Rwanda Cycling Cup izakomereza i Huye hakinwa isiganwa ryo kwibuka Byemayire

Yanditswe na Eric Tony Ukurikiyimfura
Kuya 16 Ukwakira 2019 saa 09:40
Yasuwe :
0 0

Amarushanwa ya Rwanda Cycling Cup 2019 azakomeza kuri uyu wa Gatandatu tariki ya 18 Ukwakira hakinwa isiganwa rya Criterium Byemayire Lambert, rizazenguruka Umujyi wa Huye wo mu Ntara y’Amajyepfo.

Iri siganwa rya gatanu rya Rwanda Cycling Cup 2019 iterwa inkunga na Cogebanque n’uruganda rw’ibinyobwa rwa Skol, ryahujwe no kwibuka nyakwigendera Byemayire Lambert wari Visi Perezida wa FERWACY.

Byemayire Lambert wahoze ari umuyobozi wa Cycling Club For All (CCA) y’i Huye, akaba na visi perezida w’Ishyirahamwe ry’Umukino w’Amagare mu Rwanda (FERWACY), yitabye Imana mu Ugushyingo 2016.

Muri iri siganwa azibukirwamo, abakinnyi bose bazazenguruka intera y’ibilometero 5.6 bahagurukire imbere y’Isoko rya Huye berekeze kuri Stade Huye - Petit Séminaire de Karubanda - Hôtel TWIGA- RRA - Ku Isoko.

Isiganwa rizatangira saa yine (10:00) aho abagore bazazenguruka inshuro 12 zihwanye n’ibilometero 67.2; ingimbi zizenguruke inshuro 15 zingana n’ibilometeo 84 mu gihe abagabo bakuru n’abatarengeje imyaka 23 bazazenguruka inshuro 20 zireshya n’ibilometero 112.

Muhoza Eric wa Les Amis Sportifs iterwa inkunga na Cogebanque, ntabwo azakina iri siganwa ryo ku wa Gatandatu. Uyu mukinnyi wegukanye Rwamagana Circuit na Kivu Race mu ngimbi, arahaguruka i Kigali kuri uyu wa Gatatu yerekeza muri Afurika y’Epfo mu mahugurwa y’ukwezi azabera mu kigo cya UCI.

Arajyana na Mukundente Geneviève wa Benediction Club, uyu we akaba yaratwaye Tour de Kigali na Rwamagana Circuit yakinwe muri Kanama mu cyiciro cy’abagore.

Byukusenge Patrick, Ruberwa Jean Damascène, Munyaneza Didier, Manizabayo Eric bita Karadio na Nzafashwanayo Jean Claude ni abandi bakinnyi batazakina Huye Circuit kuko bagiye muri Cameroun kwitabira isiganwa ngaruka mwaka rya Grand Prix Chantal Biya 2019 rizatangira kuri uyu wa Kane tariki 17 Ukwakira nyuma yo kwigizwa inyuma umunsi umwe.

Habimana Jean Eric wa SKOL Fly Cycling Club ukubutse muri UCI mu Busuwisi na mugenzi we Mugisha Moïse wari umaze iminsi yitoreza mu Bufaransa, bombi bitezwe mu bazakina i Huye.

Kugeza ubu hamaze kuba amasiganwa ane uyu mwaka, aho irya mbere ryabereye i Musanze ‘Northern Challenge’ ryegukanywe na Uwizeyimana Bonaventure wa Benediction Excel Energy kuri ubu utakiri mu Rwanda.

Nkurunziza Yves wa Benediction Excel Energy yatwaye Tour de Kigali, Mugisha Moïse wa Skol Fly Cycling Club atwara Rwamagana Circuit mu gihe Munyaneza Didier ‘Mbappé’ yatwaye Kivu Race iheruka gukinwa mu kwezi gushize.

Amakipe 11 azahatana muri Criterium Byemayire Lambert ni Fly Cycling Club, Les Amis Sportifs, Cycling Club For All, Benediction Club, Muhazi Cycling Generation, Karongi Vision Sport Center, Kigali Cycling Club, Nyabihu Cycling Team, Kayonza Young Stars Cycling Team, Ciine Elmay na Bugesera Cycling Club izaba isiganwa bwa gatatu nyuma yo gukina muri Rwamagana Circuit na Kivu Race.

Cycling Cup ni amarushanwa ngarukamwaka ategurwa na Ferwacy kuva mu 2015. Yashyizweho mu rwego rwo kongerera imyitozo n’ubunararibonye abakinnyi by’umwihariko abadakina mu Ikipe y’igihugu batitabira amasiganwa menshi mpuzamahanga.

Rwanda Cycling Cup 2019 irakomeza i Huye mu mpera z'icyumweru, hakinwa isiganwa rya gatanu
Mugisha Moïse ni umwe mu bitezwe ku wa Gatandatu nyuma yo kugaruka mu Rwanda
Muhoza Eric wa Les Amis Sportifs iterwa inkunga na Cogebanque, ni we uyoboye mu ngimbi ariko ntabwo azakina kuko agiye kujya muri Afurika y'Epfo mu gihe cy'ukwezi
Nzafashwanayo Jean Claude, Ruberwa Jean Damascene, Byukusenge Patrick, Manizabayo Eric na Munyaneza Didier bagiye gukina Grand Prix Chantal Biya 2019 izatangira ejo ku wa Kane
Mukundente Genevieve na we agiye kwitoreza muri Afurika y'Epfo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza