Abanyarwanda ntibahiriwe n’umunsi wa kabiri wa La Tropicale Amissa Bongo

Yanditswe na Eric Tony Ukurikiyimfura
Kuya 21 Mutarama 2020 saa 05:29
Yasuwe :
0 0

Umunsi wa kabiri w’isiganwa rizenguruka Gabon, La Tropicale Amissa Bongo, ntiwahiriye abakinnyi batandatu bagize ikipe y’u Rwanda, aho agace ka kabiri kakinwe kuri uyu wa Kabiri kegukanywe n’Umunya-Erythrèe, Natnael Tesfazion.

Abasiganwa 86 bahagurutse i Bitam berekeza mu gace ka Oyem, ku ntera y’ibilometero 120, yegukanywe na Natnael Tesfazion ukinira ikipe y’igihugu ya Erythrèe nyuma yo gukoresha amasaha abiri, iminota 30 n’amasegonda 42.

Amasegonda 11 uyu mukinnyi yongewe nyuma yo kwitwara neza muri aka gace, yatumye anafata umwanya wa mbere ku rutonde rusange, aho amaze gukoresha amasaha atandatu, iminota ine n’amasegonda 28, ibihe anganya na mugenzi we, Yemane Dewit wabaye uwa kabiri mu gace ka mbere.

Munyaneza Didier “Mpappé” ni we Munyarwanda waje hafi muri aka gace ka kabiri, akoresha ibihe bimwe n’aba bakinnyi bose basoreje mu gikundi cya mbere, ari ku mwanya wa 10 kimwe na Nzafashwanayo Jean Claude wabaye uwa 15.

Mugisha Moïse yabaye uwa 20, arushwa amasegonda 34 n’uwa mbere , akurikirwa na Uhiriwe Byiza Renus, we wasizwe amasegonda 41.

Areruya Joseph wegukanye iri rushanwa mu 2018, yabaye uwa 43 asizwe iminota 14 n’amasegonda 44 mu gihe kapiteni w’ikipe y’u Rwanda, Mugisha Samuel, yasoreje ku mwanya wa 54 arushwa iminota 15 n’amasegonda 32.

Umutaliyani Viviani Attilio ukinira Cofidis Solutions Crédits yo mu Bufaransa, wari wegukanye agace ka mbere, yabaye uwa 56, agera ku murongo ari mu gikundi kimwe na Mugisha Samuel.

La Tropicale Amissa Bongo iri ku rwego rwa 2.1, izakomeza kuri uyu wa Gatatu hakinwa agace ka gatatu, aho abasiganwa bazahagurukira Mitzic berekeza mu gace ka Ndjole, ku ntera y’ibilometero 180.

Umunya-Erythrèe, Natnael Tesfazion, yegukanye agace ka kabiri ka La Tropicale Amissa Bongo
Abanya-Erythrèe bakomeje kwigaragaza muri La Tropicale Amissa Bongo iri kuba ku nshuro ya 15

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza