Mugisha Moïse umaze kwigaragaza mu mukino w’amagare yabonye ikipe nshya mu Bufaransa

Yanditswe na Eric Tony Ukurikiyimfura
Kuya 30 Mata 2019 saa 02:27
Yasuwe :
0 0

Umwe mu bakinnyi bakiri bato mu gusiganwa ku magare mu Rwanda, Mugisha Moïse wakiniraga Skol-Fly Cycling Club, yamaze kubona ikipe nshya, Pays Olonne Cycliste Côte de Lumière (POCCL) yo mu gihugu cy’u Bufaransa.

Mugisha Moïse w’imyaka 21 ni umwe mu bakinnyi bazamutse vuba muri uyu mukino w’amagare, aho yatangiriye gusiganwa muri iyi kipe ya Skol-Fly Cycling Club muri Nyakanga 2017.

Mu kiganiro yagiranye na IGIHE, uyu mukinnyi yavuze ko yashimishijwe no kugirirwa icyizere n’iyi kipe ikomeye, aho afite intego yo kuvamo umukinnyi ukomeye kurenza abandi banyarwanda.

Ati ”Nabyakiriye neza kuko ni ikintu nifuzaga mu buzima bwanjye kuko kuba naguma gukina hano mu Rwanda ntabwo byari binshimishije, nahoraga nkora cyane kugira ngo nanjye ngere aho abandi bageze mbashe no kuharenga.”

“Ntabwo iriya kipe nayitekerezaga cyane, bavuganye n’ikipe nkinira ubwo twari muri Ethiopia, nzasinya ngezeyo. Aho natekerezaga ni muri Dimension Data kuko umutoza w’ikipe y’igihugu Sterling Magnell yari abirimo.”

Uyu mukinnyi yavuze ko kumvira abatoza ari bimwe mu bimufasha kwitwara neza, yongeraho ko ibihe byiza amaze kugeraho muri uyu mukino w’amagare harimo kuba amaze gukina amarushanwa akomeye ku mugabane wa Afurika, aho intego afite ari ugukomeza gukora cyane akazakina Tour de France.

Ati ”Niteguye gukora cyane kurusha uko nakoze mu minsi ishize. Mfite inzozi ko ngomba kuzakina Tour de France byanze bikunze.”

Moïse agiye kuba umukinnyi wa gatatu w’umunyarwanda ukiniye Pays Olonne Cycliste Côte de Lumière nyuma ya Valens Ndayisenga na Uwizeye Jean Claude ukiyirimo.

Muri Tour du Rwanda ya 2018, yari ku rwego rwa 2.2, uyu mukinnyi yasoreje ku mwanya wa 10 ku rutonde rusange mu gihe muri Rwanda Cycling Cup 2018, yegukanye agace ka Karongi Challenge, kamwe muri 11 twari tugize shampiyona y’amagare mu Rwanda mu mwaka ushize.

Mugisha Moïse yari mu ikipe yakinnye Tour du Rwanda 2019 na Tour de l’Espoir muri Cameroun mu gihe yanitabiriye shampiyona nyafurika y’amagare yabereye muri Ethiopia, ahakura imidali ibiri irimo uwa Zahabu mu batarengeje imyaka 23.

Biteganyijwe ko uyu mukinnyi ahaguruka mu Rwanda kuri uyu wa Gatatu mu gihe ibyangombwa bye by’inzira byaba bibonekeye igihe.

Mugisha Moïse ubwo yegukanaga agace ka Rwanda Cycling Cup 2018 i Karongi
Mugisha Moïse yegukanye agace gasoza Tour de l’Espoir muri Cameroun muri uyu mwaka
Mugisha Moïse yegukanye umudali wa Zahabu mu batarengeje imyaka 23 muri Shampiyona Nyafurika y'Amagare yabereye muri Ethiopia mu kwezi gushize

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza