Munyaneza Didier yambaye umwenda w’umuhondo muri Tour du Sénégal

Yanditswe na Eric Tony Ukurikiyimfura
Kuya 11 Ugushyingo 2019 saa 09:42
Yasuwe :
0 0

Munyaneza Didier yambaye umwambaro w’umuhondo nyuma yo kwigaragaza mu gace ka kabiri ka Tour du Sénégal kakinwe kuri uyu wa Mbere muri iri siganwa u Rwanda ruhagarariwemo n’Ikipe ya Benediction Excel Energy.

Kuri uyu wa Mbere, abakinnyi bahagurukiye ahitwa Ziguinchor berekeza Kolda aho hari bavuye ejo hashize, ku ntera y’ibilometero 185. Aka gace kegukanwe n’Umunya-Slovakia, Jan Andrej Cully.

Umunyarwanda Munyaneza Didier ‘Mbappé’ witwaye neza muri aka gace ka kabiri, ni we wahise yambara umwenda w’umuhondo nyuma yo gukoresha amasaha icyenda, iminota 31 n’amasegonda 27 ku rutonde rusange.

Ararusha Umudage Linert Thomas wa Embrace the World, watwaye agace ka mbere, iminota itatu n’amasegonda 20 mu gihe undi Mudage ukinira iyi kipe, Keller Herman, we amurusha iminota itatu n’amasegonda 30.

Abanya-Slovakia, Canecky Marek na Kubis Lukas, bari ku mwanya wa gatatu n’uwa kane nyuma y’uduce tubiri tumaze gukinwa muri iri siganwa rigizwe n’uduce turindwi.

Manizabayo Eric ‘Karadiyo’ ni uwa karindwi ku rutonde rusange, arushwa iminota itatu n’amasegonda 42 mu gihe Byukusenge Patrick ari uwa cyenda arushwa iminota umunani n’amasegonda 40.

Nzafashwanayo Jean Claude ari ku mwanya wa 12 arushwa iminota 12 n’amasegonda 12 mu gihe Nkurunziza Yves wa 28, we arushwa na Mbappé iminota 21 n’amasegonda arindwi.

Tour du Sénégal yitabiriwe n’amakipe 11, izakomeza ku wa Gatatu hakinwa agace kayo ka gatatu, aho abakinnyi bazakora intera y’ibilometero 120 bava Ndangane berekeza i Nguéniène.

Mu ntangiriro z’uyu mwaka w’imikino 2019 nibwo Impuzamashyirahamwe y’Umukino wo gusiganwa ku Magare ku Isi ‘UCI’ yemeje Benediction Excel Energy Team nk’ikipe yo mu cyiciro cya gatatu cy’amakipe akina uyu mukino.

Benediction Excel Energy kuri ubu ya gatatu muri Afurika, yitabiriye Tour du Sénégal mu rwego rwo gushaka amanota ayifasha kuzamuka ku rutonde no kuzakina amarushanwa menshi mu mwaka utaha.

Munyaneza Didier yigaragaje mu gace ka kabiri ka Tour du Sénégal
Munyaneza Didier yahise yambara umwenda w’umuhondo muri Tour du Sénégal

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza