Isiganwa ryabaye kuri iki Cyumweru, tariki ya 1 Nzeri 2024. Ryateguwe n’Ishyirahamwe ry’Umukino w’Amagare mu Rwanda (FERWACY) ku bufatanye n’Umuryango Nyarwanda ushinzwe Kubungabunga Ibinyabuzima byo mu Gasozi (RWCA).

Abaryitabiriye mu byiciro bitandukanye, banyuze mu mihanda izengurutse igishanga cya Rugezi kiri hagati y’Akarere ka Gicumbi n’aka Burera, kibarizwamo ¼ cy’imisambi yose yo mu Rwanda.

Iri siganwa ryakinwe mu byiciro bitatu birimo ababigize umwuga; abagore n’abagabo bakoze intera ingana y’ibilometero 89,1 bahagurukiye muri Santere ya Butaro, abatarabigize umwuga (abakinnyi badafite licence za FERWACY) bakoze intera ingana n’ibilometero 46 bahagurukiye ku Ibanda n’abakoresha amagare asanzwe ya matabaro bakoze intera ingana n’ibilometero 37 bahagurukiye i Ruhunde.

Nubwo yatobokesheje igare mu bilometero 30 akifasha kurikora, Niyonkuru Samuel ukinira Team Amani yo muri Kenya, yegukanye isiganwa mu bagabo babigize umwuga akoresheje amasaha atatu, iminota itandatu n’amasegonda 25, akurikirwa na Nshutiraguma Kevin wa Cine Elmay yasize iminota 18 n’amasegonda atanu nk’uko byagenze no kuri Niyireba Innocent wabaye uwa gatatu.

Manizabayo Jean w’Ikipe ya Sina Gerard wari wagerageje gukurikira Niyonkuru igihe kirekire, yasoreje ku mwanya wa kane asizwe iminota 21.

Niyonkuru wasize abandi 25 bari bahanganye, yavuze ko yishimiye kongera kwegukana iri siganwa yari yatwaye mu 2023 ubwo ryakinwaga ku nshuro ya mbere.

Mu bagore, hatsinze Irakoze Neza Violette wahigitse abandi bakobwa batanu bakinnye muri iki cyiciro.

Mu bagabo n’abagore batabigize umwuga, bakoze ibilometero 46, hatsinze Ruberwa Jean Damascène na Ingabire Domina.

Mu cyiciro cy’abakinishije amagare asanzwe ku ntera y’ibilometero 37, cyari kigizwe n’abakinnyi 74 barimo abakobwa icyenda, Akimana Donatha ukinira Ikipe ya Ngarama na Mufiteyesu Emmanuel w’i Gicumbi ni bo batsinze.

Niyonkuru Samuel yishimira intsinzi nyuma yo kwegukana "Umusambi Race 2024" i Butaro

Niyonkuru yasesekaye i Butaro ari wenyine ndetse yanikiye abo bari bahanganye

Niyonkuru yasesekaye i Butaro ari wenyine ndetse yanikiye abo bari bahanganye

Nshutiraguma na Niyireba basoreje ku mwanya wa kabiri n'uwa gatatu

Abayobozi batandukanye bitabiriye iri rushanwa ryabaye ku nshuro ya kabiri

Niyonkuru akora igare rye nyuma yo gutobokesha ipine

Ni isiganwa ryakiniwe mu mihanda izengurutse igishanga cya Rugezi

Abatuye uturere twa Gicumbi na Burera bari bishimiye iri siganwa ryakinwe mu byiciro bitandukanye hagamijwe kubungabunga inyoni y'umusambi

Abatarabigize umwuga na bo bakinishije amagare yabugenewe

Hari n'abakinishije amagare asanzwe ya matabaro, bo bakoze intera y'ibilometero 37