00:00:00 IGIHE NETWORK KN KINYARWANDA EN ENGLISH FR FRANCAIS

Amagare: Amakipe 18 agiye guhatana muri ‘Heroes Cycling Cup’

Yanditswe na Eric Tony Ukurikiyimfura
Kuya 17 Mutarama 2023 saa 07:21
Yasuwe :

Ishyirahamwe Nyarwanda ry’Umukino w’Amagare (FERWACY) ryatangaje ko amakipe 18 arimo abiri akina amarushanwa Nyafurika, ari yo azitabira “Heroes Cycling Cup”, isiganwa rigamije kwizihiza Umunsi w’Intwari rizaba tariki ya 29 Mutarama 2023.

Iri siganwa rigiye kuba ku nshuro ya gatatu, ryateguwe ku bufatanye n’Urwego rushinzwe Intwari z’Igihugu, Imidari n’Impeta by’Ishimwe (CHENO). Rizakinwa mu byiciro bine birimo abagabo n’abagore bakuru, ingimbi n’abangavu.

Abazaryitabira bazahagurukira kuri Kigali Arena saa Yine, berekeze kuri Cogebanque- ku Cyicaro cy’Akarere ka Gasabo- Radio Tele 10, RDB- SP Gishushu- MTN- Auto-xpress- ku Bitaro bya Kibagabaga- Sitasiyo ORYX- Sitasiyo ENGEN- Igicumbi cy’Intwari- BK Arena. Iyi ntera yose ingana n’ibilometero 11,6.

Abangavu bazayizengurika inshuro esheshatu zireshya n’ibilometero 69,6 naho ingimbi n’abagore bayizenguruke inshuro umunani zireshya n’ibilometero 92,8.

Abagabo bakuru n’abatarengeje imyaka 23 ni bo bazakora intera ndende kuko bazazenguruka inshuro 10 zireshya n’ibilometero 116.

Amakipe y’abanyamuryango ba FERWACY azitabira iri siganwa ni Benediction Club, Bugesera Cycling team, Cine Elmay, Cycling Club for All, Fly Club, Les Amis Sportifs, Karongi Vision Sports Center, Kayonza Young Stars Cycling team, Kigali Cycling Club, Muhazi Cycling Generation na Nyabihu Cycling team.

Benediction Club-Kitei Pro 2020 na May star ni yo makipe akina amarushanwa yo ku Mugabane wa Afurika azitabira iri siganwa. Ayatumiwe ni Twin Lakes Cycling Academy, Musanze Cycling Club, Impeesa, Rukali Cycling Club na Inovo Tec.

Ubwo Isiganwa ry’Ubutwari ryabaga ku nshuro ya mbere mu 2020, ryegukanywe na Habimana Jean Eric mu bagabo, Ingabire Diane mu bagore na Muhoza Eric wari ukiri mu ngimbi.

Mu 2021 ntiryabaye kubera icyorezo cya COVID-19. Mu mwaka ushize, ryakinwe n’abahungu n’abakobwa bari hagati y’imyaka 12 na 16 mu rwego rwo gushaka abafite impano y’umukino w’amagare.

Ku wa 29 Mutarama ni bwo hazakinwa "Heroes Cycling Cup"
Habimana Jean Eric yegukanye Isiganwa ry'Ubutwari mu 2020
Mu 2022, habaye isiganwa ku bana bari hagati y'imyaka 12 na 16

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .