Amafoto y’Umunsi: Munyaneza Didier yegukanye agace gasoza Rwanda Cycling Cup 2019

Yanditswe na Eric Tony Ukurikiyimfura
Kuya 8 Ukuboza 2019 saa 07:46
Yasuwe :
0 0

Munyaneza Didier uzwi nka Mbappé ukinira Benediction Excel Energy, yashimangiye ko muri uyu mwaka wa 2019 yagize ibihe byiza, atsinda agace ka nyuma ka Rwanda Cycling Cup kakinwe kuri uyu wa Gatandatu, aho abakinnyi bahagurukiye Kimironko berekeza i Rwamagana, bakagaruka Kimironko.

Intera ireshya n’ibilmetero 126.8 ni yo yakozwe n’abagabo bakuru n’abatarengeje imyaka 23, aho iyi nzira ari na yo izaba igize agace ka mbere ka Tour du Rwanda 2020 izatangira mu mpera za Gashyantare umwaka utaha.

Nyuma yo kuva i Rwamagana ayoboye bagenzi be, Munyaneza Didier yegukanye aka gace ka nyuma ka Rwanda Cycling Cup 2019 akoresheje amasaha atatu, iminota 20 n’amasegonda 55, arusha amasegonda 57 Areruya Joseph ‘Kimasa’ na Manizabayo Eric ‘Karadiyo’ bari bamukurikiye.

Mugenzi we bakinana, Uhiriwe Byiza Renus, ni we wegukanye Rwanda Cycling Cup 2019 nyuma yo guteranya amanota agize amasiganwa umunani yakinwe guhera muri Nyakanga.

Iri ryabaye isiganwa rya gatatu Munyaneza Didier yegukanye muri Rwanda Cycling Cup 2019, ni nyuma yo gutsinda Kivura Race yakiniwe i Rubavu muri Nzeri ndetse na Farmers Race yakiniwe i Musanze mu kwezi gushize.

Habura nka metero 100 ngo agere ku murongo, Munyaneza yabanje gukuramo amadarubindi yambarwa n’abasiganwa ku magare, arayahanagura, arongera ayasubiza mu maso.

Uko yishimiye iyi ntsinzi birajya gusa neza n’ibyo yakoze i Musanze. Kuri uyu wa Gatandatu, yari afite umwanya uhagije kubera ibihe yarushaga Areruya na Manizabayo bari bamukurikiye.

Nyuma yo gusubiza amadarubindi mu maso, yitonze, arekure amahembe y’igare yari atwaye maze agenda asa n’ubyinira ku igare, amaboko ayajyanira icya rimwe ibumoso, akayagarura iburyo mu gihe ubwo yageraga ku murongo, yazamuye ukuboko kumwe n’intoki ebyiri. Yari uwa mbere!

Uyu mukinnyi w’imyaka 21 ari mu Banyarwanda bahiriwe n’uyu mwaka wa 2019, aho kuri ubu ari mu bakinnyi 15 bazavamo umukinnyi w’umwaka muri Afurika yose. Areruya Joseph ni undi Munayrwanda uri kuri uru rutonde ndetse watwaye iki gihembo mu mwaka ushize.

Munyaneza ukinira n’ikipe y’Igihugu y’u Rwanda y’umukino w’amagare, aheruka kwegukana Tour du Sénégal yari yitabiriwe n’ikipe ye ya Benediction Excel Energy.

Yabaye kandi umukinnyi ukiri muto witwaye neza kurusha abandi muri La Tropicale Amissa Bongo.

Umwaka wa 2019 azawusoza mu birori bidasanzwe ubwo azaba ashyingiranwa n’umukunzi we, Niyomubyeyi Joselyne, mu bukwe buzaba tariki ya 28 z’uku kwezi.

Agace ka nyuma ka Rwanda Cycling Cup 2019 kakiniwe mu muhanda Kigali-Rwamagana- Kigali
Munyaneza Didier Mbappé yatsinze agace ka nyuma ka Rwanda Cycling Cup 2019
Munyaneza Didier uzwi nka Mbappé ukinira Benediction Excel Energy, yegukanye agace ka nyuma ka Rwanda Cycling Cup kakinwe ku wa 7 Ukuboza 2019 aho abakinnyi bahagurukiye Kimironko berekeza i Rwamagana, bakagaruka Kimironko. Uyu mukinnyi yishimiye intsinzi abyinira ku igare, akajyana amaboko mu ruhande rumwe, akayagurura mu rundi
Agiye kugera ku murongo yazamuye ukuboko kumwe
Munyaneza Didier yishimira kwegukana agace ka nyuma ka Rwanda Cycling Cup 2019
Munyaneza Didier w'imyaka 21 ni umwe mu bakinnyi 15 bitwaye neza muri uyu mwaka, bakomoka ku mugane wa Afurika
Munyaneza yahembwe na Cogebanque nk'umukinnyi witwaye neza mu batarengeje imyaka 23
Munyaneza Didier acugusa champagne nyuma yo kwegukana agace ka nyuma ka Rwanda Cycling Cup 2019

Amafoto: Niyonzima Moïse


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza