Mugisha Samuel ntiyahiriwe muri Shampiyona y’Isi y’Amagare ya 2020

Yanditswe na Eric Tony Ukurikiyimfura
Kuya 27 Nzeri 2020 saa 10:58
Yasuwe :
0 0

Mugisha Samuel, umukinnyi rukumbi wari uhagarariye u Rwanda muri Shampiyona y’Isi y’Amagare ya 2020 yaberaga mu Mujyi wa Imola mu Butalitani, ntiyasoje isiganwa ryo mu muhanda ryakinwe kuri iki Cyumweru.

Mugisha Samuel werekeje mu Bufaransa mu ikipe ye nshya ya Team LMP - la roche sur yon mu ntangiriro za Kanama ubwo ingendo z’indege zari zisubukuwe, ni we wahagarariye u Rwanda uyu mwaka kuko abandi, bari imbere mu gihugu, bagowe no kubona ibyangombwa byo kujya mu Butaliyani.

Kuri uyu wa 27 Nzeri 2020 nibwo yakinnye isiganwa ryo mu muhanda (Road Race), ryakinwe mu cyiciro cy’abagabo, ku ntera y’ibilometero 259.2 birimo metero 5000 zizamuka. Iyi ntera basiganweho ni umuzenguruko w’ibilometero 28, bakoze inshuro icyenda.

Mugisha Samuel waheruka isiganwa ryo kurushanwa muri Tour du Rwanda yasojwe tariki ya 1 Werurwe, yasizwe n’igikundi habura ibilometero 134 ngo isiganwa rirangire mu gihe yavuye mu isiganwa hasigaye kuzenguruka inshuro eshatu gusa.

Nyuma y’isiganwa, yavuze ko atari umusaruro yari yiteze, ariko kuba yari amaze igihe kirekire adasiganwa biri mu byamubereye imbogamizi.

Ati “Ntabwo ari umusaruro nashakaga. Isiganwa ryari ku rwego rwo hejuru, abenshi bavuye muri Tour de France, abandi bari kwitegura Giro d’Italia, bahagaze neza. Ni isiganwa ryanjye rya kabiri kuva muri Werurwe [Tour du Rwanda 2020], nagerageje kugenda mu gikundi, bigeze aho bakinira mu makipe ndasigara.”

Iri siganwa ryegukanywe n’Umufaransa Julian Alaphilippe wakoresheje amasaha atandatu, iminota 38 n’amasegonda 34, arushije amasegonda 24 igikundi cyarimo Umubiligi Wout van Aert.

Mu 2019, u Rwanda rwari rwahagarariwe n’abakinnyi bane muri Shampiyona y’Isi yabereye mu Mujyi wa Yorkshire mu Bwongereza.

Mu gusiganwa mu muhanda (Road Race), Mugisha Moïse na Mugisha Samuel ntibasoje isiganwa mu gihe mu ngimbi, Uhiriwe Byiza Renus yasoje isiganwa ari ku mwanya wa 45 naho Habimana Jean Eric ntiyasoza.

Ni ku nshuro ya karindwi u Rwanda rwitabiriye Shampiyona y’Isi kuko bwa mbere hari mu 2014 ubwo yaberaga i Ponferrada muri Espagne, ariko kugeza ubu nta mukinnyi urabasha kwegukana umudali.

Shampiyona y'Isi y'Amagare ya 2020 yitabiriwe n'abakinnyi benshi mu Mujyi wa Imola
Mugisha Samuel na Amanuel Gebreigzabhier wo muri Eritrea, bambaye udupfukamunwa mu rwego rwo kwirinda Coronavirus
Mugisha Samuel mu gikundi hamwe n'abarimo Zhandos Bizhigitov wo muri Kazakhstan
Mugisha Samuel yavuye mu isiganwa hasigaye kuzenguruka inshuro eshatu
Umufaransa Julian Alaphilippe ni we watwaye Shampiyona y'Isi y'Amagare ya 2020

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .