Ikipe izagira abarwayi babiri ba Coronavirus izasezererwa muri Tour de France

Yanditswe na Eric Tony Ukurikiyimfura
Kuya 22 Kanama 2020 saa 01:12
Yasuwe :
0 0

Abategura isiganwa ry’amagare rya Tour de France batangaje ko ikipe izajya igira abakinnyi babiri banduye Coronavirus mu gihe cy’icyumweru kimwe, izajya isezererwa mu irushanwa.

Tour de France ya 2020, yigijwe inyuma kubera icyorezo cya Coronavirus cyibasiye Isi, izatangira ku wa 29 Kanama kugeza ku wa 20 Nzeri.

Abakinnyi n’abandi bagize amakipe bazaba hamwe ubwo bazaba bageze i Nice mbere y’uko haba ‘Grand Depart’ (itangira ry’isiganwa).

Bazapimwa inshuro ebyiri mbere y’uko irushanwa ritangira ndetse laboratwari ngendanwa izajya yifashishwa mu isiganwa nk’uko byatangajwe na sosiyete ya Amaury Sport Organisation (ASO) itegura isiganwa.

Ku wa Kane, Umuyobozi w’isiganwa, Christian Prudhomme, yavuze ko umukinnyi uzajya agaragaraho Coronavirus, azajya yishyira mu kato hamwe n’uwo babana mu cyumba, ariko bitazahagarika isiganwa ryose.

Tour de France yagombaga kuba hagati ya tariki ya 27 Kamena n’iya 19 Nyakanga, yigijwe inyuma kubera ingamba zo kuguma mu rugo zari zafashwe mu Bufaransa mu rwego rwo kurwanya ikwirakwira rya Coronavirus.

Chris Froome wegukanye iri rushanwa inshuro enye, ntazitabira iry’uyu mwaka nyuma yo gusigwa n’ikipe ya INEOS. Ni ku nshuro ya kabiri ataryitabiriye nyuma yo gusiba irya 2019 kubera impanuka yakoze akavunika ijosi, igufa ry’ukuguru, inkokora n’imbavu.

Amakipe azakina Tour de France 2020 yabwiwe ko izagira abarwayi babiri ba Coronavirus izajya ikurwa mu isiganwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .