Ibyihariye kuri Tour du Rwanda 2021; ingengo y’imari yayo iziyongeraho asaga miliyoni 100 Frw

Yanditswe na Eric Tony Ukurikiyimfura
Kuya 28 Ugushyingo 2020 saa 12:01
Yasuwe :
0 0

Kuva ku wa 21 kugeza ku wa 28 Gashyantare 2021 u Rwanda ruzakira isiganwa ry’umukino w’amagare rizenguruka igihugu rya Tour du Rwanda.

Iri siganwa rizaba ku nshuro ya 13 kuva ribaye mpuzamahanga, ikaba inshuro ya gatatu kuva rigiye ku rwego rwa 2.1, rizitabirwa n’amakipe 17 ariko kugeza ubu hamenyekanye 15 muri yo.

Ikipe y’Igihugu (Team Rwanda), Benediction Ignite (y’i Rubavu) na SACA (iterwa inkunga na SKOL) ni yo makipe yo mu Rwanda azakina iri rushanwa nk’uko byagenze no mu 2020.

Ubusanzwe Tour du Rwanda ikinwa mu minsi umunani, yarangiraga byibuze isiganwa rigeze mu mpande zose z’igihugu ariko mu mwaka utaha si ko bizagenda.

Mu rwego rwo kurushaho kugusobanurira isiganwa rya 2021, IGIHE yakusanyije ibyihariye bizaranga Tour du Rwanda y’umwaka utaha iteganyijwe kuba mu mezi atatu ari imbere.

Ingengo y’imari yiyongereyeho asaga miliyoni 100 Frw

Mu gihe muri uyu mwaka wa 2020 ingengo y’imari ya Tour du Rwanda byari byatangajwe ko igera muri milyoni 700 Frw, mu mwaka utaha biteganyijwe ko izarenga miliyoni 800 Frw.

Perezida w’Ishyirahamwe ry’Umukino w’Amagare mu Rwanda (FERWACY), Murenzi Abdallah, yavuze ko bitewe n’ingamba zihari zo kwirinda COVID-19 zirimo no gupimisha abakinnyi, biteze ko umubare w’amafaranga iri rushanwa ryatwaraga uziyongera.

Abakinnyi bazajya barara i Kigali

Ni agashya! Ubusanzwe abakinnyi bararaga ahasorejwe isiganwa ndetse akenshi ni ho hatangiriraga agace gakurikiyeho cyangwa se bagakora intera nto berekeza ahandi bahagurukira. Urugero ni nko kuva i Huye hasorezwaga agace ka kabiri, bakajya gutangirira agace ka gatatu i Nyanza mu gihe byabaga byabaye ngombwa.

Mu mwaka utaha biratandukanye, abakinnyi bazajya basoza isiganwa, imodoka zibasubize i Kigali, aho bazaba hamwe kugira ngo umutekano wabo urusheho kurindwa muri ibi bihe bya COVID-19.

Mu Burengerazuba nta gace k’isiganwa kazahagera

Na byo ntibisanzwe kuko byibuze mu nshuro 12 Tour du Rwanda imaze kubamo kuva ibaye mpuzamahanga, zose zageze mu Burengerazuba, aho uduce turindwi tw’amasiganwa atandukanye twasorejwe i Rubavu.

Mu mwaka utaha nta gace kazajyayo kuko ubwo isiganwa rizaba rigeze i Huye ku munsi wa kabiri, rizongera gutangirira i Nyanza ryerekeza mu Majyaruguru.

Murenzi Abdallah yavuze ko izi mpinduka zatewe n’uko abakinnyi bagomba gukora intera ngufi bakagaruka i Kigali.

Ati “Izi mpinduka zabaye zatewe n’icyorezo cya COVID-19 dufite muri iyi minsi bituma tutazakora ingendo ndende ngo turare aho twasoreje. Impamvu na none yo gutuma tutazarara aho twasoreje ni ukubera ibibazo bijyanye n’amacumbi kuko ni ngombwa ko abantu dufata ingamba z’uko abantu badahurira aho baryama cyangwa muri hoteli ari benshi.”

Tour du Rwanda yasubiye i Gicumbi nyuma y’imyaka 11

Iri siganwa rizenguruka igihugu ryaherukaga kwerekeza i Gicumbi mu 2010, rizasubirayo mu 2021 ubwo abakinnyi bazaba bavuye i Nyanza.

Ni ko gace kazaba ari karekare kazakorwa muri Tour du Rwanda 2021, kareshya n’ibilometero 171,6.

Mu isiganwa ryabaye uyu mwaka, agace karekare kareshyaga n’ibilometero 206,3 kavuye i Rusizi kerekeza i Rubavu.

Undi mujyi Tour du Rwanda izageramo nyuma y’igihe kinini ni uwa Nyagatare umaze kwakira amasiganwa atatu, irya nyuma rikaba ari ryo mu 2015.

Ikipe ya Chris Froome mu zitezwe i Kigali

Ubwo hatangazwaga amakipe azakina Tour du Rwanda 2021 ku wa Gatanu, abashinzwe gutegura iri siganwa bavuze ko amakipe 32 ari yo yari yasabye, ariko bafashe 17 gusa.

Mu makipe 15 yamaze kwemeza harimo Israel Cycling Academy yo muri Israël, iheruka gusinyisha kabuhariwe w’Umwongereza Chris Froome watwaye Tour de France inshuro enye.

Gusa akenshi usanga aya makipe yo ku rwego rw’ababigize umwuga, aba afite abakinnyi benshi bitabira amasiganwa atandukanye icya rimwe ku buryo nta wakwemeza 100% kuko Froome azaza mu Rwanda.

Ikipe ya Eritrea ikunze kugira abakinnyi begukana isiganwa ntiri mu makipe yamaze kwemeza ariko ishobora kuboneka muri abiri azatangazwa muri Mutarama.

B&B Hotels yo mu Bufaransa na Medellin yo muri Colombia ni amakipe azakina Tour du Rwanda ku nshuro ya mbere.

Visit Rwanda izambika umukinnyi watwaye isiganwa

Mu nshuro nyinshi Tour du Rwanda yabayemo kugeza mu 2019, umukinnyi uyoboye isiganwa yambikwaga umwenda w’umuhondo utangwa na Minisiteri ya Siporo.

Mu 2020, uyu mwambaro watanzwe na Rwanda Tea, ariko mu mwaka utaha wa 2021 uzatangwa na Visit Rwanda mu rwego rwo kwamamaza ubukerarugendo bw’u Rwanda no gukangurira abantu gusura ibyiza nyaburanga bitatse igihugu.

SKOL izakomeza kwambika umukinnyi wegukanye agace mu gihe Banki y’Ubucuruzi ya Cogebanque izakomeza kwambika umukinnyi wahize abandi mu guterera imisozi.

Amakipe 15 ni yo yatangajwe muri 17 azitabira isiganwa
Uduce tuzanyurwamo muri Tour du Rwanda 2021
Perezida wa FERWACY, Murenzi Abdallah, yavuze ko kubera ibihe bya COVID-19, Tour du Rwanda 2021 yabayemo impinduka nyinshi
Umunyamabanga Uhoraho muri Minisiteri ya Siporo, Shema Maboko Didier, mu bitabiriye umuhango wo kwerekana amakipe n'inzira za Tour du Rwanda 2021
Abakinnyi bazajya basiganwa mu bice bitandukanye ariko barare i Kigali
Agace ka mbere ka Tour du Rwanda kazongera kwerekeza i Rwamagana
Team Rwanda izakina Tour du Rwanda ku nshuro ya 13

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .