Mugisha Samuel na Mugisha Moïse mu ikipe y’u Rwanda izakina Tour du Faso nyuma y’imyaka 13

Yanditswe na Eric Tony Ukurikiyimfura
Kuya 22 Ukwakira 2019 saa 01:40
Yasuwe :
0 0

Mugisha Samuel na Mugisha Moïse baheruka kwitabira Shampiyona y’Isi y’amagare yabereye mu Bwongereza, bari mu bakinnyi batandatu batoranyijwe n’umutoza Sempoma Félix ngo bazitabire irushanwa rya Tour du Faso rizengukana igihugu cya Burkina Faso.

Guhera kuri uyu wa Gatanu ni bwo hazatangira ku nshuro ya 32 iri rushanwa rya Tour du Faso rizitabirwa n’amakipe 15 arimo iy’u Rwanda.

Ni isiganwa rigizwe n’iminsi 10 kuva tariki ya 25 Ukwakira kugeza ku ya 3 Ugushyingo 2019, aho rizaba rireshya n’ibilometero 1205 mu duce twose tuzakinwa.

Ikipe y’u Rwanda izakina muri siganwa izaba igizwe na Mugisha Samuel uheruka gukina Shampiyona y’Isi yabereye i Yorkshire mu Bwongereza ndetse akaba yaranatwaye Criterium Byemayire Lambert yabaye mu mpera z’icyumweru gishize muri Rwanda Cycling Cup 2019.

Hari kandi Mugisha Moïse wari umaze iminsi yitoreza mu Bufaransa, aho na we yakinnye Shampiyona y’Isi mu Bwongereza.

Aba bombi bazajyana na Hakizimana Seth usanzwe ukinira Les Amis Sportifs y’i Rwamagana na Munyaneza Didier ‘Mbappé’ uheruka gutorwa nk’umukinnyi mwiza ukiri muto muri Grand Prix Chantal Biya yasojwe muri Cameroun ku Cyumweru.

Hari kandi Uwizeye Jean Claude usanzwe ukina mu Bufaransa na Nzafashwanayo Jean Claude na we wari mu ikipe y’u Rwanda yavuye muri Cameroun kuri uyu wa Mbere.

Ni ku nshuro ya mbere u Rwanda rugiye kwitabira iri siganwa kuva mu 2006.

Umunsi ufungura isiganwa ry’uyu mwaka uzakinirwa mu Murwa mukuru, Ouagadougou, aho abakinnyi bazasiganwa umuntu ku giti cye (CMI/ITT).

Urugendo rurerure ruri ku munsi wa karindwi, aho bazakina intera y’ibilometero 182.5 mu gihe umunsi wa nyuma ureshya n’ibilometero 100.6.

Umunya-Burkina Faso, Mathias Sorgho, ni we watwaye iri siganwa mu 2018 asize uwa kabiri amasegonda 13.

Ikipe igiye guhagararira u Rwanda irahaguruka i Kigali kuri uyu wa Gatatu.

Uduce tugize Tour du Faso 2019:

  • Ku wa 25 Ukwakira : Team Time Trial (ITT):
  • Ku wa 26 Ukwakira: Nagreongo- Tenkodogo: 150,5 Km
  • Ku wa 27 Ukwakira: Tenkodogo-Dapaong (Togo): 145 Km
  • Ku wa 28 Ukwakira: Bittou-Koupela: 101,8 Km
  • Ku wa 29 Ukwakira: Bousse-Ouahigouya: 135,5 Km
  • Ku wa 30 Ukwakira: Ouagadougou-Koudougou: 118,3 Km
  • Ku wa 31 Ukwakira: Dedougou-Bobo Dioulaso: 182 Km+ Circuit
  • Ku ya 1 Ugushyingo: Bobo Dioulaso-Sindou: 137,5 Km
  • Ku ya 2 Ugushyingo: Bobo Dioulaso-Diebougou: 133,3 Km
  • Ku ya 3 Ugushyingo: Kombissiri-Ouagadougou: 100,6 Km + Circuit
Mugisha Samuel ni umwe mu bakinnyi bazaba bayoboye ikipe y'u Rwanda izakina Tour du Faso
Mugisha Moïse na we azakina muri iri rushanwa u Rwanda rwari rumaze imyaka 13 rutitabira
Hakizimana Seth wa Les Amis Sportifs na we yahamagawe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza