Munyaneza Didier yegukanye isiganwa rya ‘Kivu Race’

Yanditswe na Eric Tony Ukurikiyimfura
Kuya 21 Nzeri 2019 saa 01:42
Yasuwe :
0 0

Munyaneza Didier wa Benediction Excel Energy ni we wegukanye agace ka kane ka Rwanda Cyclng Cup 2019 nyuma yo gusiga mugenzi we, Nsengiyumva Shemu wa Les Amis Sportifs bari bahanganye.

Kuri uyu wa Gatandatu, abakinnyi bazengurukaga intera y’ibilometero 7.5 banyuze ku Isoko rya Gisenyi- Cogebanque – ADEPR – Betel Majengu – Aéroport – Stastion OM – Dépôt SKOL – Lancet Laboratories – Parquet –Umuhanda w’amabuye – SONARWA –Akarere Ka Rubavu – Mostej Hotel – Hopital La Croix Du Sud – Station Kobil – Isoko Rya Gisenyi.

Aka gace kane muri Rwanda Cycling Cup iri gukinwa ku nshuro ya gatanu, ntabwo karimo Uwizeyimana Bonaventure wegukanye ‘Northern Challenge’ muri Nyakanga, Nkurunziza Yves watwaye Tour de Kigali mu kwezi gushize na Mugisha Moïse watwaye Rwamagana Circuit mu ntangiriro z’uku kwezi.

Mu bagabo bakuru n’abatarengeje imyaka 23 (Elite men & U-23) bazengurutse inshuro 20 (150 km), isiganwa ryegukanwe na Munyaneza Didier uzwi nka Mbappé nyuma yo gusiga Nsengiyumva Shemu wa Les Amis Sportifs, aho aba bombi bashyizemo ikinyuranyo kirenga iminota itatu ku bari babakurikiye.

Baje bakurikiwe n’itsinda ryarimo Uhiriwe Byiza Renus, Dukuzumuremyi Fidèle na Mugisha Samuel wa Dimension Data yo muri Afurika y’Epfo, kuri ubu uri kwitoreza mu Rwanda yitegura Shampiyona y’Isi izabera mu Bwongereza guhera mu cyumweru gitaha.

Mu cyiciro cy’ingimbi cyazengurutse inshuro 15 (112.5 km), uwatsinze ni Muhoza Jean Eric ukinira Les Amis Sportifs, uyu wanaherukaga gutwara isiganwa rya Rwamagana Circuit.

Mu bakobwa bazengurutse inshuro 12 zingana n’ibilometero 90, uwa mbere yabaye Izerimana Olive wa Benediction Club y’i Rubavu, akurikirwa na mugenzi we bakinana, Ishimwe Diane.

Munyaneza Didier yakoresheje amasaha atatu, iminota 53 n’amasegonda 43, asiga amasegonda abiri Nsengiyumva Shemu wa Les Amis Sportifs wari umukirikiye.

Aba bombi bashyizemo hafi iminota umunani ku itsinda ry’abakinnyi bari babakurikiye.

Muhoza Eric yakoresheje amasaha atatu, iminota umunani n’amasegonda 26, arusha iminota 10 Niyitegeka Omar bakinana muri Les Amis Sportifs.

Rwanda Cycling Cup izakomeza mu kwezi gutaha, tariki ya 19 Ukwakira hakinwa Huye Circuit.

Uhiriwe Byiza Renus, Ukiniwabo Rene Jean Paul na Nzafashwanayo Jean Claude ba Benediction Excel Energy bakata ikorosi
Bamwe bahisemo kurira ibiti kugira ngo babashe kwihera ijisho uko abakinnyi b'amagare bakata mu mihanda ya Rubavu
Abenshi ntibasoje isiganwa kubera ibibazo by'amagare
Isiganwa ryacaga ku cyicaro cya Cogebanque mu Mujyi wa Rubavu
Gashiramanga Eugene wa Les Amis Sportifs mu isiganwa ryo kuri uyu wa Gatandatu
Nyabihu Cycling Club, Les Amis Sportifs na Benediction Excel Energy ni zo zari zitezwe kuri uyu wa Gatandatu
Muhoza Eric yajyanaga na bagenzi be ubwo isiganwa ryari rigitangira
Munyaneza Didier, Uhiriwe Byiza Renus, Mugisha Samuel (wa Dimension Data) na Manizabayo Eric bayoboye isiganwa mu kuzenguruka inshuro za mbere
Mugisha Samuel (wa Dimension Data muri Afurika y'Epfo) uri kwitegura Shampiyona y'Isi izabera mu Bwongereza, yabaye uwa gatandatu muri Kivu Race
Muhoza Eric wa Les Amis Sportifs iterwa inkunga na Cogebanque, ni we wabaye uwa mbere mu ngimbi
Izerimana Olive wa Benediction Club yatsinze bagenzi be mu cyiciro cy'abakobwa
Munyaneza Didier ukomoka i Nyabihu, ni we watsinze isiganwa mu bagabo n'abatarengeje imyaka 23
Nsengiyumva Shemu wa Les Amis Sportifs y’i Rwamagana yegukanye umwanya wa kabiri mu bagabo
Muhoza Eric ashyikirizwa ibihembo nk'uwatwaye isiganwa mu cyiciro cy'ingimbi
Izerimana Olive yahembwe na Cogebanque nyuma yo kuba uwa mbere mu bakobwa
Munyaneza Didier yahembwe nk'uwitwaye neza mu batarengeje imyaka 23
Munyaneza yanahembwe kandi nk'uwatwaye isiganwa rya Kivu Race

Amafoto: Usanase Anitha


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza