane yabaye hagati y’Umutoza Niyonshuti Adrien n’umukinnyi Mugisha Moïse, ariko ko yakemuwe ku buryo nta kibazo kiri muri iyi kipe.

Muri iki cyumweru, Mugisha Moïse uheruka kwegukana isiganwa rya Grand Prix Chantal Biya, yatangaje yasabye gusesa amasezerano na SACA kuko yakubiswe n’umutoza Niyonshuti Adrien.

Ati “Ntangira gukubitwa byahereye mu Bubiligi mu mwaka ushize mu kwa munani, sinibaza impamvu abikoze kuko nari ndi kwitegura imikino yabereye muri Maroc, ndihangana ndamwihorera, mwereka ko nta kibazo. Kugeza Tour du Rwanda iba ntitwavugaga rumwe, Adrien ni umuntu wishyira hejuru iteka ryose.”

“Kubera ko nari nzi icyo igare rimariye, narihanganye nditoza ariko nkagenda mbimenyesha abayobozi banjye, bagaterera iyo. Nageze aho ndatuza, nemera kugaraguzwa agati.”

Mugisha yavuze ko kandi hari ubwo “Twari tumaze kurya mbona inkoni iraje arankubita. Ejo bundi turi mu igeragezwa riba rimeze nk’irushanwa, twagiye i Gatuna noneho ngiriye inama mugenzi wanjye Seth, anyumvise gutyo ankubita inshyi, ambwira ko ntari umutoza. Nta kindi namusubije, nuriye igare ndagenda ankurikiza imijugujugu.”

Visi Perezida w’ikipe ya SACA, Kayihura Fleur, yavuze ko amakimbirane yabaye hagati y’abo bombi, yabaye mu mezi atatu ashize, yakemuwe ku buryo yumva nta kibazo gihari ubu.

Ati “Yego turakizi, habayeho amakimbirane hagati yabo bombi ariko ibyo byabaye hashize amezi atatu, bikiba ubuyobozi bw’ikipe bwarabikurikiranye ndetse bunafatira ibihano abagaragayeho amakosa hagendewe ku mategeko agenga ikipe.”

“Nk’uko mubizi mu makipe hafi ya yose ya siporo bitewe n’imiterere yo guhatana ndetse n’intumbero zinyuranye birashoboka ko habaho amakimbirane hagati y’abakinnyi, ibi ni ibisanzwe ndetse no mu yandi makipe ku Isi hose ndetse no mu yindi miryango itandukanye.”

“Igitutu ku bakinnyi n’amakipe bamaze gutera imbere biri mu by’ingenzi ubuyobozi bw’ikipe bubereyeho gufasha kugira ngo abakinnyi barusheho kuzamuka mu ntera.”

Yakomeje avuga ko kuva Team Rwanda ivuye muri Cameroun, Mugisha Moïse ataritozanya na SACA ku buryo atumva aho amakimbirane avugwa hagati y’impande zombi yaba avuye muri iyi minsi.

Ati “Kuva Mugisha Moïse yajya mu myitozo y’ikipe y’Igihugu bitegura amarushanwa ya Chantal Biya muri Cameron ndetse no kugaruka kwe nyuma yo gutwara iryo rushanwa ntabwo yigeze agaruka mu myitozo y’ikipe ye SACA. Ntiyigeze yitozanya n’ikipe mu byumweru byashize, ntitwumva amakimbirane yaba yarongeye kubaho ku buryo Mugisha Moïse yagarura ikibazo cyabayeho mu mezi atatu ashize ndetse cyamaze no gucyemurwa.”

Abajijwe icyo avuga ko ku kuba uyu mukinnyi aherutse gutangaza ko atakiri umukinnyi wa SACA kuko yasabye Ishyirahamwe ry’Umukino w’Amagare mu Rwanda (FERWACY) kumufasha gusesa amasezerano, Kayihura yashimangiye ko bagifitanye amasezerano na Mugisha Moïse kugeza mu Ukuboza 2021.

Ati “Mugisha Moïse ni umwe mu bagize ikipe y’umukino w’amagare ya SACA, afitanye amasezerano na SACA kugeza kuwa 31 Ukuboza umwaka wa 2021.”

“Nk’undi mukinnyi wese ugize ikipe ya SACA, Mugisha Moïse ahabwa ibikenerwa byose harimo ibikoresho ndetse n’uburyo bumufasha kubaho neza yaba mu gihe ari mu myitozo ndetse no mu kindi gihe gisanzwe hagendewe ku mategeko agenga ikipe ya SACA.”

Umuyobozi wungirije wa SACA yavuze ko kandi kuba Mugisha yagirana ikibazo n’umutoza we, bitavuze gusesa amasezerano yagiranye n’ubuyobozi bw’ikipe.

Ati “Ikibazo cyaba hagati y’abanyamuryango babiri bagize ikipe, ntigishobora kugira ingaruka ishingiye ku masezerano hagati y’umunyamuryango ndetse n’ubuyobozi bw’ikipe, SACA nk’indi miryango yose, iyoborwa n’amategeko n’amabwiriza. Iyo habayeho ikibazo hagati y’abagize umuryango ubuyobozi bw’ikipe ni bwo bucyemura icyo kibazo hagendewe ku mategeko agenga ikipe, Mugisha Moïse nawe ni umwe mubagize umuryango wa SACA bityo agomba kugendera no kubaha ayo mabwiriza.”

“Mugisha Moïse ni umukinnyi mwiza, twishimira imbaraga n’umusaruro we kandi tumwifuriza iterambere nk’uko tubyifuriza buri mukinnyi wese wa SACA, turi ikipe itumbereye intsinzi no gukorera hamwe bibyara umusaruro wa twese.”

Mugisha Moïse uheruka kwegukana Grand Prix Chantal Biya, ari mu bakinnyi bitwaye neza muri uyu mwaka wa 2020 ku rwego rwa Afurika, nyuma y’uko yabaye uwa kabiri muri Tour du Rwanda ya 2020 yabaye hagati ya Gashyantare na Werurwe.

Uyu musore w’imyaka 23, watangiye kwitabira amarushanwa mpuzamahanga mu 2018, yatwaye Shampiyona ya Afurika n’iy’u Rwanda mu batarengeje imyaka 23 mu 2019.

Yatwaye kandi Umudali w’Umuringa mu mikino nyafurika iheruka kubera muri Maroc abakinnyi basiganwa n’ibihe (Individual Time Trial).

Mugisha ari kumwe na bagenzi be kandi begukanye umudali w’Umuringa mu gusiganwa n’ibihe nk’ikipe “Team Time Trial” muri iyi mikino Nyafurika “All African Games 2019” yabereye muri Maroc.

Umuyobozi wungirije wa SACA, Fleur Kayihura, yavuze ko amakimbirane yabaye hagati ya Mugisha Moïse n'umutoza Niyonshuti Adrien yakemuwe
Mugisha Moïse aherutse gutangaza ko yatandukanye na SACA
Niyonshuti Adrien utoza SACA, yashinjwe na Mugisha Moïse kumukubita no kumugendaho inshuro nyinshi zitandukanye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .