Les Amis Sportifs ifashwa na Cogebanque yateguye irushanwa ryo gushaka abanyempano bashya

Yanditswe na Eric Tony Ukurikiyimfura
Kuya 11 Ukuboza 2019 saa 03:37
Yasuwe :
0 0

Ikipe ya Les Amis Sportifs iheruka kwegukana umwanya wa mbere mu cyiciro cy’ingimbi mu marushanwa ngarukamwaka ya Rwanda Cycling Cup 2019, yateguye irushanwa rya ‘‘Rwamagana Challenge’’ rigamije gushaka impano nshya z’abakinnyi b’amagare.

Iri rushanwa ryateguwe ku bufatanye na Banki y’Ubucuruzi ya Cogebanque mu rwego rwo guteza imbere umukino w’amagare mu Ntara y’i Burasirazuba, rizabera mu Karere ka Rwamagana ku wa Gatandatu tariki ya 14 Ukuboza guhera saa tatu z’igitondo.

Umuyobozi wa Les Amis Sportifs iterwa inkunga na Cogebanque Plc, Kagwiza Youssuf, yabwiye IGIHE ko ari rushanwa rizitabirwa n’abakinnyi bakiri bato, batarengeje imyaka 22 ndetse hakazifashishwa amagare asanzwe azwi nka pinebalo (Pneu-ballon).

Ati “Abemerewe kwitabira iri rushanwa ni abafite hagati y’imyaka 12 na 22, bafite ubwisungane mu kwivuza by’akarusho amagare yabo akaba ari mazima. Hazakoreshwa amagare asanzwe ya pinebalo (Pneu-Ballon) cyangwa Phoenix.’’

Abashaka kwitabira iri rushanwa bari kwandikirwa ku Ishami rya Cogebanque riri mu Karere ka Rwamagana.

Kagwiza yakomeje avuga ko mu bihembo bizahabwa abakinnyi bazitwara neza, harimo kubaha amahirwe yo gukinira Les Amis Sportifs.

Ati ‘‘Abakinnyi batanu ba mbere mu basore n’abakobwa turabahemba kuko bajya muri Les Amis Sportifs. Hazatangwa amafaranga ariko abazaba aba mbere bazahabwa amagare yemewe akoreshwa mu masiganwa.’’

Yakomeje ati ‘‘Abo dufashe tubaha amagare yo mu misozi abafasha kubanza kumenya gukoresha vitesi.’’

Ni ku nshuro ya kabiri hateguwe iri rushanwa, aho mu mwaka ushize ryegukanwe na Habimana Eric mu bahungu mu gihe mu bakobwa ryatwawe na Bigenimama Clarisse. Mu ngimbi hatsinze Nsengiyumva Shemu.

Ati ‘‘Nsengiyumva Shemu ari mu bakinnye mu irushanwa ryabaye ku nshuro ya mbere, ndetse yitwaye neza no muri Rwanda Cycling Cup iheruka gusorezwa muri Kigali.’’

Muri iri siganwa ryo ku wa Gatandatu rizatangira saa tatu, abasore bazakoresha ibilometero 40 mu gihe abakobwa bahawe 20.

Hazakoreshwa inzira ya Cogebanque Rwamagana-Merez-Uswahilini-Sibagire-Sovu-Munyaga-Inkungu aho bazakatira bakagaruka Munyaga-Sovu-Sibagire-Ku Isoko basoreze kuri Stade ya Polisi i Rwamagana. Abahungu bazahazenguruka inshuro ebyiri.

Nyuma y’iri rushanwa, hateguwe igitaramo kizasusurutswa n’abahanzi n’ababyinnyi, bakomeye batumiwe na Cogebanque.

Iyamuremye Antoine ushinzwe Iyamamazabikorwa muri Cogebanque, yabwiye IGIHE ko hateguwe uburyo buzafasha abatuye muri aka gace gusobanukirwa na serivisi za banki.

Ati “Hazatangwa ibisobanuro bijyanye no gutanga inguzanyo, kwigishwa uko aba-agents bafasha mu ihererekanya ry’amafaranga n’izindi serivisi.’’

Les Amis Sportifs yazamukiyemo abakinnyi bakomeye barimo nka Adrien Niyonshuti, Areruya Joseph, Ndayisenga Valens na Uwizeye Jean Claude.

Hategekimana Jean Bosco wa Les Amis Sportifs iterwa inkunga na Cogebanque, yatwaye Rwanda Cycling Cup 2019 mu ngimbi
Les Amis Sportifs iterwa inkunga na Cogebanque, yabaye iya mbere mu ngimbi muri Rwanda Cycling Cup 2019 yasojwe ku wa Gatandatu
Ni ku nshuro ya kabiri Les Amis Sportifs igiye gukoresha iri rushanwa ryo gushaka abanyempano bashya
Rwamagana Challenge igiye kuba ku nshuro ya kabiri yateguwe na Les Amis Sportifs ifatanyije na Cogebanque isanzwe iyitera inkunga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .