Kuri iki Cyumweru, muri Parking ya Stade Amahoro iherereye imbere ya Petit Stade, i Remera, ni ho habereye iri siganwa ry’abakiri bato, ryabaye umwanya mwiza wo kugerageza imihanda mishya ku bakinnyi bari bamaze kumenyera iyo kuri Field of Dreams mu Bugesera, i Rwamagana, Musanze no muri Parking ya Kigali Pelé Stadium.

Nshutiraguma Kevin ukinira Ikipe ya Cine Elmay, utaritabiriye isiganwa riheruka mu Ukwakira kubera ko yari muri Shampiyona Nyafurika yabereye muri Kenya, yegukanye intsinzi mu ngimbi nyuma yo kuzenguruka inshuro 37 akoresheje 59, amasegonda 17 n’ibice 41.

Yakurikiwe n’abarimo Byusa Pacifique (Les Amis Sportifs) wari wabaye uwa kabiri mu Ukwakira, Ufitimana Schadrack (Les Amis Sportifs), Ntirenganya Moise (Les Amis Sportifs) na Kwizera Thank You (Cine Elmay) mu myanya itanu ya mbere. Ni mu gihe Manizabayo Jean de Dieu waherukaga gutsinda, kuri iyi nshuro atitabiriye.

Mu bakobwa batarengeje imyaka 19, hatsinze Iragena Charlotte wa Ndabaga Women Cycling Team wakoresheje isaha n’amasegonda 39 nyuma yo kuzenguruka inshuro 35, ahigika abarimo Uwiringiyimana Liliane wa Friends of Nature, Uwimpuhwe Alice wa Bike for Future na Umutoni Sandrine wa Bugesera Cycling Team wari wegukanye isiganwa riheruka.

Muri iki cyiciro cy’Abatarengeje imyaka 19, hari hitabiriye abahungu 19 n’abakobwa 15.

Masengesho Yvonne wa Ndabaga Women Team na Gisubizo Issa wa Les Amis Sportifs, bombi batsinze mu bakobwa n’abahungu batarengeje imyaka 17 nk’uko byagenze kuri Riza Jehovaile wa Ndabaga Women Team na Habumuremyi Cyusa wa Les Amis Sportifs mu batarengeje imyaka 15.

Mu batarengeje imyaka 13 hatsinze Mwamikazi Joy Cynthia wa Benediction Club na Mugisha Prince wa Les Amis Sportifs naho mu batarengeje imyaka 11 hatsinze Igiraneza Ogillah wakinaga ku giti cye na Habumuremyi Semusa Lucky, bombi bahigitse Uwamahoro Françoise na David Zanith bari batsinze ubushize.

Iyi Shampiyona y’Abakiri Bato yatangijwe n’Ishyirahamwe ry’Umukino w’Amagare mu Rwanda (FERWACY) kuva muri Nyakanga 2023, mu gutegura Shampiyona y’Isi izabera i Kigali mu 2025 no kuzamura impano z’abakinnyi bakiri mu myaka yo hasi ku buryo bazagenda bakurikiranwa.

Buri uko abakinnyi bitabiriye, bahabwa amanota kugira ngo abagaragaza impano babashe gukurikiranwa.

Isiganwa risoza umwaka rizabera mu yindi Parking ya Stade Amahoro ku wa 15 Ukuboza 2024.

Isiganwa rya 11 rya Rwanda Youth Racing Cup 2024, ryabereye muri Parking ya Stade Amahoro

Abakinnyi babanza kwiyandikisha mbere yo gukina

Amakipe asigaye yitabira afite abana benshi mu byiciro bitandukanye

Habumuremyi Semusa Lucky watsinze mu bahungu batarengeje imyaka 11

Igiraneza Ogillah yishimira intsinzi yabonye mu batarengeje imyaka 11

Mugisha Prince wa Les Amis Sportifs yatsinze mu bahungu batarengeje imyaka 13

Mwamikazi Joy Cynthia wa Benediction Club yateruye igare nyuma yo gutsinda mu bakobwa batarengeje imyaka 13

Abakinnyi bazengurukaga muri Parking ya Stade Amahoro

Habumuremyi Cyusa wa Les Amis Sportifs yishimira intsinzi mu bahungu batarengeje imyaka 15

Riza Jehovaile wa Ndabaga Women Team yatsinze mu bakobwa batarengeje imyaka 15

Iragena Charlotte akata ikorosi

Nshutiraguma Kevin yongeye gukina Youth Racing Cup yari amaze inshuro ebyiri zikurikiranya atitabira kubera amarushanwa mpuzamahanga

Nshutiraguma yishimiye intsinzi aterura igare

Iragena Charlotte ni we uyoboye urutonde rusange nyuma y'amasiganwa yose amaze kuba uyu mwaka

Umujyanama wa FERWACY mu bijyanye na Tekinike, Simon Huppertz, ahemba abana bitwaye neza mu bahungu batarengeje imyaka 11

Iragena Charlotte (hagati) yongeye kwegukana intsinzi mu bakobwa batarengeje imyaka 19

Umunyamabanga Mukuru wa FERWACY, Ruyonza Arlette ahemba abakinnyi bitwaye neza mu bahungu batarengeje imyaka 19 bayobowe na Nshutiraguma Kevin uri hagati

Rwanda Youth Racing Cup imaze kumenyerwa, yitabirwa n'abana basaga 100