Bugesera Cycling Team yabonye umufatanyabikowa mushya

Yanditswe na Eric Tony Ukurikiyimfura
Kuya 3 Ugushyingo 2019 saa 08:01
Yasuwe :
0 0

Bugesera Cycling Team y’abagore yabonye umuterankunga mushya, ari we Uruganda rutunganya amazi yo kunywa rwa Jibu, bagiye gukorana mu gihe cy’umwaka umwe, aho iyi kipe yihaye intego yo guhangana n’andi makipe y’abagore asanzwe akina uyu mukino mu Rwanda.

Kuri uyu wa Gatandatu, mbere y’uko hakinwa agace ka Muhanga Circuit, ni bwo Bugesera Cycling Team yerekanye umufatanyabikorwa wayo mushya, uruganda rw’amazi rwa Jibu.

Visi Perezida wa mbere w’Ishyirahamwe ry’Umukino w’amagare mu Rwanda (FERWACY), Munyankindi Bénoît, yavuze ko bishimishije kuba Bugesera Cycling Team nk’ikipe nshya, yungutse umufatanyabikorwa ku buryo bizafasha kuzamura guhangana hagati y’amakipe asanzwe akina amarushanwa y’amagare mu Rwanda.

Ati ”Ndagira ngo mbashimire kuri iki gikorwa cy’indashyikirwa mukoze n’umufatanyabikorwa wanyu, Jibu. Mu izina rya FERWACY, ndagira ngo nkomeze mbashishikarize ibi bintu kuko bishoboka by’umwihariko mu cyiciro cy’abagore kuko dufite ikipe imwe ya Benediction twavuga ko ikina neza ariko na yo ntabwo imaze igihe.”

Munyankindi yavuze ko mu Bugesera haba impano yo gukina amagare bitewe n’uko abantu baho bakunda kuyagendaho ku buryo asanga bitagoye cyane kugira ikipe ikomeye.

Ati ”Abanya-Bugesera bakunda amagare ku buryo byoroshye gukora ikipe. Ubutaha turizera ko binyuze muri 20km de Bugera muzagira ikipe ikomeye ku buryo nidufatanya tuzagira ikipe ya mbere y’abagore ikina amarushanwa mpuzamahanga.”

Umuyobozi wa Bugesera Cycling Team, Kayirebwa Liliane, yavuze ko amasezerano y’ubufatanye bagiranye na Jibu azamara umwaka umwe nyuma y’uko bari basanzwe bakorana binyuze muri 20 km de Bugesera FC.

Ati” Jibu ni umuterankunga twungutse ariko sinavuga ko aribwo tukimwunguka kuko twari dusanzwe dukorana binyuze muri 20 km de Bugesera. Tumaze kugira ikipe y’amagare y’abagore ya Bugesera, twarabagereye tubasaba ko badutera inkunga dusanga batwiteguye. Twagiranye amasezerano y’umwaka uzongerwa. “

Cyuzuzo Jeanne ushinzwe Iyamamazabikorwa muri Jibu, yavuze ko bahisemo gukorana na Bugesera Cycling Team kuko bashaka guteza imbere umukino w’amagare by’umwihariko mu cyiciro cy’abagore.

Ati ”Turifuza kujya dukorana na Siporo. Impamvu twahisemo Siporo y’amagare by’umwihariko abagore, Bugesera twamenyanye binyuze muri 20 km de Bugesera bityo twifuza gufatanya n’ikipe yabo y’abagore kugira ngo tubafashe kuzamura urwego rw’iyi kipe.”

Bugesera Cycling Team ni ikipe y’amagare y’abagore kugeza ubu ifite abakinnyi batandatu barimo babiri bakiri bato.

Yatangiye gukina amarushanwa ya FERWACY, binyuze muri Rwanda Cycling Cup muri Kanama, mu isiganwa rya Rwamagana Circuit, aho kuri ubu imaze gukina amasiganwa ane.

Kuri uyu wa Gatandatu, abakinnyi bayo, Tuyishimire Séraphine, Manishimwe Jeannette, Mutuyimana Jeanne na Ntakirutimana Marthe bari mu bakinnyi 12 bahanganye mu cyiciro cy’abagore. Abandi barindwi bose bakinira Benediction Club.

Bugesera Cycling Team yatangiye gukina amarushanwa ya FERWACY muri Kanama
Iyi kipe yagiranye ubufatanye n'uruganda rw'amazi rwa Jibu
Abakinnyi bagize Bugesera Cycling Team mu mwambaro mushya
Visi Perezida wa Mbere wa Ferwacy, Munyankindi yashimiye Bugesera Cycling Team yabonye umufatanyabikorwa
Cyuzuzo Jeanne ushinzwe Iyamamazabikorwa muri Jibu aganira n'itangazamakuru
Perezida wa Bugesera Cycling Team, Kayirebwa Liliane, yavuze ko ngamba nshya ikipe ifite

Amafoto: Niyonzima Moïse


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza