Ifoto y’Umunsi: Minisitiri Munyangaju atwaye igare

Yanditswe na Eric Tony Ukurikiyimfura
Kuya 9 Ukuboza 2019 saa 08:12
Yasuwe :
0 0

Kuri iki Cyumweru, Minisitiri wa Siporo Munyangaju Aurore Mimosa yagaragaye atwaye igare risanzwe ryifashishwa mu masiganwa yo mu misozi, kuri Stade Stade Amahoro.

Umukino w’amagare ni umwe mu ikunzwe n’Abanyarwanda by’umwihariko wo ukaba ugaragaza umusaruro mwiza haba mu masiganwa abera imbere mu gihugu ndetse n’ayo Abanyarwanda bitabira mu mahanga.

Impano y’amagare Perezida Kagame yahaye Team Rwanda ubwo yari imaze kwegukana Tour du Rwanda mu 2014, yerekanye bidasubirwaho ko Abanyarwanda bahawe uyu mukino nk’umurage ndetse kugeza uyu munsi, umukinnyi wa mbere muri Afurika ni Umunyarwanda Areruya Joseph ‘Kimasa’.

Areruya ahataniye kandi kongera kwambara iri kamba rya Afurika hamwe n’abandi 15 barimo n’undi Munyarwanda, Munyaneza Didier ‘Mbappé’.

Ubusanzwe abahanga basobanura ko siporo ari ubuzima ku wayikoze, ikaba n’isoko y’ubukire ku bayishoyemo imari cyangwa abayikora by’umwuga. Ibi ntibyagiye kure abanyarwanda kuko bamaze iminsi bakangurirwa gufata siporo nk’umwuga ushobora kugira icyo winjiriza igihugu n’iterambere ry’umuntu ku giti cye.

Perezida Paul Kagame ari ku isonga ry’abashyigikiye ko Abanyarwanda bagaragaza impano zabo mu mikino itandukanye.

Kuri iki Cyumweru, Bahati Patient uzwi nka Kagare, yashyikirijwe igare nk’impano yahawe n’Umukuru w’Igihugu wabonye amashusho agaragaza ubuhanga n’ubufindo uyu musore w’imyaka 21 akorera ku igare.

Bahati Patient, iri gare yarishyikirijwe na Minisitiri wa Siporo, Munyangaju Aurore Mimosa, mu muhango wabereye kuri Stade Amahoro i Remera.

Byari ibyishimo kuri uyu musore ukomoka i Rubavu, wabanje kuganura ku bwiza bwaryo ndetse nyuma yo kuryishimira, asaba Minisitiri wari umaze kurimushyikiriza niba yamuha umunyenga.

Minisitiri Munyangaju na we yatwaye iri gare muri Stade Amahoro, ahasanzwe hari inzira ikoreshwa n’abasiganwa ku maguru (Running track).

Minisitiri wa Siporo yavuze ko Perezida Kagame yahaye igare Bahati Patient mu rwego rwo gufasha Abanyarwanda n’iyi Minisiteri gushyira imbaraga mu gushakisha no kureba abana bafite impano mu mikino.

Ati ’’Yamuhaye igare ku bwo gufasha Abanyarwanda cyangwa gufasha na Minisiteri kugira ngo natwe dushobore gushyiramo imbaraga zo gushakisha no kureba abo bana bafite impano yihariye, kugira ngo natwe dushobore kubafasha no kubazamura, ariko ni we uri kuduha icyerekezo. Yishimiye ibyo Patient akora n’impano ye.’’

Ubwo hakorwaga ihererekanyabubasha hagati y’iyahoze ari Minisiteri y’Umuco na Siporo (MINISPOC) na Minisiteri ebyiri zayikomotseho; iya Siporo (Minispor) n’iy’Umuco n’Urubyiruko, mu kwezi gushize, Ministeri ya Siporo yibukijwe ko u Rwanda ruherutse gusaba kwakira Shampiyona y’Isi y’Amagare ya 2025, isabwa kubishyiramo imbaraga u Rwanda rukaba igihugu cya mbere cyakiriye iri rushanwa muri Afurika.

Munyangaju Aurore Mimosa yahawe kuyobora iyi Minisiteri nshya ya Siporo mu kwezi gushize, akaba yari asanzwe ari Umuyobozi wa Sosiyete y’Ubwishingizi Sonarwa Life Assurance Company Ltd, akaba n’Umuyobozi ushinzwe ubugenzuzi mu Nama y’Ubutegetsi y’Ikigo cy’Imari “Copedu Plc’’.

Minisitiri wa Siporo Munyangaju Aurore Mimosa ashyikiriza Bahati Patient, impano y'igare yahawe na Perezida Kagame
Uyu musore w'imyaka 21, yanahawe kandi akarindamutwe azajya yambara mu gihe atwaye iri gare yahawe n'Umukuru w'Igihugu
Nyuma yo kuganura ku bwiza bw'iri gare, Bahati yasabye Minisitiri wa Siporo ko yamuha umunyenga
Minisitiri wa Siporo, Munyangaju Aurore Mimosa atwaye igare muri Stade Amahoro. Aha yari amaze gushyikiriza Bahati Patient, impano y'igare ryatanzwe na Perezida Kagame mu muhango wabereye kuri Stade Amahoro i Remera ku wa 8 Ukuboza 2019

Amafoto: Umurerwa Delphin


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .