SACA irateganya kwitabira amasiganwa mu Bubiligi

Yanditswe na Eric Tony Ukurikiyimfura
Kuya 29 Kanama 2020 saa 02:53
Yasuwe :
0 0

Umutoza w’Ikipe y’Amagare ya Skol Adrien Skol Cycling Academy (SACA), Niyonshuti Adrien, avuga ko bateganya kwitabira amasiganwa atandukanye mu Bubiligi hagati y’Ukwakira n’Ugushyingo mu gihe icyorezo cya Coronavirus cyaba kigabanutse.

Kimwe n’iyindi mikino, nta marushanwa yo gusiganwa ku magare yigeze ategurwa kuva muri Werurwe uyu mwaka ubwo mu Rwanda haboneka umurwayi wa mbere wanduye Coronavirus.

Hashize amezi abiri n’igice uyu mukino uri mu yakomerewe ngo abakinnyi bitoze ariko ntiharamenyekana igihe amarushanwa ashobora kongera gusubukurirwa.

Mu kiganiro yagiranye na IGIHE, Niyonshuti Adrien utoza SACA, yavuze ko nubwo abakinnyi be bamaze igihe badakina amasiganwa ariko batasubiye inyuma cyane kuko bakomeje kubakurikirana no mu bihe bya Guma mu Rugo.

Ku bijyanye n’imyiteguro y’igihe amarushanwa ashobora gusubukurirwa, Niyonshuti yavuze ko bategereje kumenya imyanzuro izafatwa n’inzego zibishinzwe mu gihe bateganya kwitabira amasiganwa atandukanye mu Bubiligi akenshi yakorwaga mu mpeshyi.

Ati “Ntekereza ko abashinzwe siporo hari ukuntu bazaganira na federasiyo bakabihuza, bakareba igikenewe tukaba twasubira mu marushanwa. Nibiramuka bidakunze, abakinnyi ikintu nababwira ni ukwitegura Tour du Rwanda y’umwaka utaha kuko ntekereza ko mu mwaka utaha izaba, turamutse tugize amahirwe.”

Yakomeje agira ati “Biramutse bigenze neza tukabona ibyangombwa byo kujya hanze [visa], tukabona n’ubutumire bw’imikino twari twarateganyije kujyamo mu Bubiligi, birashoboka ko twajyayo gukina mu kwezi kwa 10 cyangwa se mu kwa 11 kuko ntekereza ko umwaka w’imikino uzamara igihe kirekire nubwo bitoroshye gutwara abana mu Burayi mu gihe cy’ubukonje.”

Mu myaka ibiri ishize, ubuyobozi bw’uruganda rwenga ibinyobwa bisembuye n’ibidasembuye rwa SKOL, bwoherezaga abakinnyi mu masiganwa mu Bubiligi mu gihe cy’impeshyi hagati ya Nyakanga na Kanama.

Ati “Kubatwarayo mu gihe cyo mu Ukwakira n’Ugushyingo ubwo haba hakonje, byaba ari byiza kugira ngo bamenyere n’igihe cy’ubukonje niba bashaka kuba abakinnyi babigize umwuga, ariko bidakunze twashyira umutima kuri Tour du Rwanda. Uyu mwaka wabaye nk’impfabusa mu bintu byose ariko ubuzima nibwo bw’ingenzi.”

Umutoza wa SACA yakomeje avuga ko imbogamizi ya mbere kuri ubu, ihari ku bantu benshi, ari ukubona ibyangombwa byo kwerekeza mu bihugu bitandukanye muri ibi bihe bya Coronavirus.

Ati “Abana benshi bari hano muri Afurika kujya mu Butaliyani, mu Bufaransa n’ahandi biri kugorana. Kubona visa yabonekeraga ibyumweru bibiri, bishobora no gutwara amezi atatu. Ibintu byose ni uguteganya ubu, visa yabaye ikibazo.”

Guhera mu kwezi gushize, mu Burayi hatangiye gutegurwa amasiganwa atandukanye ndetse kuri uyu wa Gatandatu tariki ya 29 Kanama nibwo hatangiye Tour de France yitabirwa n’amakipe akomeye ku Isi.

Kugeza ubu ntibiramenyekana ahazabera Shampiyona y’Isi y’Amagare izitabirwa n’abarimo Abanyarwanda, ni nyuma y’uko guverinoma y’u Busuwisi, ahari kubera iri rushanwa mu Mujyi wa Aigle-Martigny hagati ya tariki ya 20 n’iya 27 Nzeri, yongereye igihe cy’amabwiriza yo kudahurira hamwe kw’abantu basaga 1000 kugeza tariki ya 1 Ukwakira nk’imwe mu ngamba zo kwirinda icyorezo cya Coronavirus.

Indi nkuru wasoma: SACA yitabiriye Tour du Rwanda bwa mbere ikitwara neza yashimiye Skol

Ikipe y'Amagare ya SACA ishobora kwitabira amasiganwa mu Bubligi mu Ukwakira cyangwa Ugushyingo
Umutoza wa SACA, Niyonshuti Adrien, avuga ko bikunze ko abakinnyi babona ibyangombwa byo kujya mu Bubiligi, byabafasha kumenyera gukinira mu bukonje
SACA yitabiriye Tour du Rwanda 2020 nk'isiganwa ryayo rya mbere rikomeye yari ikinnye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .