Bahati wagaragaje ubuhanga budasanzwe ku igare, yahawe impano na Perezida Kagame (Amafoto)

Yanditswe na Eric Tony Ukurikiyimfura
Kuya 8 Ukuboza 2019 saa 09:36
Yasuwe :
0 0

Bahati Patient uzwi nka Kagare ukomoka mu Murenge wa Gisenyi mu Karere ka Rubavu, yahawe impano y’igare na Pereziza Paul Kagame wabonye amashusho ye agaragaza ubuhanga n’ibidasanzwe arikoreraho.

Kuri iki Cyumweru, tariki ya 8 Ukuboza 2019 nibwo Bahati w’imyaka 21, yashyikirijwe impano y’igare yagenewe na Perezida Kagame, ayihabwa na Minisitiri wa Siporo Munyangaju Auro Mimosa mu muhango wabereye kuri Stade Amahoro i Remera.

Byari ibyishimo kuri uyu musore muto wahawe igare ryiza rigezweho ryifashishwa mu masiganwa yo mu misozi ndetse n’akarindamutwe.

Bahati Patient yavuze ko byamutunguye kubona ahabwa igare na Perezida Kagame.

Ati ’’Naje nje guhura n’umuntu wari wampamagaye. Nari nzi ko tuganira bisanzwe ariko natunguwe bambwiye ko mpabwa impano y’igare nemerewe na Perezida. Byandenze kandi byashimishije cyane. Perezida ni Umubyeyi , Imana imukubire inshuro 1000.’’

Minisitiri Munyangaju washyikirije uyu musore igare, yavuze ko ari impano yahawe na Perezida Kagame mu rwego rwo gushyigikira abana b’Abanyarwanda bagaragaza impano mu mikino itandukanye.

Ati ’’Patient yavuye i Gisenyi ku bw’ubutumire bwa Perezida wa Repubulika wamubonye, agafata icyemezo cyo kumuha impano. Twamuhamagaye ngo aze turimushyikirize. Ni igare ryiza rikomeye kuruta iryo yari afite, yanahawe n’akarindamutwe kugira ngo ashobore kwirinda kuko nk’uko wabibonye atwara igare nta bikoresho afite.’’

Yakomeje agira ati "Yamuhaye igare ku bwo gufasha Abanyarwanda cyangwa gufasha na Minisiteri kugira ngo natwe dushobore gushyiramo imbaraga zo gushakisha no kureba abo bana bafite impano yihariye, kugira ngo natwe dushobore kubafasha no kubazamura, ariko ni we uri kuduha icyerekezo. Yishimiye ibyo Patient akora n’impano ye.’’

Minisitiri wa Siporo asanga kuba Bahati yahawe impano na Perezida Kagame biza gutera ishyari ryiza n’abandi bana bafite impano zitandukanye.

Ati ’’Ni ukugira ngo n’undi mwana wese ufite impano, nabona ko Patient yabonye impano ya Perezida wa Repubulika, na we ashobore gukomeza muri iyo nzira. Natwe tuzashobora gushyiramo imbaraga kugira ngo abo bana bafite izo mpano bose tubashakishe, dushobore kubafasha kugira aho bagera.’’

Bahati avuga ko nyuma yo guhabwa iri gare kuri ubu yizeye kuzamura inzozi ze, agakomeza kwerekana ubuhanga budasanzwe yihariye.

Uyu musore azwiho gukora udukoryo tunyuranye ku igare, akoreraho amasiporo cyangwa agasimbuka abantu, ibintu avuga ko yashyizemo imbaraga guhera mu 2017.

Minisitiri wa Siporo Munyangaju Aurore Mimosa ashyikiriza Bahati, impano y'igare yahawe na Perezida Kagame
Yahawe kandi n'akarindamutwe kazamufasha kwirinda mu gihe akora udukoryo twe ku igare
Bahati Patient agenda ku igare yahawe na Perezida Kagame, muri Stade Amahoro
Uyu musore w'imyaka 21, akorera udukoryo dutandukanye ku igare
Minisitiri Munyangaju yavuze ko impano Perezida yahaye Bahati, izatuma n'abandi Banyarwanda bagaragaza impano zabo mu mikino itandukanye
Bahati akomoka i Rubavu ku Majengu
Uyu musore yahawe akabyiniriro ka Kagare bitewe n'ubuhanga agaragaza
Igare Bahati Patient yahawe na Perezida Kagame

Amafoto: Umurerwa Delphin


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .