Habimana Jean Eric yegukanye Rwanda Epic 2020

Yanditswe na Eric Tony Ukurikiyimfura
Kuya 21 Ugushyingo 2020 saa 10:45
Yasuwe :
0 0

Umunyarwanda Habimana Jean Eric ukinira SACA, yegukanye isiganwa ry’amagare ryo mu misozi rya Rwanda Epic ryabereye i Musanze kuri uyu wa Gatandatu.

Iri siganwa ryitabiriwe n’abakinnyi 42 mu bagabo n’abagore mu byiciro by’ababigize umwuga n’abatarabigize umwuga.

Abasiganwa bahagurukiye ku cyicaro cy’Ikigo cy’Amagare cya Musanze (Africa Rising Cycling Center) kiri mu Murenge wa Nyange mu Karere ka Musanze, bazenguruka mu mihanda y’ibitaka no mu mashyamba ahegereye.

Habimana Jean Eric usanzwe ukinira SACA, ni we wabaye uwa mbere mu cyiciro cy’abagabo babigize umwuga, aho yakoresheje amasaha abiri, iminota itandatu n’amasegonda 52 nyuma yo kuzenguruka inshuro enye ku ntera y’ibilometero 15.

Simon Hupperetz yabaye uwa kabiri akoresheje amasaha abiri, iminota 13 n’amasegonda 11 mu gihe uwahoze ari Kapiteni w’Ikipe y’Igihugu, Nathan Byukusenge yabaye uwa gatatu akoresheje amasaha abiri, iminota 14 n’amasegonda 48.

Dukuzumuremyi Ally Fidèle na Niringiyimana Ramadhan baje muri batanu ba mbere mu gihe Adrien Niyonshuti wahagariye u Rwanda mu mikino Olempike ya Londres mu 2012, ubu akaba atoza SACA, yabaye uwa 12.

Mu cyiciro cy’abagore babigize umwuga, hakinnye abakobwa babiri bazengurutse inshuro eshatu, bakora intera rusange y’ibilometero 40,5. Hatsinze Ntakirutimana Marthe wakoresheje amasaha abiri, iminota icyenda n’amasegonda 51 mu gihe Nirere Xaverine yakoresheje amasaha abiri, iminota 13 n’amasegonda 39.

Mu bagabo batabigize umwuga, hitabiriye abakinnyi 25, bazenguruka inshuro enye ku ntera rusange y’ibilometero 54, yegukanywe na Jakob Shuele wakoresheje amasaha abiri n’iminota 22.

Mu bagore batabigize umwuga, hagombaga gukina batatu, hitabira babiri, ariko Winnie Eckardt ni we wasoje isiganwa ry’ibilometero 40,5, akoresheje amasaha abiri, iminota 45 n’amasegonda 50.

Iri siganwa rya Mountain Bike ryateguwe na Rwanda Alternative Riding Events (RAR Events) ku bufatanye n’Ishyirahamwe ry’Umukino w’Amagare mu Rwanda (FERWACY) n’Urwego rw’Igihugu rw’Iterambere (RDB), rigaterwa inkunga n’Uruganda rwa SKOL, rizakomeza ku Cyumweru, aho abaryitabiriye bazakora ibikorwa byo kwidagadura mu buryo bwa siporo.

Habimana Jean Eric yegukanye Rwanda Epic 2020 yabereye i Musanze
Perezida wa FERWACY, Murenzi Abdallah, ahemba Ntakirutimana Marthe wabaye uwa mbere mu bakobwa babigize umwuga
Abasiganwa banyuraga mu mihanda igoranye
Byukusenge Nathan akata mu kigo cy'amagare cya Musanze
Habimana Jean Eric yasoje isiganwa ari ku mwanya wa mbere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .