Mugisha Moïse yasabwe kumara iminsi 30 adakoresha igare

Yanditswe na Eric Tony Ukurikiyimfura
Kuya 22 Kanama 2020 saa 09:49
Yasuwe :
0 0

Nyuma yo gukora impanuka ku wa Gatanu, umukinnyi wo gusiganwa ku magare wa Team Rwanda na Skol Adrien Cycling Academy (SACA), Mugisha Moïse, yasabwe kumara iminsi 30 adatwara igare kugira ngo abashe gukira neza.

Mugisha Moïse yagonzwe n’ikamyo ku Ruyenzi ubwo yari mu myitozo yahawe n’umutoza w’ikipe y’Igihugu, Sterling Magnell mu rwego rwo kwitegura Shampiyona y’Isi y’Amagare izaba mu kwezi gutaha.

Uyu musore w’imyaka 23, yahise ajyanwa ku bitaro bya Plateau mu Mujyi wa Kigali, yitabwaho n’abaganga ndetse arara asubiye mu mwiherero aho abana na bagenzi be bakinana muri SACA.

Ubuyobozi bw’iyi kipe bwabwiye IGIHE ko “Mugisha Moïse yasabwe n’abaganga kumara iminsi 30 nta kintu akora kugira ngo abanze gukira neza nubwo atakomeretse bikomeye.”

Amakuru avuga ko Mugisha yakoze impanuka ubwo yakatiraga umunyamaguru wari mu muhanda, bivugwa ko ari umurwayi wo mu mutwe, maze muri uko kugaruka mu muhanda nibwo ikamyo yahise imugonga nubwo ku bw’amahirwe yasimbutse igare akagwa hakurya y’umuhanda.

Igare Mugisha Moïse yakoreshaga mu myitozo ni iryo mu ikipe ye ya SACA, ryarangiritse ndetse bivugwa ko hamwe n’ibikoresho byose ryari rifite, bigera mu gaciro ka miliyoni 12 Frw.

Agaruka kuri iyi mpanuka, Sterling Magnell utoza Team Rwanda, yavuze ko iyo abakinnyi bari mu muhanda ubuzima bwabo buba buri mu kaga, asaba ko bajya bitabwaho.

Mugisha Moïse uzakina Shampiyona y’Isi y’Amagare ya 2020 izaba mu kwezi gutaha, ni we Munyarwanda witwaye neza muri Tour du Rwanda 2020, asoreza ku mwanya wa kabiri.

Mugisha Moïse watangiye kwitabira amarushanwa mpuzamahanga mu 2018, yatwaye Shampiyona ya Afurika n’iy’u Rwanda mu batarengeje imyaka 23 mu 2019.

Yatwaye kandi Umudali w’Umuringa mu mikino nyafurika iheruka kubera muri Maroc abakinnyi basiganwa n’ibihe (Individual Time Trial).

Mugisha Moïse ari kumwe na bagenzi be kandi begukanye umudari w’Umuringa mu gusiganwa n’ibihe nk’ikipe “Team Time Trial” muri iyi mikino Nyafurika “All African Games 2019” yabereye muri Maroc.

Mugisha Moïse wakoze impanuka ku wa Gatanu, yasabwe kumara iminsi 30 adakoresha igare
Mugisha Moïse ni we Munyarwanda waje hafi muri Tour du Rwanda 2020, aba uwa kabiri ku rutonde rusange

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .