Benediction Club yegukanye Rwanda Cycling Cup 2019 yakorewe ibirori na Mukamira Dairy

Yanditswe na Eric Tony Ukurikiyimfura
Kuya 9 Ukuboza 2019 saa 08:24
Yasuwe :
0 0

Nyuma yo kwegukana Igikombe cy’amarushanwa ya Rwanda Cycling Cup yasojwe ku wa Gatandatu, ikipe y’abakobwa ya Benediction Club yakorewe ibirori n’Uruganda rw’amata rwa Mukamira Dairy byitezwe ko bazakorana mu mwaka utaha w’imikino wa 2020.

Iki gikorwa cyabaye kuri iki Cyumweru, cyabereye ku cyicaro cy’uru ruganda rutunganya amata n’ibiyakomokaho, gihereye mu Murenge wa Mukamira, aho cyitabiriwe n’abayobozi baturutse ku rwego rw’Akarere ka Nyabihu, urw’Umurenge ndetse n’abatuye muri aka gace beretswe igikombe iyi kipe yatwaye.

Umuyobozi wungirije wa Mukamira Dairy, Kageruka Stanley, yavuze ko bashimishijwe n’intsinzi iyi kipe y’abakobwa yabonye ku buryo biyemeje kubakira neza nk’abaturanyi babo.

Ati ’’Icyiza ni uko ari ikipe abayigize bavuka muri aka karere, abenshi bavuka muri uyu Murenge, tukaba twanejejwe no kubakira cyane ko n’uruganda ruri muri uwo Murenge. Biri mu nzira [ibyo gukorana] turimo turabatekereza, iyo ubonye abantu batangiye kugenda batera imbere na we utekereza uburyo ugiye gukora na bo kugira ngo ubafashe gutera imbere.’’

Ku ruhande rwa Sempoma Félix utoza ikipe ya Benediction Club, yavuze ko bashimishijwe n’iki gikorwa bakorewe na Mukamira Dairy, yemeza ko kuri ubu bari kuganira nayo uburyo yaba umufatanyabikorwa wabo guhera mu mwaka utaha.

Ati "Batwakiriye kuko bishimiye uburyo abana bacu batwaye Rwanda Cycling Cup kuko ari abaturanyi bacu kandi 90% by’abakinnyi bacu bavuka muri uyu Murenge. Twishimiye ko batwakiriye natwe tugasura uru ruganda.’’

"Ntabwo navuga ko kuri ubu ari abafatanyabikorwa bacu ariko mu mwaka utaha twafatanya guteza imbere umukino w’amagare binyuze mu bakobwa. Dufite n’abahungu, hano hari n’indi kipe ya Nyabihu, ntituzabura aho tubiganisha.’’

Rwanda Cycling Cup ni amarushanwa ngarukamwaka ategurwa na Ferwacy kuva mu 2015, agaterwa inkunga na SKOL na Cogebanque. Yashyizweho mu rwego rwo kongerera imyitozo n’ubunararibonye abakinnyi by’umwihariko abadakina mu Ikipe y’Igihugu batitabira amasiganwa menshi mpuzamahanga.

Kuva ikipe ya Benediction Club y’abagore itangiye kuyakina mu myaka itatu ishize, imaze kwegukana igikombe inshuro ebyiri.

Abakinnyi ba Benediction Club bafata ifoto hamwe n'abakozi bo mu ruganda rw'amata rwa Mukamira Dairy
Benediction Club yatwaye igikombe cya Rwanda Cycling Cup mu bagore ku nshuro ya kabiri
Abakinnyi ba Benediction Club berekanye igikombe cya Rwanda Cycling Cup baheruka kwegukana
Abatuye Mukamira bari baje kwishimira iki gikombe
Umuyobozi wungirije wa Mukamira Dairy, Kageruka Stanley, yavuze ko bishimie kwakira Benediction Club yatwaye Rwanda Cycling Cup 2019 ndetse bashaka kuyishigikira ngo ikomeza kwitwara neza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .