Mugisha Samuel azahagararira u Rwanda muri Shampiyona y’Isi y’Amagare ya 2020

Yanditswe na IGIHE
Kuya 17 Nzeri 2020 saa 09:09
Yasuwe :
0 0

Ishyirahamwe ry’Umukino wo gusiganwa ku Magare mu Rwanda (FERWACY) ryemeje ko Mugisha Samuel ari we uzahagararira u Rwanda muri Shampiyona y’Isi y’uyu mukino izabera mu Mujyi wa Imola mu Butaliyani hagati ya tariki ya 24 n’iya 27 Nzeri 2020.

Mugisha Samuel witozanyaga na bagenzi be kuva muri Nyakanga, yerekeje mu Bufaransa mu ikipe ye nshya ya Team LMP - la roche sur yon mu ntangiriro za Kanama ubwo ingendo z’indege zari zisubukuwe.

Bitewe n’ibihe bikomeye bya COVID-19 Isi yose irimo, hakozwe impinduka mu buryo Shampiyona y’Isi ya 2020 yategurwagamo, hemezwa ko izakinwa n’icyiciro cy’abakuru gusa mu bagabo n’abagore.

Mu kwezi gushize, Impuzamashyirahamwe y’Umukino w’Amagare ku Isi (UCI) yatangaje ko benshi mu bagabo n’abagore bazitabira Shampiyona y’Isi, ubu bari gusiganwa mu Bufaransa mu gihe abatarengeje imyaka 23 n’ingimbi, bari mu bihugu byabo ku buryo bagorwa no kwerekeza mu Butaliyani bitewe n’ingamba zafashwe n’ibihugu bitandukanye.

Ibi ni byo byashingiweho FERWACY yemeza ko Mugisha Samuel- uri mu Bufaransa- ari we uzakina Shampiyona y’Isi y’Amagare ya 2020 kuko Areruya Joseph na Mugisha Moïse bari mu Rwanda, batari koroherwa no kubona ibyangombwa (visa) byo kujya mu Butaliyani.

Umujyi wa Imola wahawe kwakira iri rushanwa rikomeye nyuma y’uko ku wa 12 Kanama aribwo hatangajwe ko Shampiyona y’Isi y’Amagare ya 2020 itakibereye mu Busuwisi kubera ingamba zafashwe zibuza guhurira ahantu hamwe kw’abantu bagera ku 1000 kugeza tariki ya 1 Ukwakira.

Mu isiganwa ryo mu muhanda (Road Race), abagabo bazakora intera y’ibilometero 259.2 birimo metero 5000 zizamuka mu gihe abagore bazakora intera y’ibilometero 144 birimo metero 2750 z’akazamuko. Iyi ntera bazasiganwaho ni umuzenguruko w’ibilometero 28, abagabo bazakora inshuro icyenda naho abagore bakahazenguruka inshuro eshanu.

Mu gusiganwa n’ibihe (Time Trial), abakinnyi bazasiganwa intera y’ibilometero 32.

Ku wa 24 Nzeri nibwo abagore bazasiganwa n’ibihe buri muntu ku giti cye, umunsi ukurikiyeho hakine abagabo. Ku wa 26 Nzeri nabwo hazakina abagore basiganwa mu muhanda mu gihe abagabo bazakina isiganwa nk’iryo ku munsi wa nyuma.

Umujyi wa Imola wahawe kwakira Shampiyona y’Isi y’Amagare ya 2020, uherereye mu bilometero 40 uvuye mu Mujyi wa Bologna. Waherukaga kwakira Shampiyona y’Isi mu 1968.

Mu mwaka ushize, u Rwanda rwahagarariwe n’abakinnyi bane muri Shampiyona y’Isi yabereye mu Mujyi wa Yorkshire mu Bwongereza.

Mu gusiganwa mu muhanda (Road Race), Mugisha Moïse na Mugisha Samuel ntibasoje isiganwa mu gihe mu ngimbi, Uhiriwe Byiza Renus yasoje isiganwa ari ku mwanya wa 45 naho Habimana Jean Eric ntiyasoza.

Ni ku nshuro ya karindwi u Rwanda rugiye kwitabira Shampiyona y’Isi kuko bwa mbere hari mu 2014 ubwo yaberaga i Ponferrada muri Espagne.

Mu nshuro esheshatu ziheruka u Rwanda rwitabiriye Shampiyona y’Isi (2014, 2015, 2016, 2017, 2018 na 2019) nta mukinnyi urabasha kwegukana umudali.

Mugisha Samuel ni we uzahagararira u Rwanda muri Shampiyona y’Isi y’Amagare ya 2020 izabera mu Mujyi wa Imola mu Butaliyani

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .