Ibyo wamenya kuri ‘Astana’, ikipe ihabwa amahirwe yo kwegukana Tour du Rwanda ya 2019

Yanditswe na Ngabo Roben
Kuya 20 Gashyantare 2019 saa 07:09
Yasuwe :
0 0

Isiganwa ry’amagare mpuzamahanga rizenguruka u Rwanda ‘Tour du Rwanda’ rigiye kuba ku nshuro ya mbere riri ku rwego rwa 2.1, rizitabirwa n’amakipe menshi akomeye ariko izihiga ni Astana Pro Team ifite abakinnyi basanzwe bitabira Tour de France.

Umukino wo gusiganwa ku magare by’umwuga ugira ibyiciro bitatu by’amakipe akina hirya no hino ku Isi yemewe n’Impuzamashyirahamwe yawo ku Isi, ‘UCI’.

Icyiciro cya mbere kibamo amakipe 18 akomeye kurusha andi ku Isi cyitwa ‘World Tour Team’. Icya kabiri cyitwa ‘UCI Professional Continental teams’ kibamo amakipe 27 yemerewe gusiganwa mu masiganwa akomeye kurusha andi ku Isi nka Tour de France, Giro d’Italia na La Vuelta a España.

Icyiciro cya gatatu bita ‘Continental teams’, kigira amakipe 177 arimo na Team Benediction Excel Energy yo mu Rwanda.

Mu myaka 10 Tour du Rwanda imaze kuva yaba mpuzamahanga 2009, igiye kwitabirwa n’ikipe iri mu cyiciro cya mbere ‘World Tour Team’, kuko yari isanzwe yitabirwa n’amakipe yo mu cyiciro cya gatatu n’abatarabigize umwuga gusa.

Ikipe yo ku rwego rwa ‘World Tour’ yemeje ko izitabira ni Astana Pro Team yo muri Kazakhstan, ihabwa amahirwe yo kwegukana isiganwa ry’uyu mwaka kubera abakinnyi b’ibihangange izaserukana n’urwego rwayo muri rusange.

Amwe mu mateka ya Astana Pro Team

Yashinzwe mu 2007, iterwa inkunga na Leta ya Kazakhstan n’ikigega cy’imari cy’iki gihugu bita "Samruk-Kazyna" twagereranya n’Agaciro Development Fund.

Ni ikipe ikomeye mu mateka y’umukino wo gusiganwa ku magare kuko mu 2009 yasinyishije umukinnyi wari uwa mbere ku Isi icyo gihe, Lance Edward Armstrong.

Uwo mwaka yegukanye umwanya wa gatatu muri Tour de France, mwiza kurusha indi myanya abakinnyi ba Astana bagize muri iri siganwa mu mateka.

Astana yanatangiye neza uyu mwaka kuko imaze kwegukana amasiganwa abiri akomeye mu kwezi n’igice arimo Tour de la Provence yo mu Bufaransa yegukanywe na Gorka Izagirre na Tour of Colombia yegukanywe na Miguel Angel Lopez.

Abakinnyi Astana Pro Team izakinisha Tour du Rwanda

Astana Pro Team izazana muri Tour du Rwanda abakinnyi barimo umwe uri mu ba mbere muri Afurika, Merhawi Kudus Ghebremedhin.

Yegukanye shampiyona ya Afurika mu 2015, yitabira Tour de France ya 2015, Giro d’Italia ya 2016 na La Vuelta a España ya 2014, 2016 na 2018.

Kudus aheruka i Kigali muri Tour du Rwanda ya 2012 aho yegukanye agace ka mbere kayo, asoreza ku mwanya wa gatandatu ku rutonde rusange. Icyo gihe yari afite imyaka 18 gusa.

Usibye Kudus uhabwa amahirwe yo kwegukana Tour du Rwanda, azaza ari kumwe n’umunya-Colombia uzaba ushinzwe kumurinda, Rodrigo Contreras Pinzón wegukanye shampiyona y’umugabane wa Amerika y’Epfo mu 2014.

Uyu yasoreje ku mwanya wa 10 muri Tour of Colombia inyuma y’ibihangange birimo Nairo Quintana Rojas waje ku mwanya wa gatanu.

Astana kandi izaba ifite Hernando Bohórquez Sánchez ukomoka muri Colombia, igihugu gifatwa nk’ikirema abakinnyi bazi kuzamuka kurusha ibindi ku Isi.

Bohórquez yitabiriye Vuelta a España mu 2018 gusa ntiyitwara neza kuko yasoreje ku mwanya wa 93.

Abandi bakinnyi babiri b’abanya- Kazakhstan badafite amazina akomeye aribo Natarov Yuriy na Stalnov Nikita bo bashobora kuzaba bashinzwe gushakira bagenzi babo ibyo kurya.

Iyi kipe izaba ikiniye muri Afurika ku nshuro ya mbere izanye intego yo kwegukana umwenda w’umuhondo muri Tour du Rwanda. Izahangana n’andi nka Team Dimension Data for Qhubeka iyobowe na Mugisha Samuel wegukanye iri siganwa umwaka ushize.

Rodrigo Contreras Pinzón wegukanye shampiyona y’umugabane wa Amerika y’Epfo mu 2014 agiye kuza muri Tour du Rwanda
Hernando Bohórquez ukomoka muri Colombia yitezweho imbaraga zidasanzwe mu misozi y'u Rwanda
Merhawi Kudus watunguranye muri Tour du Rwanda ya 2012 akiri muto, agarutse ari igihangange
Batanu bazakinira Astana Pro Team muri Tour du Rwanda ya 2019, nibo bahabwa amahirwe yo kuyegukana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza