00:00:00 IGIHE NETWORK KN KINYARWANDA EN ENGLISH FR FRANCAIS

Amakipe n’imihanda mishya byahawe umwihariko muri Tour du Rwanda 2023

Yanditswe na Iradukunda Olivier
Kuya 25 Ugushyingo 2022 saa 08:05
Yasuwe :

Ishyirahamwe Nyarwanda ry’Umukino wo Gusiganwa ku Magare, FERWACY, ryatangaje imihanda izakoreshwa muri Tour du Rwanda 2023 n’amakipe azayitabira arimo amashya nka China Glory yo mu Bushinwa na Bolton Equites yo muri Nouvelle-Zélande.

Iri rushanwa rizenguruka u Rwanda ku magare rigiye kuba ku nshuro ya 15 kuva ribaye mpuzamahanga, biteganyijwe ko rizakinwa ku wa 19-26 Gashyantare 2023.

Tour du Rwanda 2023 izitabirwa n’amakipe 20 yatoranyijwe muri 51 yasabye kuryitabira.

Muri iri rushanwa hatekerejwe ku mihanda ritaherukaga kugeramo nko mu Turere twa Bugesera [Nyamata], Rusizi na Gisagara rizaba rikandagiyemo bwa mbere.

Imihanda myinshi isanzwe ikoreshwa ni yo izongera kwifashishwa, hakiyongeraho agace kazerekeza mu Karere ka Gisagara, aho abasiganwa bazaba bageze ku nshuro ya mbere.

Umubare w’abazakurikirana iri siganwa uziyongera cyane binyuze mu masezerano FERWACY yagiranye n’ibigo bitandukanye birimo RBA na Canal+ yo kuzerekana uduce dutatu tw’iri siganwa imbonankubone [Live Streaming] riri gukinwa.

Mu mwaka utaha, Tour du Rwanda izitabirwa n’amakipe 20 arimo abiri mashya azaba ayitabiriye ku nshuro ya mbere.

Amakipe azitabira ku nshuro ya mbere ni China Glory Cycling Team yo mu Bushinwa na Borton Equities Black Spoke Pro Cycling yo muri Nouvelle-Zélande.

Ibihugu bizitabira ni bitandatu birimo Ikipe y’u Rwanda [Team Rwanda], Maroc, Érythrée, Algérie, u Bwongereza na Afurika y’Epfo.

Andi makipe yo ku rwego rw’umugabane arimo Benediction, EF Education, Tartu 2024, Team Bike, Team Polygon, Soudal Quick Step, Euskaltel Euskadi, Team Novo Nordisk, Q36.5 Pro Cycling Team, Green Project, Team TotalEnergies na Israel Premier Tech izaba yitabiriye Tour du Rwanda ku nshuro ya kane.

Kuri etape ya mbere abasiganwa bazakina uduce dusa n’utworoheje muri iri siganwa, aho bazahaguruka i Kigali kuri Golf Resort & Villas berekeza i Rwamagana ku ntera y’ibilometero 115.6.

Ku munsi wa Kabiri abasiganwa bazahaguruka i Kigali berekeze i Gisagara bakore ibilometero 132.9. Ku munsi wa Gatatu w’irushanwa bazahaguruka i Huye berekeze i Musanze ku ntera y’ibilometero 199.5 ari na ko kanini kari muri iri siganwa.

Nyuma yo kugera mu Karere ka Musanze, bazahahagurukira berekeza i Karongi aho bazakora ibilometero 138.3. Nyuma y’aka gace abasiganwa bazarara mu Karere ka Rusizi aho bazahagurukira berekeza i Rubavu ku ntera y’ibirometero 195.5.

I Rubavu, abasiganwa bazaturuka kuri Brasserie berekeze i Gicumbi aho bazakora ibilometero 157. Agace gasubira muri Kigali kazaturuka i Nyamata aho abasiganwa bazakora ibilometero 115 bagasoreza kuri Mont Kigali.

Agace ka nyuma abasiganwa bazazenguruka muri Kigali, aho bazaturuka Canal Olympia babe ari ho basoreza.

Indi mpinduka iri muri iri siganwa ni uko amakipe atazongera kujya ataha i Kigali mu mikino yayo nk’uko byagenze mu myaka ibiri iheruka kuko bararaga mu mujyi mu kwirinda ikwirakwira rya Covid-19.

Perezida wa FERWACY, Murenzi Abdallah, yavuze ko muri uyu mwaka bifuza ko Tour du Rwanda isubirana umwimerere wayo.

Yakomeje ati “Abakinnyi ntabwo bazajya bagaruka i Kigali nk’uko byahoze. Hari uturere tumwe na tumwe bazararamo, bisobanuye ko ingengo y’imari iziyongera.”

Yongeyeho ko iri siganwa ari n’umwanya mwiza wo gutegura abakinnyi bakiri bato bari gutegurwamo abazakina Shampiyona y’Isi mu 2025.

Tour du Rwanda 2022 yegukanywe n’Umunya-Erythrée Natnael Tesfatsion aho mu bilometero 913,3 yakoresheje amasaha 23, iminota 25 n’amasegonda 34.

Uduce umunani twa Tour du Rwanda 2023:

  Etape 1: Kigali Golf-Rwamagana (115,6km)

  Etape 2: Kigali-Gisagara (132,9 km)

  Etape 3: Huye-Musanze (199,5km)

  Etape 4: Musanze-Karongi (138,3km)

  Etape 5: Rusizi-Rubavu (195,5km)

  Etape 6: Rubavu-Gicumbi (157km)

  Etape 7: Nyamata-Kigali (115,8km)

  Etape 8: Canal Olympia-Canal Olympia (75,3 km)

Olivier Grand Jean ushinzwe ibya Tekiniki muri Tour du Rwanda ni we watangaje imihanda izakoreshwa n'amakipe azitabira
Umuyobozi Mukuru wa Cogebanque, Habarugira Guillaume na Perezida wa Ferwacy, Murenzi Abdallah, bishimiye kongera amasezerano y'iyi banki mu gutera inkunga Tour du Rwanda
Umuhango wo kumurika amakipe n'imihanda izakoreshwa muri Tour du Rwanda wabereye muri Canal Olympia
Kamuzinzi Freddy ushinzwe Ibikorwa bya Tour du Rwanda yijeje ko irushanwa rizenguruka igihugu ku magare rizagenda neza
FERWACY yerekanye amakipe 20 azitabira Tour du Rwanda 2023
Byitabiriwe n'abayobozi mu nzego zitandukanye
Cogebanque izaba iri mu baterankunga b'imena muri Tour du Rwanda 2023

Amafoto: Nezerwa Salomon


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .