Manizabayo Eric na Byukusenge Patrick mu bazahagararira u Rwanda muri Grand Prix Chantal Biya

Yanditswe na Eric Tony Ukurikiyimfura
Kuya 12 Ukwakira 2019 saa 11:16
Yasuwe :
0 0

Manizabayo Eric uzwi nka Karadiyo na Byukusenge Patrick batoranyijwe mu bakinnyi batanu bazahagararira Ikipe y’Igihugu y’Umukino w’Amagare (Team Rwanda) mu irushanwa rya ‘‘Grand Prix Chantal Biya’’ ribera muri Cameroun.

Grand Prix Chantal Biya iri ku bipimo bya 2.2 ku ngengabihe y’Ishyirahamwe ry’Umukino w’Amagare ku Isi (UCI) izatangira ku wa 16 Ukwakira, isozwe ku wa 20 Ukwakira 2019.

Urutonde rw’abakinnyi bagize Team Rwanda rwashyizwe hanze n’Umutoza wayo, Byukusenge Nathan. Rugizwe na Nzafashwanayo Jean Claude, Munyaneza Didier, Manizabayo Eric bakinira Benediction Excel Energy y’i Rubavu, Byukusenge Patrick na Ruberwa Jean Damascène wa Nyabihu Cycling Club.

Ikipe y’u Rwanda izahaguruka mu Rwanda ku wa Mbere mu gitondo, iminsi ibiri mbere y’isiganwa.

Iri rushanwa rigiye kuba ku nshuro ya 19 rizitabirwa n’amakipe 10 arimo atatu yo muri Cameroun. Rizaba rigizwe n’uduce dutanu.

Grand Prix Chantal Biya ibera muri Cameroun kuva mu 2001. Iterwa inkunga n’Ishyirahamwe ryo gusiganwa ku magare muri iki gihugu. Iri rushanwa ryitiriwe Chantal Biya, umugore wa Perezida wa Cameroun, Paul Biya.

Mu mwaka ushize, Grand Prix Chantal Biya yegukanywe n’Umunya-Slovakia Juraj Bullan w’imyaka 23 mu gihe ikipe y’u Rwanda itasoje isiganwa kubera impanuka.

Uduce dutanu tugize Grand Prix Chantal Biya 2019:

  • Ku wa 16 Ukwakira 2019: Bertoua- Abong- Mbang, 109,6 km
  • Ku wa 17 Ukwakira 2019: Yaoundé -Bafia, 118.6 km
  • Ku wa 18 Ukwakira 2019: Yaoundé – Ebolowa, 150.6 km
  • Ku wa 19 Ukwakira 2019: Zoétélé- Npwang- Meyomessala, 116.4 km
  • Ku wa 20 Ukwakira 2019: Sangmélima – Yaoundé- Douala , 166.2 km
Manizabayo Eric uzwi nka "Karadiyo" ari mu bazitabira Grand Prix Chantal Biya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza