Gushyira iki kigo gishamikiye kuri UCI gitoza umukino w’amagare mu Rwanda ni umushinga wari umaze hafi imyaka itandatu ndetse wagombaga gukorerwa ahari ikigo cy’iterambere ry’uyu mukino i Musanze (Africa Rising Cycling Center).

Kuri uyu wa Gatandatu, Ishyirahamwe ry’Umukino w’Amagare mu Rwanda (FERWACY) ryatangaje ko iyi Centre “izafasha u Rwanda n’ibihugu byo mu karere guteza imbere uyu mukino mu gutoza abakinnyi, abatoza, abakomiseri n’abandi. Izakorera mu turere twa Musanze, Rwamagana na Bugesera.”

Mu Karere ka Musanze ni ho hazajya habera imyitozo yo ku butumburuke bwo hejuru, amacumbi n’amashuri.

Mu Bugesera hazaba hegereye ikibuga gishya cy’indege kizuzura mu myaka itatu iri imbere, hazajya habera amasiganwa yo kuzenguruka mu mihanda ifunze, gukinira muri ‘pumptrack’ ndetse na ho hazaba hari ibyumba byo kwigiramo.

Nk’ahantu hari ubushake bwo guteza imbere umukino w’amagare, i Rwamagana hazajya hateza imbere uyu mukino ku bagore ndetse hatoranyijwe kubera ko haberanye n’amasiganwa yo kuzenguruka.

Iyi Centre Satellite yo mu Rwanda izaba iya kabiri muri Afurika nyuma y’iya Paarl muri Afurika y’Epfo, yo yashinzwe mu 2005 aho yitorezamo abakinnyi batandukanye kuri uyu Mugabane barimo n’Abanyarwanda.

Uretse muri Afurika, ahandi UCI ifite ibigo nk’ibi ni mu Bushinwa, Nouvelle-Zélande, Canada, Trinad & Tobago, u Buyapani, Koreya y’Epfo, u Buhinde na Portugal.

Mu 2025, u Rwanda ruzaba igihugu cya mbere cya Afurika kizakira Shampiyona y’Isi y’Amagare.

U Rwanda rwabaye igihugu cya cyenda gishyizwemo Centre Satellite ya UCI

U Rwanda rusanzwe rufite ikigo cy'iterambere ry'umukino w'amagare i Musanze ndetse byitezwe ko ari ho hazanakorera Centre Satellite ya UCI

Uhiriwe Byiza Renus (wa kabiri uturutse iburyo) ni umwe mu bakinnyi b'Abanyarwanda bagiye kwitoreza muri Centre Satellite yo muri Afurika y'Epfo

Minisitiri wa Siporo, Nyirishema Richard na Perezida wa FERWACY, Ndayishimiye Samson, bari i Zurich ahari kubera Shampiyona y'Isi y'Amagare ya 2024