Munyaneza Didier akomeje kwigaragaza muri Grand Prix Chantal Biya 2019

Yanditswe na Eric Tony Ukurikiyimfura
Kuya 18 Ukwakira 2019 saa 07:20
Yasuwe :
0 0

Munyaneza Didier uzwi nka Mbappé akomeje kwigaragaza mu Isiganwa ry’Amagare rya Grand Prix Chantal Biya riri kubera muri Cameroun, aho yegukanye umwanya wa kabiri mu Gace ka Gatatu kakinwe kuri uyu wa Gatanu.

Kuri uyu wa 18 Ukwakira 2019, wari umunsi wa kabiri w’iri rushanwa ryitiwe umugore wa Perezida wa Cameroun, Paul Biya.

Agace ka Kabiri (Yaoundé-Bafia kari gafite intera ya kilometero 118,6) muri iri siganwa riri ku gipimo cya 2.2 ntabwo kakinwe kubera ko amakipe menshi yatinze kugera muri Cameroun maze gakurwaho kugira ngo rizarangire ku Cyumweru nk’uko byateguwe.

Umunyarwanda Munyaneza Didier wari wabaye uwa munani asizwe amasegonda umanani na Azzedine Lagab watwaye agace ka mbere ejo hashize, kuri uyu wa Gatanu yabaye uwa kabiri ubwo abakinnyi bakoraga intera y’ibilometero 150.6 hagati ya Yaoundé na Ebolowa.

Munyaneza yakoresheje amasaha atatu, iminota 34 n’amasegonda 45, ibihe bingana n’ibya Canecky Marek ukinira Dukla Banska Bystrica yo muri Slovaquie, wabaye uwa mbere. Lagab Azzedine watwaye agace ka mbere, yabaye uwa gatatu anganya ibihe n’aba bombi.

Byukusenge Patrick yasoje isiganwa ari mu itsinda rya gatatu ryasizwe amasegonda 10 n’abakinnyi ba mbere, aba uwa 16 mu gihe Nzafashwanayo Jean Claude yabaye uwa 19 asizwe amasegonda 21.

Ruberwa Jean Damascène yabaye uwa 21 asizwe amasegonda 45 naho Manizabayo Eric uzwi nka Karadiyo, aba uwa 28 asizwe umunota umwe n’amasegonda 26.

Umunya-Algérie Lagab Azzedine ni we uyoboye ku rutonde rusange nyuma y’uduce tubiri tumaze gukinwa, aho amaze gukoresha amasaha atandatu, iminota itatu n’amasegonda 17. Akurikiwe na Canecky Marek na Munyaneza Didier, bombi abarusha amasegonda umunani gusa.

Munyaneza ni we kugeza ubu wambaye umwambaro w’umukinnyi muto uri kwitwara neza mu isiganwa mu gihe Umunya-Cameroun Nounawe Kuewere Rodrigue Eric ari we urusha abandi amanota mu kuzamuka imisozi.

Grand Prix Chantal Biya 2019 irakomeza kuri uyu wa Gatandatu hakinwa agace ka kane, aho abakinnyi bakora intera y’ibilometero 116.4 hagati ya Zoétélé- Npwang na Meyomessala.

Munyaneza Didier yabaye uwa kabiri mu gace ka gatatu ka Grand Prix Chantal Biya iri kubera muri Cameroun
Munyezaneza w'imyaka 21, kuri ubu ayoboye abakinnyi bato muri iri siganwa
Team Rwanda ni imwe mu makipe arindwi ari muri iri rushanwa riri kuba ku nshuro ya 19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza