Mugisha Moïse yagumanye umwenda w’umuhondo nyuma y’agace ka gatatu ka Grand Prix Chantal Biya

Yanditswe na Eric Tony Ukurikiyimfura
Kuya 20 Ugushyingo 2020 saa 06:00
Yasuwe :
0 0

Umunyarwanda Mugisha Moïse yasoreje isiganwa ku mwanya wa gatatu mu gace ka gatatu ka Grand Prix Chantal Biya kakinwe kuri uyu wa Gatanu, akomeza kwambara umwenda w’umuhondo.

Kuri uyu munsi wa gatatu w’isiganwa, abakinnyi bahagurukiye i Yaoundé berekeza i Ebolowa muri Nkolandom, ahasorejwe isiganwa nyuma yo gukora intera y’ibilometero 167.

Aka gace kegukanywe n’Umunya-Slovakia Kubiš Lukáš, wakoresheje amasaha atatu, iminota 51 n’amasegonda 36, anganya ibihe bimwe n’Umunya-Cameroun Kamzong Clovis ndetse na Mugisha Moïse wabaye uwa gatatu mu gihe Mugisha Samuel wa kane, yasizwe amasegonda atanu.

Munyaneza Didier ni undi Munyarwanda waje hafi muri aka gace ka gatatu, aho yabaye uwa cyenda, asizwe amasegonda 22.

Ku rutonde rusange, Mugisha Moïse ari ku mwanya wa mbere, aho amaze gukoresha amasaha icyenda, iminota 28 n’amasegonda 56, arusha amasegonda 34 Kubiš Lukáš w’ikipe ya Slovakia, unganya ibihe na Kamzong Clovis wa SNH Vôlo Club.

Mugisha Samuel ari ku mwanya wa gatandatu, arushwa amasegonda 45 mu gihe Munyaneza Didier ari uwa 10, arushwa umunota n’amasegonda 10.

Mu gace kabanziriza aka kanyuma, ku wa Gatandatu, abasiganwa bazahagurukira i Zoétélé berekeza muri Nkpwang- Meyomessala ku ntera y’ibilometero 116,4 .

Grand Prix Chantal Biya iri kuba ku nshuro ya 20 iri ku bipimo bya 2.2 ku ngengabihe y’Ishyirahamwe ry’Umukino w’Amagare ku Isi (UCI), izasozwa ku wa 22 Ugushyingo 2020, nyuma yo kuzenguruka ibilometero 699,4.

Yitabiriwe n’amakipe icyenda arimo iy’u Rwanda, Repubulika Iharanira Demokarasi ya Congo, Benin, Côte d’Ivoire, Burkina Faso, Sénégal, Mali, Dukla Banska Bystrica yo muri Slovaquie na SNH Vélo Club yo muri Cameroun.

Ubwo Team Rwanda yaherukaga kwitabira Grand Prix Chantal Biya mu mwaka ushize, Munyaneza Didier ni we Munyarwanda waje hafi, asoreza ku mwanya wa kane, anatahana umwambaro w’umukinnyi muto wigaragaje mu irushanwa.

Umunya-Slovakia Kubiš Lukáš yegukanye agace ka gatatu ka Grand Prix Chantal Biya
Mugisha Moïse yagumanye umwenda w’umuhondo nyuma y’agace ka gatatu ka Grand Prix Chantal Biya
Mugisha w'imyaka 22, yahembwe kandi nk'umukinnyi ukiri muto witwaye neza muri aka gace ka gatatu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .