Mugisha Samuel yegukanye Criterium Byemayire aranayimutura (Amafoto)

Yanditswe na Eric Tony Ukurikiyimfura
Kuya 19 Ukwakira 2019 saa 04:38
Yasuwe :
0 0

Mugisha Samuel kuri ubu udafite ikipe nyuma yo gutandukana na Dimension Data for Qhubeka yo muri Afurika y’Epfo, ni we wegukanye isiganwa rya Criterium Byemayire Lambert, ryabaye kuri uyu wa Gatandatu rizenguruka Umujyi wa Huye wo mu Ntara y’Amajyepfo.

Criterium Byemayire yibukiwemo nyakwigendera Byemayire Lambert wari Visi Perezida w’Ishyirahamwe ry’Umukino w’Amagare (FERWACY), ni isiganwa rya gatanu rya Rwanda Cycling Cup 2019 iterwa inkunga na Banki Nyarwanda y’Ubucuruzi ya Cogebanque n’Uruganda rw’ibinyobwa rwa Skol.

Abakinnyi bose bakinnye muri iri siganwa, bahagurutse saa 10:26, bazenguruka intera y’ibilometero 5.6 bahagurukiye imbere y’Isoko rya Huye berekeze kuri Stade Huye - Petit Séminaire de Karubanda - Hôtel TWIGA- RRA - Ku Isoko.

Mu cyiciro cy’abagabo bakuru n’abatarengeje imyaka 23 bazengurutse inshuro 20 zireshya n’ibilometero 112, uwa mbere yabaye Mugisha Samuel wasize Habimana Jean Eric wa Skol Fly Cycling Club na Rugamba Janvier wa Les Amis Sportifs y’i Rwamagana, bose bakoresheje amasaha abiri, iminota 40 n’amasegonda 31.

Aba bakinnyi uko ari batatu, ni bo bari bamaze igihe bayoboye isiganwa, aho basimburawaga imbere n’abarimo Nkurunziza Yves wa Benediction Excel Energy na Hakizimana Seth wa Les Amis Sportifs.

Mu cyiciro cy’ingimbi zazengurutse inshuro 15 zingana n’ibilometeo 84, uwa mbere yabaye Bikorimana Elysée wa Benediction Excel Energy, wakoresheje amasaha abiri, iminota itandatu n’amasegonda 47.

Hategekimana Jean Bosco wa Les Amis Sportifs, ni we wabaye uwa kabiri akoresheje ibihe bimwe n’uwa mbere mu gihe Baraka Pacis wa CCA yakoresheje amasaha abiri, iminota irindwi n’amasegonda 12.

Mu bagore bazengurutse inshuro 12 zihwanye n’ibilometero 67.2, uwa mbere yabaye Ingabire Diane wa Benediction Club.

Nyuma yo kwegukana Criterium, Mugisha Samuel wemeje ko azajya gukina mu Bufaransa, yavuze ko yashakaga kwegukana iri siganwa akaritura Byemayire Lambert wari inshuti ye.

Ati ”Ni isiganwa ryari ritoroshye ariko nari niyemeje kuryegukana kugira ngo nditure Byemayire kuko yarankundaga cyane, hari n’igihe yigeze kunshyiriraho intego ngo nitware neza mu isiganwa.”

Iyamuremye Antoine ushinzwe Iyamamazabikorwa muri Cogebanque, yavuze ko bashimishijwe n’ubwitabire bw’abatuye Akarere ka Huye muri iri siganwa, yongera kubashishikariza kwitabira gahunda za Cogebanque zirimo no kubyaza umusaruro amahirwe banki yabegereje yo kubona inguzanyo yafasha abashaka gutunga inzu zabo.

Cogebanque kandi yanibukije abakiliya bayo ko yagaruye serivisi y’inguzanyo ku mushahara ku bayihemberwamo aho bashobora guhabwa agera kuri miliyoni 5 Frw nta ngwate kandi bigakorwa mu gihe gito.

Rwanda Cycling Cup 2019 izakomeza tariki ya 2 Ugushyingo 2019, hakinwa isiganwa rizabera i Muhanga.

Mugisha Samuel n'abakinnyi ba Benediction Excel Energy mbere yo gutangira isiganwa
Ikipe ya Les Amis Sportifs y'i Rwamagana iterwa inkunga na Cogebanque yitabiriye iri siganwa. Iyi banki yanashyize igorora abanyamushahara aho bashobora kubona inguzanyo yabafasha gukemura ibibazo bitandukanye nta ngwate bibasabye
Isiganwa rya Criterium Byemayire ryabereye mu Karere ka Huye aho nyakwigendera yari atuye
Isiganwa rya Criterium Byemayire ryabereye mu Karere ka Huye, ryibukiwemo uyu mugabo wabaye Visi Perezida w’Ishyirahamwe ry’Umukino w’Amagare (FERWACY)
Mugisha Samuel yageze ku murongo ari uwa mbere
Cogebanque nk'umuterankunga w'imena inatanga ibihembo bitandukanye ku bakinnyi bitwaye neza. Iyi banki Nyarwanda ikomeje gusobanurira Abanyarwanda n'abakiliya bayo amahirwe banki yabegereje yo kubona inguzanyo yabafasha gutunga inzu zabo
Umuyobozi ushinzwe Iyamamazabikorwa muri Cogebanque, Iyamuremye Antoine, yavuze ko bashimishijwe n’ubwitabire bw'Abanye-Huye, anakomeza kubashishikariza kugana serivisi za banki zirimo n'iy'inguzanyo bahabwa mu gihe bashaka kugura cyangwa kuvugurura inzu, ku nyungu ya 16%
Umuryango wa Byemayire wamwibutse mu buryo bwihariye

Amafoto: Niyonzima Moïse


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza